ପୁରୀ ଅଫିସ,୨୮।୫: ପୁରୀ ଜିଲାର ୭ଜଣ କରୋନା ଆକ୍ରାନ୍ତ ବୁଧବାର ସୁସ୍ଥ ହୋଇଛନ୍ତି। ପୂର୍ବରୁ ୧୮ଜଣ ସୁସ୍ଥ ହୋଇଥିବାବେଳେ ନୂଆ ୭ଜଣଙ୍କୁ ମିଶାଇ ବର୍ତ୍ତମାନ ୨୫ଜଣ ଏହି ମହାମାରୀ କରୋନା କବଳରୁ ମୁକ୍ତି ପାଇଛନ୍ତି। ତେବେ ଏହି ୭ଜଣଙ୍କ ସମ୍ପର୍କରେ ପ୍ରଶାସନ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇ ନାହିଁ। ବର୍ତ୍ତମାନ ସୁଦ୍ଧା ଜିଲାର କରୋନା ପଜିଟିଭ ସଂଖ୍ୟା ୮୫ ଛୁଇଁଛି। ଏମାନଙ୍କ ମଧ୍ୟରୁ ୨୫ଜଣ ସୁସ୍ଥ ହୋଇଥିବା ବେଳେ ୬୦ଜଣ ଏବେ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ତେବେ ଜିଲାରେ ଆକ୍ରାନ୍ତଙ୍କ ସଂଖ୍ୟା ଯେଉଁ ହାରରେ ବଢ଼ୁଛି ଖୁବ୍ଶୀଘ୍ର ଏହା ଶତକ ଛୁଇଁଯିବ ବୋଲି ଚର୍ଚ୍ଚା ହେଉଛି। ସବୁଠୁ ଉଦ୍ବେଗର ବିଷୟ ହେଉଛି ଆରମ୍ଭରୁ ପୁରୀ ଜିଲା ଭଲ ସ୍ଥିତିରେ ଥିଲା। ଏପ୍ରିଲ ୩ରେ ଜିଲାରୁ ପ୍ରଥମ ଆକ୍ରାନ୍ତ ଚିହ୍ନଟ ପରେ ଦୀର୍ଘ ୩୭ଦିନ ଧରି ଆଉ କୌଣସି ନୂଆ ଆକ୍ରାନ୍ତ ବାହାରି ନ ଥିଲେ। ମାତ୍ର ଗତ ୧୦ ତାରିଖଠାରୁ ଜିଲାରେ ଆକ୍ରାନ୍ତଙ୍କ ସଂଖ୍ୟା ହୁ ହୁ ହୋଇ ମାଡୁଛି। ଗତ ୧୭ ଦିନରେ ୮୪ ଆକ୍ରାନ୍ତ ଚିହ୍ନଟ ହେବାକୁ ନେଇ ଜିଲାବାସୀ ଚିନ୍ତିତ ହୋଇପଡିଛନ୍ତି।
