ନୟାଗଡ଼ ଅଫିସ/ଗଣିଆ,୧୮ା୫(ଡି.ଏନ୍.ଏ.): ଗଣିଆ ବ୍ଲକର ୩ଜଣ ଚିହ୍ନଟ ପରେ ନୟାଗଡ଼ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ୯ରେ ପହଞ୍ଚତ୍ଛି। ଗଣିଆ ରଘୁନାଥ ଜୀଉ ମହାବିଦ୍ୟାଳୟ କ୍ୱାରାଣ୍ଟାଇନ୍ ସେଣ୍ଟରରୁ ୩୧, ୪୭ ଓ ୪୮ ବର୍ଷର ପ୍ରବାସୀ ଶ୍ରମିକ ଚିହ୍ନଟ ହୋଇଛନ୍ତି। ଏମାନେ ଗୁଜରାଟର ଅହମ୍ମଦାବାଦରୁ ଆସି କ୍ୱାରାଣ୍ଟାଇନ୍ରେ ଥିଲେ। ରିପୋର୍ଟ ଆସିବା ପରେ ୩ଜଣଙ୍କୁ ରବିବାର ଭୁବନେଶ୍ୱର ସ୍ଥାନାନ୍ତର କରାଯାଇଛି ବୋଲି ସିଡିଏମଓ ଶ୍ୱେତ ମହାପାତ୍ର ସୂଚନା ଦେଇଛନ୍ତି। ଅହମ୍ମଦାବାଦରୁ ଆସିଥିବା ୬୦ଜଣଙ୍କ ମଧ୍ୟରୁ ୫୫ ଜଣ ଗଣିଆ ରଘୁନାଥ ଜୀଉ ମହାବିଦ୍ୟାଳୟ ଓ ୫ଜଣ କିଶୋରପ୍ରସାଦ ହାଇସ୍କୁଲ କ୍ୱାରାଣ୍ଟାଇନ୍ ସେଣ୍ଟରରେ ଥିଲେ। ରଘୁନାଥ ଜୀଉ ମହାବିଦ୍ୟାଳୟରେ ଥିବା ଗଞ୍ଜାମ, କଟକ ନରସିଂହପୁର ଓ ଗଣିଆ ବ୍ଲକର ୫୯ଜଣଙ୍କ ସ୍ବାବ୍ ଟେଷ୍ଟ ପାଇଁ ଯାଇଥିଲା। ଏଥିରୁ ୪୪ ନେଗେଟିଭ୍ ଓ ୩ ପଜିଟିଭ୍ ଆସିଥିଲା। ଏମାନେ ବସନ୍ତପୁର, ହଟିଆପଲ୍ଲୀ ଅଞ୍ଚଳର ବୋଲି ଜଣାପଡିଛି। ଅନ୍ୟମାନଙ୍କ ରିପୋର୍ଟ ଆସି ନାହିଁ । ପ୍ରଥମେ ଜିଲାର କରଡା ହରିହରପୁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ କ୍ୱାରାଣ୍ଟାଇନ୍ ସେଣ୍ଟରରୁ ୫ଜଣ ଓ କୋମଣ୍ଡ ହାଇସ୍କୁଲ ସେଣ୍ଟରରୁ ଜଣେ ଏପରି ୬ଜଣ ପ୍ରବାସୀଙ୍କ କରୋନା ପଜିଟିଭ ଆସିଥିଲା।
