ଆନନ୍ଦପୁର,୫।୮(ସ୍ବ.ପ୍ର.): ଏମିତି ବି ମଣିଷ ଥାନ୍ତି। ନିଜଠାରୁ ଅଧିକ ଅସହାୟ ଲୋକ ଏବଂ ପରୋପକାର କଥା ଚିନ୍ତା କରିଥାନ୍ତି। ଆଜି ବି ସମାଜରେ ଭଲ ଲୋକ ଅଛନ୍ତି। ଯେଉଁଥିପାଇଁ ସମଗ୍ର ଅଞ୍ଚଳ ଗର୍ବିତ ଅନୁଭବ କରେ। ସେମିତି ଏକ ଅନନ୍ୟ ମଣିଷ ହେଉଛନ୍ତି କେନ୍ଦୁଝର ଜିଲା ଘସିପୁରା ବ୍ଲକ କେଶଦୁରାପାଳ ଗ୍ରାମର ଅବସରପ୍ରାପ୍ତ ଶିକ୍ଷକ ନିମାଁଇ ଚରଣ ମହାରଣା(୬୬)। ଦୀର୍ଘ ୩୭ ବର୍ଷ ଶିକ୍ଷକତା ପରେ ଏବେ ସେ ମାଗଣାରେ ଛାତ୍ରୀଛାତ୍ରଙ୍କୁ ଶିକ୍ଷାଦାନ କରୁଛନ୍ତି। କେବଳ ଏତିକି ନୁହେଁ। ଏତଦବ୍ୟତୀତ ଅସୁବିଧାରେ ଥିବା ଲୋକ, ଗରିବ ଓ ୪ ଜଣ ବିଧବା ବୃଦ୍ଧାଙ୍କୁ ୫୦୦ ଟଙ୍କା ଲେଖାଏଁ ନିଜ ପେନସନ ଟଙ୍କାରୁ ସହାୟତା କରିଥାନ୍ତି। ଗୋଟିଏ ମାସ ୪ ଜଣଙ୍କୁ ସହାୟତା ଦେଉଥିବାବେଳେ ପରମାସରେ ଅନ୍ୟ ଚାରି ଜଣଙ୍କୁ ସହାୟତା ଦେଇଥାନ୍ତି। ଦୈନନ୍ଦିନ ସକାଳେ ଓ ସନ୍ଧ୍ୟାରେ ବହୁ ସଂଖ୍ୟାରେ ଛାତ୍ରୀଛାତ୍ରଙ୍କୁ ନିଜ ଘରେ ପାଠ ପଢ଼ାଇଥାନ୍ତି। ଏପରି କାର୍ଯ୍ୟରେ ତାଙ୍କର ଧର୍ମପତ୍ନୀ କମଳିନୀ ମହାରଣା ତାଙ୍କୁ ଉତ୍ସାହିତ କରିବା ସହ ସାହସ ଦେଇଥାନ୍ତି। ନିମାଇଁ ସାର୍ଙ୍କ ଏଭଳି କାର୍ଯ୍ୟକଳାପକୁ ବିଭିନ୍ନ ମହଲରେ ପ୍ରଶଂସା କରାଯିବା ସହ ସ୍ବାଗତ ମଧ୍ୟ କରାଯାଇଛି। ତାଙ୍କ ନିକଟରୁ ବହୁ ଛାତ୍ରୀଛାତ୍ର ପାଠପଢି ବଡ ବଡ ପଦପଦବୀରେ ପ୍ରତିଷ୍ଠା ଲାଭ କରିଛନ୍ତି। ପିଲାମାନଙ୍କର ହସ ଓ ମା’ ମାନଙ୍କର ଆଶୀର୍ବାଦ ତାଙ୍କ ଶେଷ ଜୀବନର ସମ୍ବଳ ବୋଲି ସେ କହିଛନ୍ତି। ଶିକ୍ଷାଦାନ ଓ ସହାୟତା ନ କଲେ ତାଙ୍କୁ ଭଲ ଲାଗେନି ବୋଲି ମଧ୍ୟ ସେ କହିଛନ୍ତି। ଏହା ହେଉଛି ପେସା। ଶେଷ ଜୀବନ ପର୍ଯ୍ୟନ୍ତ ଏହାହିଁ କରିବେ ବୋଲି ଆମ ପ୍ରତିନିଧିଙ୍କୁ ଜଣାଇଛନ୍ତି।
