ବିନିକା,୧୩।୨(ଡି.ଏନ୍.ଏ.)- ସୁବର୍ଣ୍ଣପୁର ଜିଲା ବିନିକା ବ୍ଲକ ଭଣ୍ଡାର ପଁଚେତ୍ ପିତାଇପାଲି ସରକାରୀ ଉଚ୍ଚ ପ୍ରାଥମିକ ବିଦ୍ୟାଲୟରେ ପିଇଲା ପାଏନ୍ ସମସିଆ ଲାଗିରହିଛେ। ଇ ଘଟନାକେ ନେଇ ଅଭିଭାବ ଆର ସ୍କୁଲ କତୁରପକ୍ଷ ବିଭାଗୀୟ ଅଧ୍କାରୀମାନକୁ ଜନେଇଥିଲେ ବି ଆଏଜ୍ତକ ସମସିଆର ସମାଧାନ ନାଇଁ ହେଇପାରି।
ସୂଚନା ଅନ୍ସାରେ ଅଂଚଲରେ ଶିକ୍ଷାର ପରସାର ଲାଗି ୧୯୫୯ ସାଲେ ପିତାଇପାଲିରେ ଗୁଟେ ପ୍ରାଥମିକ ସ୍କୁଲର ଥାପନା କରାଯାଇଥିଲା। ଏହେଦେ ଇ ସ୍କୁଲରେ ୧ମରୁ ୮ମ ଶ୍ରେଣୀ ତକ୍ ମୋଟ ୫୩ ଝନ୍ ଛାତ୍ରୀଛାତ୍ର ପାଠ୍ପଢ଼ୁଛନ୍। ହେଲେ ଅନେକ ବଛର ହେଲା ସ୍କୁଲରେ ପିଇଲା ପାଏନ୍ ସମସିଆ ଲାଗି ରହିଛେ। ଏନ୍ତାଥି ଛାତ୍ରୀଛାତ୍ର, ଶିକ୍ଷକ ପିଇଲା ପାଏନ୍ ଲାଗି ବଡ଼ା ଦହଗଁଜ୍ ହେଉଥିବାର ଅଭିଯୋଗ ହେଉଛେ। ଅନେକ ଦିନ୍ ଆଗ୍ରୁ ଛାତ୍ରୀଛାତ୍ରକଁର ପିଇଲା ପାଏନ୍ ସୁବିଧା ଲାଗି ସ୍କୁଲ ପରିସରରେ ବିନିକା ଗ୍ରାମ୍ୟ ଜଳଯୋଗାଣ ବିଭାଗ ଗୁଟ୍ଗୁଟ୍ କରି ୩ଟା ନଲ୍ଚୁଅଁା କୁଡ଼ିଥିଲା। ହେଲେ ସବୁ ନଲ୍ଚୁଅଁା ଫେଲ୍ ମାରିଥିଲା। ସେଦିନ୍ଠାନୁ ସମସିଆର ସମାଧାନ ଲାଗି କେହେନ୍ସି ପଦକ୍ଷେପ ନାଇଁ ନିଆଯାଇ ବଲି ଅଭିଭାବକ ଆର ଗଁାବାସୀ ଅଭିଯୋଗ କରିଛନ୍। ଇଆଡ଼େ ସ୍କୁଲରେ ଏମ୍ଡିଏମ୍ ରଁଧାବଢ଼ା ଲାଗି ରଁାଧେନ୍ମାନେ ୩ କି.ମି. ଦୂରିଆରୁ ପାଏନ୍ ଦୁହାରୁଥିବାର ଜନାଯାଇଛେ। ଇ ଦିଗେ ଥାନୀଅ ପରଶାସନ, ବିଭାଗୀୟ କତୁରପକ୍ଷ ଦୁରୁଷ୍ଟି ଦେଇ ସମସିଆର ସମାଧାନ କରବାକେ ଅଭିଭାବକ, ଗଁାବାସୀ ଦାବି କରିଛନ୍। ଇ ବାବ୍ଦେ ସ୍କୁଲର ପ୍ରଧାନଶିକ୍ଷକ ନଥୁରାମ ମହାନନ୍ଦକୁଁ ପଚ୍ରାଲାରୁ ବହୁତ୍ ବଛର ହେଲା ସ୍କୁଲରେ ପିଇଲା ପାଏନ୍ ସମସିଆ ଲାଗି ରହିଛେ। ସ୍କୁଲରେ ବେଲାର ରଁଧାଖଁଜା ଲାଗି ରଁାଧେନ୍ମାନେ ୩ କି.ମି. ଦୂରିଆନୁ ପାଏନ୍ ଦୁହାରୁଛନ୍। ଇ ବାବ୍ଦେ ବିଭାଗୀୟ ଅଧ୍କାରୀମାନକୁ ଜନେଇ ଦିଆଯାଇଛେ ବଲି ସେ କହିଥିଲେ। ସେନ୍ତା ଇ ବାବ୍ଦେ ବିନିକା ବିଇଓ ଶଶୀଭୂଷଣ ସେଠୀକୁଁ ପଚ୍ରାଲାରୁ ପିତାଇପାଲି ସ୍କୁଲର ସମସିଆ ବାବ୍ଦେ ଜାନିଛେଁ, ଉଚ କତୁରପକ୍ଷକୁଁ ବି ଜନେଇ ଦିଆଯାଇଛେ। ବହୁତ୍ ଜଲଦି ସମସିଆର ସମାଧାନ ହେବା ବଲି ସେ କହିଥିଲେ।
