ଜଟଣୀ,୨୫।୩(ଡି.ଏନ୍.ଏ.): କରୋନା(କୋଭିଡ୍-୧୯) ଭାଇରସ୍ ମୁକାବିଲା ପାଇଁ ସାମାଜିକ ଦୂରତ୍ୱ ରଖିବା ଉପରେ ଗୁରୁତ୍ୱ ଦିଆଯାଇଛି। ତେବେ ଜଟଣୀର କେତେକ ବଜାରରେ ବୁଧବାର ସକାଳେ ପ୍ରବଳ ଗହଳି ପରିଲକ୍ଷିତ ହୋଇଥିଲା। ସ୍ଥାନୀୟ ସୀତାରାମ ଛକ, ବଡ଼ବଜାର, ରେଲ୍ୱେ ମାର୍କେଟ, ଦୁର୍ଗା ମାର୍କେଟରେ ସକାଳୁ ମାଳ ମାଳ ବାଇକ୍ ସହିତ ବିଭିନ୍ନ ସାମଗ୍ରୀ କିଣିବାକୁ ଲୋକଙ୍କ ଗହଳି ଦେଖିବାକୁ ମିଳିଥିଲା। ଏହାକୁ ହଟାଇବା ପାଇଁ ପୋଲିସ ଓ ପ୍ରଶାସନକୁ ନାକେଦମ୍ ହେବାକୁ ପଡ଼ିଥିଲା। ସ୍ଥିତି ପରଖିବା ପାଇଁ ଜିଲାପାଳ ସୀତାଂଶୁ ରାଉତ ମଙ୍ଗଳବାର ଜଟଣୀ ଆସିଥିବା ବେଳେ ଏପରି ଗହଳି ଦେଖି ବିରକ୍ତି ପ୍ରକାଶ କରିଥିଲେ। ସେଥିପାଇଁ ପନିପରିବା, ଫଳ, ମାଛ, ମାଂସ, ଅଣ୍ଡା ଆଦି ଉଠା ଦୋକାନକୁ ସ୍ଥାନୀୟ ନୂଆ ବସ୍ଷ୍ଟାଣ୍ଡ ପରିସରକୁ ସ୍ଥାନାନ୍ତର ପାଇଁ ନିର୍ଦ୍ଦେଶ ଦେଇଥିଲେ। ବୁଧବାର କେହି ପ୍ରଶାସନର ନିର୍ଦ୍ଦେଶକୁ ନ ମାନି ପୂର୍ବ ସ୍ଥାନରେ ପସରା ମେଲାଇ ଗହଳି ଜମାଇଥିଲେ। ପୋଲିସ ଓ ସ୍ଥାନୀୟ ପ୍ରଶାସନିକ ଅଧିକାରୀ ପହଞ୍ଚି କଡ଼ା ଆଭିମୁଖ୍ୟ ଗ୍ରହଣ କରି ଉଠା ଦୋକାନୀଙ୍କୁ ଉଠାଇବା ସହ ଗହଳି କମାଇଥିବା ଜଣାପଡ଼ିଛି।
