ପିପିଲି,୨୧ା୪ (ସ୍ବ.ପ୍ର): ରାଜ୍ୟ ସରକାର ଲକ୍ଡାଉନକୁ କିଛିମାତ୍ରାରେ କୋହଳ କରିଛନ୍ତି। ପୁରୀ ଜିଲା ପିପିଲି ଟୋଲ ପ୍ଲାଜା ସିଲକୁ ସୋମବାରଠାରୁ ଖୋଲା ଯାଇଛି। ଏଥିସହ କର୍ମଚାରୀମାନେ ପୂର୍ବଭଳି ଟୋଲ ପ୍ଲାଜାରେ ଟିକସ ଆଦାୟ କାର୍ଯ୍ୟ ଆରମ୍ଭ କରିଛନ୍ତି। କରୋନା ସଂକ୍ରମଣକୁ ରୋକିବା ଲାଗି ସମଗ୍ର ଦେଶରେ ଲକ୍ଡାଉନ ଆରମ୍ଭ ହେବାରୁ ମାର୍ଚ୍ଚ ୨୪ ମଧ୍ୟରାତ୍ରିଠାରୁ ପିପିଲି ଟୋଲ ପ୍ଲାଜାରେ ଟିକସ୍ ଆଦାୟକୁ ସମ୍ପୂର୍ଣ୍ଣ ବନ୍ଦ କରାଯାଇଥିଲା। ଟୋଲ ପ୍ଲାଜା ସିଲ ଖୋଲାଯିବା ପରେ ଗାଡି ଚଳାଚଳ ସ୍ବାଭାବିକ ହୋଇଛି। ସାମାଜିକ ଦୂରତ୍ୱ ବଜାୟ ରଖି ଟୋଲ ପ୍ଲାଜାର ସମସ୍ତ କର୍ମଚାରୀ ହାତରେ ଗ୍ଲୋବ୍ସ, ମୁହଁରେ ମାସ୍କ ପିନ୍ଧି ଟିକସ୍ ଆଦାୟ କରିଥିଲେ। ସେପଟେ ଟୋଲ ପ୍ଲାଜାଠାରୁ ପ୍ରାୟ ୫୦ଫୁଟ ଦୂରରେ ଭୁବନେଶ୍ୱର ପ୍ରବେଶ ପଥକୁ ବାରିକେଡ କରାଯାଇ ଯିବା ଆସିବା କରୁଥିବା ସମସ୍ତ ଗାଡିିକୁ ପୂର୍ବଭଳି ପିପିଲି ଥାନା ପୋଲିସ କଡାକଡି ଯାଞ୍ଚ କରୁଥିବା ଆଇଆଇସି ଶରତ କୁମାର ସାହୁ କହିଛନ୍ତି।
