ଖପ୍ରାଖୋଲ, ୩୦ା୧(ଡି.ଏନ.ଏ.):ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ନାନ୍ଦୁପଲା ପଞ୍ଚାୟତ ଅନ୍ତର୍ଗତ ମହୁଲପାଲି ରାଜସ୍ବ ଗାଁ। ବ୍ଲକ ସଦର ମହକୁମାଠାରୁ ୨୦ କିମି ଦୂର ଗନ୍ଧମାର୍ଦ୍ଦନ ପାହାଡ଼ ପାଦଦେଶରେ ଅବସ୍ଥିତ ଏହି ଗାଁରେ ୨୦ଆଦିବାସୀ ପରିବାରର ଶହେରୁ ଊର୍ଦ୍ଧ୍ୱ ଲୋକେ ବାସ କରନ୍ତି। କୃଷି ଓ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରି ଗ୍ରାମବାସୀ ଜୀବିକା ନିବାହ କରିଥାନ୍ତି। ମହୁଲପାଲି ଏକ ରାଜସ୍ବ ଗାଁ ହୋଇଥିଲେ ମଧ୍ୟ ଗାଁକୁ ଭଲ ରାସ୍ତାନାହିଁ। ଗାଁ ଚାରିପାଖେ ଘେରି ରହିଛି ଚିରସ୍ରୋତା ଝରଣା। ଭଲ ରାସ୍ତା ନ ଥିବାରୁ ବର୍ଷାଦିନେ ଲୋକଙ୍କ ଦୁଃଖ ଦ୍ବିଗୁଣିତ ହୋଇଥାଏ। ଗାଁରେ ଏକ ସୌରଶକ୍ତି ଜଳ ଯୋଗାଣ ପ୍ରକଳ୍ପ ସ୍ଥାପନ ହୋଇଥିଲ। ହେଲେ ବର୍ଷ ନ ପୁରୁଣୁ ଅଚଳ ହୋଇଗଲା। ଫଳରେ ଗ୍ରାମବାସୀ ଗୋଟିଏ ନଳ କୂଅ ଉପରେ ଭରଷା କରି ଚଳୁଛନ୍ତି । ଅନ୍ୟ ସମୟରେ ଝରଣା ପାଣି ହିଁ ପାନୀୟ ଜଳର ଉତ୍ସ ପାଲଟିଛି। ସେହିପରି ଗାଁରେ ପ୍ରାଥମିକ ବିଦ୍ୟାଳୟ ମଧ୍ୟ ନ ଥିବାରୁ କୁନ ପିଲା୨କି.ମି.ରୁ ଅଧିକ ଦୂର ହେବ କନ୍ଦରାଭଟା ପ୍ରାଥମିକ ବିଦ୍ୟାଳୟକୁ ପଢିବାକୁ ଯାଉଛନ୍ତ। ବର୍ଷା ଦିନେ ନାଳ ଓ ଝରଣାରେ ଅଧିକ ପାଣି ପ୍ରବାହିତ ହେବା ଯୋଗୁ ପାଠପଢା ପ୍ରାୟ ବନ୍ଦ ରହିଥାଏ। ଗାଁ ଲୋକେ ରୋଗରେ ପଡିଲେ କାନ୍ଧରେ ବୋହି ନାଳ ପାର ହେଲା ପରେ ଆମ୍ବୁଲାନ୍ସ କିମ୍ବା ଗାଡ଼ିରେ ଡାକ୍ତରଖାନ ଯାଇଥାନ୍ତି। ୬ବର୍ଷ ତଳେ ତତ୍କାଳୀନ ପାଟଣାଗଡ଼ ଉପ ଜିଲାପାଳ ଶରତ ଚନ୍ଦ୍ର ପଣ୍ଡା ମହୁଲପାଲି ଗାଁକୁ ଯାଇ ସେବାସଂଯୋଗ କାର୍ଯ୍ୟକ୍ରମ ମାଧ୍ୟମରେ ରାସ୍ତା ସହ ମୌଳିକ ସୁବିଧା ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲେ। ହେଲେ ପ୍ରତିଶ୍ରୁତି ପ୍ରତିଶ୍ରୁତିରେ ରହି ଯାଇଥିବା ଗ୍ରାମବାସୀ କହିଛନ୍ତି। ଏ ନେଇ ବିଡିଓ ରଶ୍ମି ରଞ୍ଜନ ରାଉତଙ୍କୁ ପଚାରିବାରୁ ସମସ୍ୟା ବୁଝି ତୁରନ୍ତ ରାସ୍ତା ଓ ପୋଲ ନିର୍ମାଣ କରିବା ଉପରେ ଗୁରୁତ୍ୱ ଦେବୁ। ଏଥିସହ ଅନ୍ୟାନ୍ୟ ମୌଳିକ ସୁବିଧା ପର୍ଯ୍ୟାୟକ୍ରମେ ଯୋଗାଇ ଦିଆଯିବ ବୋଲି କହିଛନ୍ତି।
