କୋରାପୁଟ,୨୦।୯(ସ୍ବ.ପ୍ର.): କୋରାପୁଟ ଶହୀଦ ଲକ୍ଷ୍ମଣ ନାୟକ ମେଡିକାଲ କଲେଜ ଓ ହସ୍ପିଟାଲରେ ନିୟୋଜିତ ସୁରକ୍ଷାକର୍ମୀ, ଝାଡ଼ୁଦାର ଓ ସହାୟକମାନେ ସେମାନଙ୍କ ବକେୟା ଦରମା ପ୍ରଦାନ ଦାବି କରି ଶୁକ୍ରବାର ସକାଳୁ କାର୍ଯ୍ୟବନ୍ଦ ଆନ୍ଦୋଳନ କରିଛନ୍ତି। ଫଳରେ ମେଡିକାଲରେ ପରିମଳ ବ୍ୟବସ୍ଥା ବିଗିଡ଼ିଯାଇଛି। ଗତ ଫେବୃୟାରୀରୁ ଆଜିପର୍ଯ୍ୟନ୍ତ ସେମାନଙ୍କୁ ଦରମା ପ୍ରଦାନ କରାଯାଇ ନ ଥିବାରୁ ଏହି ଆନ୍ଦୋଳନ କରାଯାଇଛି। କର୍ତ୍ତୃପକ୍ଷ ସମାଧାନ ନିମନ୍ତେ ଧାରଣାସ୍ଥଳକୁ ଆସିଥିବାବେଳେ ମଧ୍ୟ ଆଲୋଚନା ବିଫଳ ହୋଇଛି। ଖବର ଲେଖାହେବା ପର୍ଯ୍ୟନ୍ତ ଧାରଣା ଜାରି ରହିଥିବା ଜଣାଯାଇଛି। ଏଥିପୁର୍ବରୁ ଉକ୍ତ କର୍ମଚାରୀମାନେ ବହୁବାର ଆନ୍ଦୋଳନ କରିଥିବାବେଳେ ମେଡିକାଲ କର୍ତ୍ତୃପକ୍ଷଙ୍କ ସେମାନଙ୍କୁ ବାରମ୍ବାର ପ୍ରତିଶ୍ରୁତି ଦେଇ ଆସୁଛନ୍ତି। ନାମକୁମାତ୍ର ଗୋଟିଏ ମାସର ଦରମା ଦେଇ କର୍ମଚାରୀମାନଙ୍କୁ ଭୁଆଁ ବୁଲାଉଥିବା ଆନ୍ଦୋଳନକାରୀମାନେ କହିଛନ୍ତି। ସୁରକ୍ଷାକର୍ମୀ, ଝାଡୁଦାର ଓ ସହାୟିକାମାନଙ୍କ ଧାରଣାକୁ ସମର୍ଥନ କରି ମେଡିକାଲ ସମ୍ମୁଖରେ କଂଗ୍ରେସର ଜିଲା କାର୍ଯ୍ୟକାରୀ ସଭାପତି ରୂପକ କୁମାର ତୁରକ, ପୂର୍ବତନ ପୌରାଧ୍ୟକ୍ଷ ଭଗବାନ ବାହିନୀପତି, ଜିଲା ଏସ୍ସି ସେଲର ସଭାପତି ରମେଶ ବାଖ୍ୟାଙ୍କ ସମେତ ଜିଲା ବିକାଶ ମଞ୍ଚର ଶେଷାଦ୍ରୀ ପାଣିଗ୍ରାହୀ ପ୍ରମୁଖ ଏହି ଧାରଣାରେ ବସିଥିବା ଦେଖାଯାଇଛି।
