ବଲାଙ୍ଗୀର ଅଫିସ, ୨୯ା୩: କରୋନା ସଂକ୍ରମଣ ରୋକିବା ନେଇ ଦେଶବ୍ୟାପୀ ଲକ୍ ଡାଉନ୍ ସମୟରେ ସବୁଠୁ ବେଶୀ ଅସୁବିଧାରେ ପଡିଛନ୍ତି ଦାଦନ ଶ୍ରମିକ । ରାଜ୍ୟ ବାହାରେ ବିଭିନ୍ନ ସ୍ଥାନରେ ଫସି ରହିଥିବା ଶତାଧିକ ଦାଦନ ଶ୍ରମିକ ଏବେ ଉଦ୍ଧାର ପାଇଁ ଆର୍ତ୍ତ ଚିତ୍କାର କରୁଛନ୍ତି । ବଲାଙ୍ଗୀର ଜିଲାର ୭୮ରୁ ଉର୍ଦ୍ଧ୍ୱ ଦାଦନ ଶ୍ରମିକ ତାମିଲନାଡୁର ବିଭିନ୍ନ ସ୍ଥାନରେ ଅଟକି ରହି ଅସୁବିଧା ଭୋଗୁଥିବା ମୋବାଇଲ ଭିଡିଓରୁ ଜଣାପଡିଛି । ସେମାନେ ଉଦ୍ଧାର କରିବା ପାଇଁ ଆକୁଳ ନିବେଦନ କରୁଛନ୍ତି । ଖାଦ୍ୟ ସାମଗ୍ରୀ ସରି ଯାଇଥିବାରୁ ସେମାନେ କରୋନା ସଂକ୍ରମଣ ପୂର୍ବରୁ ଭୋକରେ ମରିଯିବେ ବୋଲି କହୁଥିବା ଶୁଣାଯାଇଛି । ଗୋଟିଏ ଭିଡିଓରେ ବଲାଙ୍ଗୀର ଜିଲା ପୁଇଁତଲା ବ୍ଳକ ଅଧିନ ଲୁକାପଡା ଗ୍ରାମର ୧୫, ଆଗଲପୁର ବ୍ଳକ୍ ନୁନିଆପାଲିର ୧୦, ବଲାଙ୍ଗୀର ସଦର ବ୍ଳକ ଅନ୍ତର୍ଗତ ଚନ୍ଦନଭାଟିର ୧୫ ଏବଂ ସଇଁତଲା ବ୍ଳକ ଟିକ୍ରାପଡା ଗ୍ରାମର ୪ ଜଣ ଏହିପରି ସମୁଦାୟ ୪୪ ଜଣ ଦାଦନ ଶ୍ରମିକ ତାମିଳନାଡୁର ତ୍ରିପୁର ଜିଲା କାଦାମ୍ପାଲିୟମ୍ ଗ୍ରାମରେ ଫସି ରହିଥିବା ଜଣାଇଛନ୍ତି । ସେମାନଙ୍କ ପାଖରେ ଖାଇବା ପାଇଁ କିଛି ନଥିବାରୁ ସେମାନେ ଅସୁବିଧା ଭୋଗୁଥିବା କହିଛନ୍ତି । ଏଭଳି ସ୍ଥିତିରେ ସେମାନେ ପ୍ରଧାନମନ୍ତ୍ରୀ ଓ ଓଡିଶାର ମୁଖ୍ୟମନ୍ତ୍ରୀଙ୍କୁ ଉଦ୍ଧାର ପାଇଁ ଆକୁଳ ନିବେଦନ କରିଛନ୍ତି । ଠିକ୍ ସେହିପରି ତାମିଲନାଡୁର ଗଣପଥିପଲୟମ୍ ରୋଡ, ଭିରାପୋଣ୍ଡିଠାରେ ୩୪ ଜଣ ଦାଦନ ଶ୍ରମିକ ଫସିଥିବା ଜଣାପଡିଛି । ଏହି ୩୪ ଜଣଙ୍କ ମଧ୍ୟରେ ବଲାଙ୍ଗୀର, ବୌଦ୍ଧ, ସୁବର୍ଣ୍ଣପୁର ଜିଲାର ଶ୍ରମିକ ଥିବା ଜଣାପଡିଛି । ଏହି ଶ୍ରମିକଙ୍କୁ ଉଦ୍ଧାର ପାଇଁ ରାଜ୍ୟ ଶ୍ରମ କଲ୍ୟାଣ ବୋର୍ଡର ସଦସ୍ୟ ଲଳିତ କୁମାର ନାୟକ ରାଜ୍ୟ ସରକାର ଓ ବଲାଙ୍ଗୀର ଜିଲାପାଳଙ୍କୁ ନିବେଦନ କରିଛନ୍ତି ।
