ବଅଁରପାଳ, ୨୯।୫ (ଡି.ଏନ୍.ଏ.)- ବଅଁରପାଳ ବ୍ଲକ ଲଙ୍ଗୁଳିଆବେଡ଼ା ଗ୍ରାମ ପାଖରେ ନିର୍ମାଣାଧୀନ ଆଲୁମିନିୟମ ପାର୍କ ପ୍ରକଳ୍ପ କାର୍ଯ୍ୟକୁ ବନ୍ଦ କରିଛନ୍ତି ଗ୍ରାମବାସୀ। ମଙ୍ଗଳବାର ସକାଳୁ ଗ୍ରାମର ଶତାଧିକ ଲୋକ ପ୍ରକଳ୍ପ ସ୍ଥାନରେ ପହଞ୍ଚତ୍ ଗ୍ରାମ ସୀମା ଚିହ୍ନଟ କରିବା ସହିତ ସୀମା ମଧ୍ୟରେ ରହିଥିବା କାର୍ଯ୍ୟ ବନ୍ଦ କରାଇଥିଲେ। ଦାବି ପୂରଣ ନ ହେବା ପର୍ଯ୍ୟନ୍ତ କାର୍ଯ୍ୟ ହୋଇପାରିବ ନାହିଁ ବୋଲି ସେମାନେ ଅଡ଼ି ବସିଥିଲେ।
ଗ୍ରାମବାସୀ ଅଭିଯୋଗ କରିଛନ୍ତି ଯେ, ଆଲୁମିନିୟମ ପ୍ରକଳ୍ପ ପାଇଁ ନାଲ୍କୋ ଇଡିଙ୍କ ପକ୍ଷରୁ ଲଙ୍ଗୁଳିଆବେଡ଼ା ଗ୍ରାମରେ ଜମି ଅଧିଗ୍ରହଣ କରାଯାଇଛି। ଏଥିରେ ବହୁ ଗୋଚର ଜମି ମଧ୍ୟ ରହିଛି। ଏହାକୁ ଗ୍ରାମବାସୀ ରାସ୍ତା, ଖେଳ ପଡ଼ିଆ ଆଦି କାର୍ଯ୍ୟରେ ଲଗାଉଥିଲେ। ଏହି ଜମି ବଦଳରେ ଅନ୍ୟତ୍ର ଜମି ଦେବାକୁ ଦୀର୍ଘ ୨ ବର୍ଷ ହେଲା ଦାବି କରି ଆସୁଛନ୍ତି। ବହୁବାର ଇଡ୍କୋ, ଜିଲା ପ୍ରଶାସନର ଦୃଷ୍ଟି ଆକର୍ଷଣ ମଧ୍ୟ କରିଛନ୍ତି। ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ତାହା କାର୍ଯ୍ୟକାରୀ କରାଯାଉ ନାହିଁ। ତଥାପି ପ୍ରକଳ୍ପ କାର୍ଯ୍ୟ କରାଯାଉଛି। ଏହି ଖବର ଜାଣିବା ପରେ ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ଦେଖା ଦେଇଥିଲା। ଗ୍ରାମରେ ସଭା କରାଯାଇ ଏଭଳି କାର୍ଯ୍ୟକୁ ନିନ୍ଦା କରାଯିବା ସହ କାର୍ଯ୍ୟ ବନ୍ଦ ରଖାଯାଇଛି। ଗ୍ରାମ ସଭାପତି ଅକ୍ଷୟ କୁମାର ବିଶୋଇଙ୍କ ନେତୃତ୍ୱରେ ଗ୍ରାମର ନରେଶ ଦେହୁରୀ, ଶରତ ଚନ୍ଦ୍ର ବିଶ୍ୱାଳ, ଅଜୟ ପ୍ରଧାନ, ଗିରିଶ ବିଶ୍ୱାଳ, ସୁଦର୍ଶନ ପ୍ରଧାନ, ପ୍ରକାଶ ଚନ୍ଦ୍ର ବିଶ୍ୱାଳ, ବ୍ରଜବନ୍ଧୁ ସାହୁ ପ୍ରମୁଖ ଆନ୍ଦୋଳନ ଚଳାଇଛନ୍ତି।
