ଇସ୍ଲାମାବାଦ, ୧୩ା୮(ପି.ଟି.): କଶ୍ମୀର ପ୍ରସଙ୍ଗରେ ପାକିସ୍ତାନର ସବୁ ରାଜନୈତିକ ଦଳ ଏକ ହେବାକୁ ଏହାର ବହିର୍ବ୍ୟାପାର ମନ୍ତ୍ରୀ ଶାହ ମେହମୁଦ କୁରେଶୀ ଆହ୍ବାନ କରିଛନ୍ତି। ପାକ୍ ଅଧିକୃତ କଶ୍ମୀରର ମୁରାଦାବାଦ୍ଠାରେ ଇଦ୍ ପାଳନ ଅବସରରେ ସେ ଯୋଗଦେଇ କହିଛନ୍ତି, କଶ୍ମୀର ପଛରେ ସାରା ପାକିସ୍ତାନ ଓ ଏହାର ସମସ୍ତ ରାଜନୈତିକ ନେତୃବୃନ୍ଦ ଅଛନ୍ତି। ଅଗଷ୍ଟ ୧୪ରେ କଶ୍ମୀର ସମର୍ଥନରେ ଏକ ପ୍ରତିଧ୍ୱନି ଶୁଣାଯିବ। ଏହି ଦିନକୁ କଶ୍ମୀର ଏକତା ଦିବସ ଭାବେ ପାକିସ୍ତାନ ପାଳନ କରିବ। ଭାରତ ୩୭୦ ଉଚ୍ଛେଦ କରି ଜମ୍ମୁ-କଶ୍ମୀରକୁ ଦୁଇଟି କେନ୍ଦ୍ରଶାସିତ ଅଞ୍ଚଳ କରିବା ବିରୋଧରେ ଅଗଷ୍ଟ ୧୫କୁ କଳାଦିବସ ଭାବେ ପାଳନ କରାଯିବ ବୋଲି କୁରେଶୀ ପ୍ରକାଶ କରିଛନ୍ତି। ଏକାଠି ହେବା ପରିବର୍ତ୍ତେ ରାଜନୀତି କରାଗଲେ ସବୁ ବେକାର ହୋଇଯିବ ବୋଲି ସେ ସତର୍କ କରାଇଦେଇଛନ୍ତି। ଏହି ଘଡ଼ିସନ୍ଧି ମୁହୂର୍ତ୍ତରେ ଆମକୁ ଏକହୋଇ ସ୍ବର ଉଠାଇବାକୁ ପଡ଼ିବ ବୋଲି କୁରେଶୀ କହିଛନ୍ତି। ପ୍ର୍ରଧାନମନ୍ତ୍ରୀ ଇମ୍ରାନ୍ ଖାନ୍ ଅଗଷ୍ଟ ୧୪ରେ ପିଓକେ ଗସ୍ତ କରି ଏହାର ବିଧାନସଭାରେ ଉଦ୍ବୋଧନ ଦେବାର କାର୍ଯ୍ୟକ୍ରମ ରହିଛି। କଶ୍ମୀର ପ୍ରସଙ୍ଗକୁ ଜାତିସଂଘ ସୁରକ୍ଷା ପରିଷଦକୁ ନେବା ଲାଗି ପାକିସ୍ତାନ ସ୍ଥିର କରିଛି ଓ ଚାଇନା ଏଥିଲାଗି ପୂର୍ଣ୍ଣ ସମର୍ଥନ ଦେବ ବୋଲି କହିଥିବା କୁରେଶୀ ଏହି ଅବସରରେ ପ୍ରକାଶ କରିଛନ୍ତି।
