ବାରିପଦା ଅଫିସ,୫ା୫: ମୟୂରଭଞ୍ଜ ଜିଲା ବଡ଼ସାହି ବ୍ଲକ ପାଉଁଶିଆ ପଞ୍ଚାୟତ ନିର୍ବାହୀ ଅଧିକାରିଣୀ(ପିଇଓ)ଙ୍କ ବ୍ୟବହାରରେ ଅତିଷ୍ଠ ହୋଇ ଉତ୍ତ୍ୟକ୍ତ ଲୋକେ ଗୁରୁବାର ପଞ୍ଚାୟତ କାର୍ଯ୍ୟାଳୟରେ ତାଲା ପକାଇ ଦେଇଥିଲେ। ଫଳରେ ଦୀର୍ଘ ସମୟ ପର୍ଯ୍ୟନ୍ତ ସେ କାର୍ଯ୍ୟାଳୟ ମଧ୍ୟରେ ଅଟକି ରହିଥିଲେ। ଖବରପାଇ ପୋଲିସ ଓ ବ୍ଲକ କର୍ତ୍ତୃପକ୍ଷ ପହଞ୍ଚି ସମ୍ପୃକ୍ତ ଅଧିକାରୀଙ୍କୁ ବଦଳି କରିବାର ପ୍ରତିଶ୍ରୁତି ଦେବା ପରେ ପରିସ୍ଥିତି ସ୍ବାଭାବିକ ହୋଇଥିଲା।
ସୂଚନା ଅନୁଯାୟୀ, ଗୁରୁବାର ପଞ୍ଚାୟତ କାର୍ଯ୍ୟାଳୟକୁ ୧୧ଟି ୱାର୍ଡର ଲୋକେ ଚାଉଳ ନେବାକୁ ଆସିଥିଲେ। ଚାଉଳ ପ୍ରଦାନ କରିବା ପରିବର୍ତ୍ତେ ଭତ୍ତା ବଣ୍ଟନରେ ବ୍ୟସ୍ତ ରହି ପିଇଓ ଜଣକ ଶୁକ୍ରବାର ଚାଉଳ ଦିଆଯିବ ବୋଲି କହିଥିଲେ। ଟାଣ ଖରାରେ ବାରମ୍ବାର ପଞ୍ଚାୟତ କାର୍ଯ୍ୟାଳୟକୁ ଚାଉଳ ନେବାକୁ ଆସି ଫେରୁଥିବା ଜଗନ୍ନାଥପୁର, ଭଣ୍ଡାରିକୁଳା, ଶାଳବଣୀ, ରାଜଗଡ଼ ଓ କାଣିମହୁଲୀ ଗ୍ରାମବାସୀ ଅସନ୍ତୋଷ ପ୍ରକାଶ କରିଥିଲେ। ସେମାନେ ଚାଉଳ ନେବାକୁ ଅଡ଼ି ବସିବାରୁ ଅଧିକାରିଣୀ ଜଣକ ଦୁର୍ବ୍ୟବହାର କରିଥିବା ଲୋକେ ଅଭିଯୋଗ କରି ତାଙ୍କୁ ପଞ୍ଚାୟତ କାର୍ଯ୍ୟାଳରେ ତାଲା ପକାଇ ହୋହହ୍ଲା କରିଥିଲେ। ପୋଲିସ ଓ ବ୍ଲକ ପଞ୍ଚାୟତ ଅଧିକାରୀ ଦାୟିତ୍ୱରେ ଥିବା ରୂପେଶ ମାଝୀ ପହଞ୍ଚି ଘଟଣାରେ ହସ୍ତକ୍ଷେପ କରିବା ପରେ ଉତ୍ତ୍ୟକ୍ତ ଲୋକେ ଶାନ୍ତ ପଡ଼ିଥିଲେ।
