ନୂଆଦିଲ୍ଲୀ, ୧୧ା୨: ଦିଲ୍ଲୀରେ ପୁଣି ତେଜିଲା ସିଏଏ ବିରୋଧୀ ବିକ୍ଷୋଭ। ଜାମିଆନଗର ଓ ଜାମିଆ ମିଲିଆ ଇସ୍ଲାମିଆର ଛାତ୍ରୀଛାତ୍ରମାନେ ମିଶି ଜାମିଆର ୭ ନଂ. ଗେଟ୍ରୁ ବିଭିନ୍ନ ସ୍ଲୋଗାନ୍ ଦେଇ ବିକ୍ଷୋଭ ଆରମ୍ଭକରିବା ସହ ପାର୍ଲାମେଣ୍ଟ ଆଡକୁ ଯିବାବେଳେ ପୋଲିସ ସେମାନଙ୍କୁ ଅଟକାଇବାରୁ ମୁହାଁମୁହିଁ ପରିସ୍ଥିତି ସୃଷ୍ଟିହୋଇଛି। ବିକ୍ଷୋଭକାରୀ ଓ ପୋଲିସ ମଧ୍ୟରେ ଧସ୍ତାଧସ୍ତି ହୋଇଛି। ଜାମିଆ ସମନ୍ବୟ କମିଟି ବ୍ୟାନର୍ରେ ଛାତ୍ରୀଛାତ୍ର ଓ ପୂର୍ବତନ ଛାତ୍ରମାନେ ମିଶି ଜୋର୍ଦାର ବିକ୍ଷୋଭ କରିବା ସହ ସିଏଏ ଓ ଏନ୍ଆର୍ସିକୁ ବିରୋଧ କରିଥିଲେ। ପାର୍ଲାମେଣ୍ଟ ଆଡ଼କୁ ଯିବା ଲାଗି ବିକ୍ଷୋଭକାରୀଙ୍କୁ ଅନୁମତି ନାହିଁ ଓ ବିକ୍ଷୋଭ ବନ୍ଦକରିବା ଲାଗି ପୋଲିସ କହିଥିଲା। ହେଲେ ଅନେକ ବିକ୍ଷୋଭକାରୀ ବାରିକେଡ୍ ଡେଇଁଥିଲେ। ପୋଲିସ ସେମାନଙ୍କୁ ଅଟକାଇବାରୁ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା। ମୁସଲ୍ମାନଙ୍କୁ ଟାର୍ଗେଟ କରି ସରକାର ଏଭଳି ଧାର୍ମିକ ଭେଦଭାବ ସୃଷ୍ଟିକରୁଥିବା ବିକ୍ଷୋଭକାରୀମାନେ ଅଭିଯୋଗ କରିଥିଲେ। ଦୁଇମାସ ଧରି ବିକ୍ଷୋଭ ଜାରି ରହିଥିବାବେଳେ ସରକାର ଏନେଇ ଆଲୋଚନା କରୁ ନ ଥିବାରୁ ଆମେ ସରକାରଙ୍କ ପାଖକୁ ଯାଉଛୁ ବୋଲି ବିକ୍ଷୋଭକାରୀ କହିଥିଲେ। ତେବେ ସରକାର ଏନେଇ ସଫେଇ ଦେଇସାରିଛନ୍ତି ଓ କୌଣସି ଭାରତୀୟ ନାଗରିକତା ପ୍ରତି କିଛି ଅସୁବିଧା ନ ଥିବା ପୋଲିସ କହିଥିଲା। ଏଭଳି ଯୁକ୍ତିତର୍କ ଓ ଧସ୍ତାଧସ୍ତି ପରେ ପୋଲିସ ପକ୍ଷରୁ କଡ଼ା ପଦକ୍ଷେପ ଗ୍ରହଣ କରାଯାଇଥିଲା। ଏବେ ପରସ୍ଥିତି ସୁଧୁରିଥିବାବେଳେ ଚାପା ଉତ୍ତେଜନା ଲାଗିରହିଥିବା ଜଣାପଡ଼ିଛି।
