ନୂଆଦିଲ୍ଲୀ: ବିଶ୍ୱର ବିଭିନ୍ନ ସହରରେ ଏବେ ଲକ୍ଡାଉନ୍ ଚାଲିଥିବାରୁ ରାଜରାସ୍ତା ଉପରେ ବେଶ୍ ଆରାମରେ ବୁଲୁଛନ୍ତି ବିଭିନ୍ନ ଜୀବ। ରାସ୍ତା ଉପରେ ସେମାନଙ୍କୁ ହଇରାଣ କରିବା ପାଇଁ କେହି ରହୁ ନାହାନ୍ତି। କିନ୍ତୁ ଅନେକ ସ୍ଥାନରେ ପ୍ରାଣୀମାନେ ନିଜର ଖାଦ୍ୟ ପାଇଁ ଲୋକଙ୍କ ଉପରେ ନିର୍ଭର କରୁଛନ୍ତି। ଏଥିପାଇଁ ହିଁ କେତେକ ସ୍ଥାନରେ ବିଭିନ୍ନ ପ୍ରକାରର ଜୀବଜନ୍ତୁଙ୍କୁ ବହୁ ଅସୁବିଧାର ସାମ୍ନା କରିବାକୁ ପଡୁଛି। ଏଭଳି ଜୀବଜନ୍ତୁଙ୍କୁ କିଛି ଅଞ୍ଚଳରେ ପରିବେଶବିତ୍ ତଥା ସାମାଜିକ କାର୍ଯ୍ୟକର୍ତ୍ତାମାନେ ଖାଦ୍ୟ ଦେଉଛନ୍ତି। ତେବେ ଏଭଳି ଜୀବମାନଙ୍କୁ ଖାଦ୍ୟ ଦେବା ସହ ଖୁସିରେ ସମୟ କଟାଇବା ପାଇଁ ଆମେରିକାର ଡେଗ୍ରାଇଟ୍ରେ ରହୁଥିବା ଜେମ୍ସ ରିଲେଣ୍ଡ ନିଜ ଘର ବାହାରେ ଏକ ଛୋଟ ରେଷ୍ଟୁରାଣ୍ଟ ତିଆରି କରିଛନ୍ତି। ଏହି ରେଷ୍ଟୁରାଣ୍ଟରେ ସେ ସୁନ୍ଦରଭାବେ ଫୁଡ୍ ପାର୍କ, ପିକ୍ନିକ୍ ଟେବୁଲ୍ ସହିତ ବିଭିନ୍ନ ପ୍ରକାର ଖାଦ୍ୟ ଝୁଡ଼ି ବି ରଖିଛନ୍ତି। ଜୀବଜନ୍ତୁଙ୍କ ପାଇଁ ଖାଦ୍ୟ ସହିତ ପାଣି ପିଇବା ପାଇଁ ବି ଏଠାରେ ସୁବିଧା ରହିଛି। ଏହି ରେଷ୍ଟୁରାଣ୍ଟରେ କେତେକ ଜୀବଜନ୍ତୁଙ୍କ ପଥର ମୂର୍ତ୍ତି କରାଯାଇ ରେଷ୍ଟୁରାଣ୍ଟକୁ ଆକର୍ଷଣୀୟ କରାଯାଇଛି। ତେବେ ଲକ୍ଡାଉନ୍ ସମୟରେ କିଛି ଲୋକଙ୍କ ଏଭଳି ଭିନ୍ନ ଚିନ୍ତାଧାର ଓ କାମ ନିଶ୍ଚିତଭାବେ ପରିବେଶ ପାଇଁ ଶୁଭଙ୍କର ହୋଇପାରିବ।
