ମୁମ୍ବାଇ, ୮।୪ (ପି.ଟି.): କୋଭିଡ୍-୧୯ ସଂକ୍ରମଣ କାରଣରୁ ଦେଶ ତଥା ବିଶ୍ୱରେ ପ୍ରାୟ ସବୁ କ୍ରୀଡ଼ା ଇଭେଣ୍ଟକୁ ବାତିଲ୍ କିମ୍ବା ସ୍ଥଗିତ ରଖାଯାଇଥିବା ବେଳେ ପୂର୍ବତନ ଭାରତୀୟ ଅଫ୍ ସ୍ପିନର ହରଭଜନ ସିଂ କିନ୍ତୁ ଭିନ୍ନ ମତ ପୋଷଣ କରିଛନ୍ତି। ଇଣ୍ଡିଆନ ପ୍ରିମିୟର ଲିଗ (ଆଇପିଏଲ) ଆୟୋଜନ ସପକ୍ଷରେ ସେ ମତ ଦେଇଛନ୍ତି। ଯଦି ଦର୍ଶକଙ୍କ ଅନୁପସ୍ଥିତିରେ ଆଇପିଏଲ୍ ଫାଙ୍କା ଷ୍ଟାଡିୟମରେ ଖେଳାଯାଏ ତେବେ କୌଣସି ସମସ୍ୟା ନାହିଁ। ଅର୍ଥାତ ସେ ଫାଙ୍କା ଷ୍ଟାଡିୟମରେ ଆଇପିଏଲ ଆୟୋଜନ କରିବାକୁ କହିଛନ୍ତି। କୋଭିଡ୍-୧୯ ନିୟନ୍ତ୍ରଣକୁ ଆସିଛି। ପୁଣି କେତେକ ଆଇପିଏଲ୍କୁ ନେଇ ଗୁଜୁରାଣ ମେଣ୍ଟାଉଥିବାରୁ ଏହି ଟୁର୍ନାମେଣ୍ଟ ଆୟୋଜନ ହେବାର ଆବଶ୍ୟକତା ରହିଛି ବୋଲି ସେ ମତ ଦେଇଛନ୍ତି।
କ୍ରିକେଟରେ ଦର୍ଶକ ନିଶ୍ଚିତ ଭାବେ ଗୁରୁତ୍ୱପୂର୍ଣ୍ଣ। କିନ୍ତୁ ଯଦି ପରିସ୍ଥିତି ଅଲଗା ହୁଏ ତା’ହେଲେ ବିନା ଦର୍ଶକରେ ଖେଳିବାରେ କୌଣସି ଅସୁବିଧା ନାହିଁ। ତେବେ ସବୁ ଦର୍ଶକ ଟିଭିରେ ଆଇପିଏଲ୍ ମ୍ୟାଚ୍ ଦେଖିପାରିବେ। ହରଭଜନ ଚେନ୍ନାଇ ସୁପର କିଙ୍ଗ୍ସ ତରଫରୁ ଖେଳୁଛନ୍ତି। ତେବେ ଖେଳାଳିଙ୍କ ସ୍ବାସ୍ଥ୍ୟ ଓ ନିରାପତ୍ତାକୁ ଅଗ୍ରାଧିକାର ଦିଆଯିବା ଉପରେ ସେ ଗୁରୁତ୍ୱ ଦେଇଛନ୍ତି। ମ୍ୟାଚ୍ ଭେନ୍ୟୁ, ଟିମ୍ ହୋଟେଲ, ଫ୍ଲାଇଟକୁ ଠିକ୍ ଭାବେ ସାନିଟାଇଜ କରିବାର ଆବଶ୍ୟକତା ରହିଛି। ସବୁକିଛି ଠିକ୍ଠାକ କରିବା ପରେ ଯାଇ ଏ ବିଷୟରେ ଚିନ୍ତା କରିବା ଠିକ୍ ହେବ ବୋଲି ହରଭଜନ କହିଛନ୍ତି।
କରୋନା ଭାଇରସ ସଂକ୍ରମଣ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆଇପିଏଲ୍କୁ ଏପ୍ରିଲ-୧୫ ପର୍ଯ୍ୟନ୍ତ ସ୍ଥଗିତ ରଖିଛି। ତେବେ ଦେଶରେ ଚାଲିଥିବା ଲକ୍ଡାଉନ ଓ ତତ୍ ସଂକ୍ରାନ୍ତ ପରିସ୍ଥିତି ଯୋଗୁ ଆଇପିଏଲ୍ ଆୟୋଜନ ନେଇ ଆଶଙ୍କା ପ୍ରକାଶ ପାଇଛି। ତେବେ ଫିଟ୍ନେସ ବଜାୟ ଉପରେ ହରଭଜନ ଏବେ ଗୁରୁତ୍ୱ ଦେଉଛନ୍ତି। ଆଇପିଏଲ୍ ଶୀଘ୍ର ଆରମ୍ଭ ହେବ ବୋଲି ସେ ଆଶାପ୍ରକାଶ କରିଛନ୍ତି। ତେବେ ସେପର୍ଯ୍ୟନ୍ତ ନିଜକୁ ଫିଟ୍ ରଖିବା ପାଇଁ ପ୍ରୟାସ ଜାରି ରଖିବି ବୋଲି ୧୦୩ଟି ଟେଷ୍ଟ ଖେଳିଥିବା ୩୯ ବର୍ଷୀୟ ହରଭଜନ କହିଛନ୍ତି।
