ବରୀ, ୩୧।୫ (ସ୍ବ.ପ୍ର.)-ଉପକୂଳ ଜିଲାଗୁଡ଼ିକର ଖାଲୁଆ ଜମିରେ ଉଦ୍ବୃତ୍ତ ଜଳ ନିଷ୍କାସନ ହେବାରେ ସମସ୍ୟା ଯୋଗୁ ହଜାର ହଜାର ହେକ୍ଟର ଚାଷଜମିରେ ଫସଲ ନଷ୍ଟ ହେଉଛି। ତେବେ ଚାଷ ଜମିକୁ ଜଳସେଚନ ସୁବିଧା ସହ ଉଦ୍ବୃତ୍ତ ବର୍ଷାଜଳ ନିଷ୍କାସନ ନିମନ୍ତେ ପାଟନାଳୀ ଖନନ ପାଇଁ ବରୀ ବ୍ଲକର ଚାଷୀମାନେ ଦୀର୍ଘଦିନ ଧରି କରିଆସୁଥିବା ଦାବିକୁ ଗୁରୁତ୍ୱ ଦେଇ ୨ଟି ପାଟନାଳୀ ପୁନରୁଦ୍ଧାର ପାଇଁ ଡ୍ରେନେଜ୍ ବିଭାଗ ପକ୍ଷରୁ ୧୦ଲକ୍ଷ ଟଙ୍କା ମଞ୍ଜୁର ହୋଇଛି। ହେଲେ ଚାଷୀଙ୍କ ବିକାଶ ପାଇଁ ଖର୍ଚ୍ଚ ହେଉଥିବା ଲକ୍ଷାଧିକ ଟଙ୍କା ପାଣିରେ ପଡ଼ିବ ବୋଲି ବ୍ଲକ ଅଞ୍ଚଳର ଚାଷୀ ଅଭିଯୋଗ କରିଛନ୍ତି।
ଅଭିଯୋଗ ମୁତାବକ, ବ୍ଲକ ଅଧୀନ ସାରନ୍ଦା ପାଟନାଳୀ ଓ କ୍ଷେମେଶ୍ୱର ପଲ୍ଲିଶ୍ରୀ ପାଟନାଳୀ ପୁନରୁଦ୍ଧାର ପାଇଁ ୫ଲକ୍ଷ ଲେଖାଏଁ ମଞ୍ଜୁର କରାଯାଇଛି। ୫ ମିଟର ଓସାର ଓ ୩.୫ ଫୁଟ୍ ଗଭୀର ଖନନ କରାଯିବାକୁ ଆକଳନ ରହିଛି। ମାତ୍ର ଖନନ ନାମରେ ନାଳର ଉଭୟ ପାର୍ଶ୍ୱରେ ଥିବା ଘାସ ଚାଞ୍ଛିବା ସହ କେତେକ ସ୍ଥାନରେ କଳମ ଗଛ କଟାଯାଇଥିବା ଦେଖିବାକୁ ମିଳିଛି। ୩.୫ ଫୁଟ୍ ଗଭୀର ଖୋଳାଯିବା ସ୍ଥାନରେ କେବଳ ଘାସ ମୂଳ ଉଠିବା ପର୍ଯ୍ୟନ୍ତ ମାଟି ଖୋଳାଯାଇଛି। ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ପାଟନାଳୀ ପୁନରୁଦ୍ଧାର କରାଯାଉଥିବା ବେଳେ ଏହା ଚାଷୀଙ୍କ କାର୍ଯ୍ୟରେ ଲାଗିବା ଉପଯୋଗୀ କରାଯାଉ ନ ଥିବାରୁ ଚାଷୀମାନେ ଅସନ୍ତୋଷ ବ୍ୟକ୍ତ କରିଛନ୍ତି। ଏ ସମ୍ପର୍କରେ ସମ୍ପୃକ୍ତ ବିଭାଗର ନିର୍ବାହୀ ଯନ୍ତ୍ରୀଙ୍କୁ ପଚାରିବାରେ, ଚାଷୀଙ୍କ ଆପତ୍ତି ଅନୁସାରେ ନାଳ ଖନନ ପାଇଁ କାର୍ଯ୍ୟାଦେଶ ଦିଆଯାଇଛି। ଠିକାଦାର କାମ ଆରମ୍ଭ କରିଛନ୍ତି। ଆକଳନ ଅନୁସାରେ କାର୍ଯ୍ୟ କରା ନଗଲେ ବିଲ୍ ମଧ୍ୟ ସେହି ଅନୁସାରେ କରାଯିବ। ଚାଷୀମାନଙ୍କୁ କାମ ସମ୍ପୂର୍ଣ୍ଣ ପର୍ଯ୍ୟନ୍ତ ଅପେକ୍ଷା କରିବାକୁ ସେ କହିଛନ୍ତି।
