ନୟାଗଡ଼ ଅଫିସ,୨୧।୧-ନୟାଗଡ଼ ଜିଲାରେ ପୁଅଙ୍କ ତୁଳନାରେ ଝିଅଙ୍କ ସଂଖ୍ୟା ହ୍ରାସ ନେଇ ବିଭିନ୍ନ ସମୟରେ ଉଦ୍ବେଗ ପ୍ରକାଶ ପାଇଥାଏ। ଜିଲାରେ ପୁଅଙ୍କ ସଂଖ୍ୟା ୧୦୦୦ ଥିଲାବେଳେ ଝିଅଙ୍କ ସଂଖ୍ୟା ୮୫୫ ରହିଥିବା ସୂତ୍ରରୁ ଜଣାପଡ଼ିଛି। ଏହିଭଳି ସ୍ଥଳେ ନୟାଗଡ଼ ବ୍ଲକ କ୍ରିଦାଶପୁର ପଞ୍ଚାୟତର କଞ୍ଚନବିଲି ଗ୍ରାମରେ ଏ ଦିଗରେ ସଚେତନତା ଯୋଗୁଁ ଗ୍ରାମରେ ଝିଅଙ୍କ ସଂଖ୍ୟା ବଢ଼ିବାରେ ଲାଗୁଛି।
ଅଙ୍ଗନୱାଡ଼ି କେନ୍ଦ୍ରରୁ ମିଳିଥିବା ସୂଚନା ଅନୁସାରେ ଏବେ ଗ୍ରାମରେ ୦ ରୁ ୬ବର୍ଷ ଭିତରେ ଝିଅଙ୍କ ସଂଖ୍ୟା ୩୫ ଥିବାବେଳେ ପୁଅଙ୍କ ସଂଖ୍ୟା ୩୪ ରହିଛି । ୩ରୁ ୬ବର୍ଷ ଭିତରେ ପୁଅ ଝିଅଙ୍କ ସଂଖ୍ୟା ହିସାବକୁ ନେଲେ ଝିଅଙ୍କ ସଂଖ୍ୟା ୨୧ ଥିବାବେଳେ ପୁଅଙ୍କ ସଂଖ୍ୟା ୧୬ ରହିଛି । ସେଥିମଧ୍ୟରୁ ୩ରୁ ୬ବର୍ଷ ଭିତରେ ଅଙ୍ଗନୱାଡ଼ି କେନ୍ଦ୍ରରେ ନାମ ଲେଖାଇଥିବା ଝିଅଙ୍କ ସଂଖ୍ୟା ୧୭ ଥିବାବେଳେ ପୁଅଙ୍କ ସଂଖ୍ୟା ୧୦ ରହିଛି, ଯାହାକି ପୂର୍ବରୁ ଏହି ଗ୍ରାମରେ ଝିଅଙ୍କ ତୁଳନାରେ ପୁଅଙ୍କ ସଂଖ୍ୟା ଅଧିକ ଥିଲା । ଗ୍ରାମରେ ବର୍ତ୍ତମାନ ମୋଟ ଜନସଂଖ୍ୟା ୮୦୨ ଥିବାବେଳେ ସେଥିମଧ୍ୟରୁ ପୁରୁଷଙ୍କ ସଂଖ୍ୟା ୪୩୦ ଓ ମହିଳାଙ୍କ ସଂଖ୍ୟା ୩୭୨ ରହିଛି ା ତେବେ ଲୋକମାନଙ୍କୁ ସଚେତନ କରିବା ପରେ ଏହି ଗ୍ରାମରେ କନ୍ୟା ସଂଖ୍ୟା ବୃଦ୍ଧି ପାଇଥିବା କଞ୍ଚନବିଲି ଅଙ୍ଗନୱାଡ଼ି କେନ୍ଦ୍ରର କର୍ମୀ ବିଷ୍ଣୁପ୍ରିୟା ପ୍ରଧାନ ସୂଚନା ଦେଇଛନ୍ତି। ନୟାଗଡ଼ ଜିଲାରେ କନ୍ୟା ସଂଖ୍ୟା ହ୍ରାସନେଇ ଉଦ୍ବେଗଜନକ ସ୍ଥିତି ଥିବାବେଳେ ଏପରି ସଚେତନତା ଯୋଗୁଁ କଞ୍ଚନବିଲି ଗ୍ରାମରେ କନ୍ୟାସଂଖ୍ୟା ବୃଦ୍ଧିକୁ ନେଇ ନୂଆ ଆଶା ସଞ୍ଚାର କରିଛି ା ଜିଲାର ଏକ ଭଲ ଗ୍ରାମ ଭାବେ କଞ୍ଚନବିଲି ପରିଚୟ ସୃଷ୍ଟି କରିଛି।
