ଅନୁଗୋଳ ଅଫିସ୍/ବଅଁରପାଳ, ୨୭ା୧୦(ଡି.ଏନ.ଏ.)- ଅନୁଗୋଳ ଜିଲା ବଅଁରପାଳ ପୋଲିସ ରବିବାର ଏକ ବାଇକ୍ ଚୋରି ର଼୍ୟାକେଟକୁ ଧରିବାରେ ସଫଳ ହୋଇଛି। ଏହି ର଼୍ୟାକେଟର ୪ ଜଣଙ୍କୁ ଗିରଫ କରାଯିବା ସହ ୫ଟି ବାଇକ୍, ୪ଟି ମୋବାଇଲ, ୩ଟି ରେଞ୍ଚି ଜବତ କରାଯାଇଛି। ଏ ନେଇ ପୋଲିସ ପକ୍ଷରୁ ଏକ ପ୍ରେସ୍ ବିଜ୍ଞପ୍ତି ମାଧ୍ୟମରେ ସୂଚନା ପ୍ରଦାନ କରାଯାଇଛି। ସୂଚନା ମୁତାବକ, ମହୀଧରପୁର ଠାରେ ଗତ ୨୨ ତାରିଖରେ କାର୍ତ୍ତିକେଶ୍ବର ପୂଜା ପାଇଁ ପ୍ରସ୍ତୁତି ବୈଠକ ଚାଲିଥିବା ସମୟରେ ଦୁଇଟି ବାଇକ ଚୋରି ହୋଇଥିବା ନେଇ ବଅଁରପାଳ ଥାନାରେ ଗ୍ରାମ କମିଟିର ସଭାପତି ବିନୋଦ କୁମାର ବେହେରା ଅଭିଯୋଗ କରିଥିଲେ। ପୋଲିସ ୨୪୩/୧୯ରେ ମାମଲା ରୁଜୁ କରି ତଦନ୍ତ କରିଥିଲା। ଏଥିରେ ସମ୍ପୃକ୍ତ ଥିବା ତଦନ୍ତରୁ ଜଣାପଡିବା ପରେ ପୋଲିସ ଚଢ଼ାଉ କରି ଭୁବନେଶ୍ୱର ସ୍ଥିତ ଖଣ୍ଡଗିରି ଥାନା ଅଞ୍ଚଳରେ ଥିବା ଆଇଗିନିଆରୁ ରମେଶ ସାହୁ(୨୩), କଟକ ଜିଲା ବାଙ୍କି ଥାନା ଦୁଲନପୁରର ରାଜା ଓରଫ ପ୍ରଶାନ୍ତ ଲେଙ୍କା(୩୦), କଟକ ଜିଲା ଟିଗିରିଆ ଥାନା ଅଞ୍ଚଳ ରଘୁରାମପୁର ଗାଁର ରାକେଶ ବିଶ୍ବାଳ(୨୨) ଓ ବିଷନପୁର ଗାଁର ଅର୍ଜୁନ ସାମଲ(୨୨)ଙ୍କୁ ଗିରଫ କରି କୋର୍ଟଚାଲାଣ କରାଯାଇଛି। ସେମାନଙ୍କ ନିକଟରୁ ୪ଟି ବାଇକ୍ (ନଂ. ଓଡି-୧୯-ଇ-୭୯୬୦, ଓଡି-୧୯-ସି-୩୨୬୫, ଓଆର-୦୨-ବିଟି-୪୫୯୩, ଓଡି-୦୨ଏସ-୮୭୧୬) ଏବଂ ଏକ ନମ୍ବର ବିହୀନ ସ୍କୁଟି ଜବତ କରାଯାଇଛି। ଆଉ ଜଣେ ଅଭିଯୁକ୍ତ ଗଦାନନ୍ଦ ସାମଲ ଫେରାର ଥିବା ପୋଲିସ କହିଛି। ଅନୁଗୋଳ ଏସ୍ପିଙ୍କ ନିର୍ଦ୍ଦେଶରେ ଦୀନକୃଷ୍ଣ ମିଶ୍ରଙ୍କ ନେତୃତ୍ୱରେ ସ୍ପେଶାଲ ସ୍କ୍ବାଡ ଏହି ଚଢ଼ାଉ କରାଯାଇଥିଲା।
