ଚିତ୍ରଡ଼ା,୩୦।୪(ଡି.ଏନ୍.ଏ.)- ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅଧୀନ ନୂଆଝାଳିଆ ପଞ୍ଚାୟତ କାନ୍ଦଣା ଗ୍ରାମର ଶିକ୍ଷକ ମେଘନାଦ ସିଙ୍କ ବଗିଚାରେ ବିରଳ ପାରିଜାତ ଫୁଲ ଫୁଟିଛି। ଏହାକୁ ଦେଖିବା ପାଇଁ ସେଠାରେ ସ୍ଥାନୀୟ ଲୋକଙ୍କ ଭିଡ଼ ଜମୁଛି। ମେଘନାଦ ବର୍ତ୍ତମାନ ଉଫାଲ ଗଡ଼ିଆ ଉପ୍ରା ବିଦ୍ୟାଳୟରେ ପ୍ରଧାନଶିକ୍ଷକ ଭାବେ କାର୍ଯ୍ୟରତ ଅଛନ୍ତି। ବିଭିନ୍ନ ପ୍ରକାର ଫୁଲ ଏବଂ ଫଳ ଗଛ ଲଗାଇବାରେ ସେ ଖୁସି ଅନୁଭବ କରିନ୍ତି। ସେ ତାଙ୍କ ବଗିଚାରେ ପାରିଜାତ ସମେତ ଲିଚୁ, ରୁଦ୍ରାକ୍ଷ, ସପେତା, ଓଉ, ବଉଳ, ନାଗେଶ୍ୱର, ଅଶୋକ, କାମିନୀ, ଚମ୍ପା, ତେଜପତ୍ର, ସ୍ଥଳପଦ୍ମ, ରବର, ଅପରାଜିତା ଆଦି ବିଭିନ୍ନ ଗଛ ଲଗାଇଛନ୍ତି। ମଙ୍ଗଳବାର ଭୋର ସମୟରେ ପାରିଜାତ ଫୁଲଟି ଫୁଟି ଥିବା ଦେଖିବାକୁ ମିଳିଥିଲା। ମେଘନାଦ ସେହି ଗଛଟିକୁ ପଶ୍ଚିମବଙ୍ଗର କାଁଥିରୁ ଗତ ୫ ବର୍ଷ ତଳେ ଆଣିଥିଲେ। ଏହି ଫୁଲଟିକୁ ଚିତ୍ରଡା ମହାବିଦ୍ୟାଳୟର ଉଦ୍ଭିଦ ବିଜ୍ଞାନ ବିଭାଗ ଅଧ୍ୟାପକ ଅନୁପ କୁମାର ମହାକୁଡ଼ଙ୍କୁ ଦେଖାଇବାରୁ ଏହା ପାରିଜାତ ବୋଲି ସେ ପ୍ରକାଶ କରିଛନ୍ତି।
