ସାହଦୋଲ,୨୫।୭: ମଧ୍ୟପ୍ରଦେଶର ସାହଦୋଲରେ ଜଣେ ୯୦ ବର୍ଷୀୟା ବୃଦ୍ଧା ମା’ ରତନି ପୁଅର ଅସ୍ଥି ଧରି ନ୍ୟାୟ ଭିକ୍ଷା କରୁଥିବା ଦେଖିବାକୁ ମିଳିଛି। ଦୀର୍ଘ ୧୧ ବର୍ଷ ହେବ ତାଙ୍କ ପୁଅଙ୍କ ମୃତ୍ୟୁ ହୋଇଥିବା ବେଳେ ଏପର୍ଯ୍ୟନ୍ତ ତାଙ୍କୁ ନ୍ୟାୟ ମିଳି ନ ଥିବାରୁ ସେ ଇନସପେକ୍ଟର ଜେନରାଲ(ଆଇଜି)ଅଫିସ ସାମ୍ନାରେ ନ୍ୟାୟ ମାଗୁଥିବା ଗୁରୁବାର ଦେଖାଯାଇଛି। ତାଙ୍କ କହିବା କଥା ହେଲା ୧୧ ବର୍ଷ ତଳେ ତାଙ୍କ ପୁଅଙ୍କୁ ହତ୍ୟା କରାଯାଇଥିଲା। ଏଥିପାଇଁ ସେ ଭୋପାଳ, ଜବଲପୁର, ଦିଲ୍ଲୀ ସବୁଠି ଯାଇ ଗୁହାରି କରିଥିଲେ ସୁଦ୍ଧା ଏପର୍ଯ୍ୟନ୍ତ ତାଙ୍କୁ କେହି ହେଲେ ନ୍ୟାୟ ପ୍ରଦାନ କରିପାରି ନାହାଁନ୍ତି। ସୂଚନାଯୋଗ୍ୟ, ଉକ୍ତ ମହିଳାଙ୍କ ପୁଅ ମୋହନ ବୈଗା(୪୨)ଙ୍କର ଅନୁପୁର ଜିଲା ବଟୁରା ଅଞ୍ଚଳରେ ଥିବା ଜଣେ ପେପର ମିଲ୍ ମାଲିକଙ୍କ ସହ ଝଗଡା ହୋଇଥିଲା। ପେପର ମିଲ୍ ଯୋଗୁଁ ସ୍ଥାନୀୟ ଅଞ୍ଚଳରେ ଖାଲ ଖମା ହୋଇ ପାଣି ଜମା ହେବାକୁ ବିରୋଧ କରିବାରୁ ମୋହନଙ୍କର ପେପର ମିଲ୍ ମାଲିକଙ୍କ ସହ ଝଗଡା ହୋଇଥିଲା। ଏହାର କିଛି ଘଣ୍ଟା ପରେ ମୋହନଙ୍କ ମୃତ ଶରୀର ନିକଟରେ ଥିବା ଏକ ନାଳରୁ ମିଳିଥିଲା। ଗ୍ରାମବାସୀ ଏହାକୁ ଏକ ହତ୍ୟାକଣ୍ଡ ବୋଲି କହିଥିଲେ ସୁଦ୍ଧା ଏହି ଘଟଣାକୁ ଚପାଇ ଦିଆଯାଇଥିଲା। ଏବେ ୧୧ ବର୍ଷ ପରେ ପୁଅ ମୃତ୍ୟୁର ନ୍ୟାୟ ଭିକ୍ଷା କରିଛନ୍ତି ମା’। ଯଦି ତାଙ୍କୁ ନ୍ୟାୟ ନ ମିଳେ ତେବେ ସେ ଆତ୍ମହତ୍ୟା କରିବାକୁ ଧମକ ଦେଇଛନ୍ତି।
