ଚମ୍ପୁଆ,୯ା୬ (ଡି.ଏନ.ଏ.)- ଚଳିତ ବର୍ଷ ବଜ୍ରପାତ ଯୋଗୁ ନାହିଁ ନ ଥିବା କ୍ଷୟକ୍ଷତି ଘଟିବାରେ ଲାଗିଛି। କେତେବେଳେ ଜନଜୀବନ ନଷ୍ଟ ହେଉଛି ତ କେତେବେଳେ ଗୃହ ପାଳିତ ପଶୁଙ୍କ ଜୀବନ ଚାଲିଯାଉଛି। ନିୟମିତ ବ୍ୟବଧାନରେ ଅପରାହ୍ନରେ ବର୍ଷା ସହ ଏହି ବଜ୍ରପାତ ଲୋକଙ୍କୁ ଆତଙ୍କିତ କରିରଖିଛି। ସେହିପରି ଗତ ସୋମବାର ଅପରାହ୍ନରେ ଚମ୍ପୁଆ ନିକଟବର୍ତ୍ତୀ ଝାଡ଼ଖଣ୍ଡ ସୀମାରେ ପ୍ରସିଦ୍ଧ ରାମତୀର୍ଥଠାରେ ରାମେଶ୍ୱର ମହାଦେବ ମନ୍ଦିର ଏହି ବଜ୍ରପାତରେ କ୍ଷତିଗ୍ରସ୍ତ ହୋଇଛି। ସ୍ଥାନୀୟ ଲୋକଙ୍କ କହିବା ଅନୁଯାୟୀ ଗତ ସୋମବାର ଅପରାହ୍ନରେ ପ୍ରଚଣ୍ଡ ଶବ୍ଦ କରି ମନ୍ଦିରରେ ବଜ୍ରପାତ ଘଟିଥିଲା। ଏହି ବଜ୍ରପାତ ଫଳରେ ମୁଖ୍ୟ ମନ୍ଦିରର ଦଧିନଉତି କ୍ଷତିଗ୍ରସ୍ତ ହୋଇଥିବା ବେଳେ ଜଗନ୍ନାଥ ମନ୍ଦିର ମଧ୍ୟ କ୍ଷତିଗ୍ରସ୍ତ ହୋଇଛି। ଖବର ପାଇ ମନ୍ଦିର କମିଟି ଘଟଣାସ୍ଥଳକୁ ଯାଇ ତଦାରଖ କରିଛନ୍ତି। ଏଥିରେ କାହାର ଜୀବନହାନି ହୋଇନାହିଁ। ଏ ନେଇ ମନ୍ଦିର କମିଟି ଅଧ୍ୟକ୍ଷ ସନତ ପ୍ରଧାନ କହିଛନ୍ତି ଯେ, ମନ୍ଦିରର କ୍ଷୟକ୍ଷତି ସମ୍ବନ୍ଧରେ ପ୍ରଶାସନକୁ ସୂଚନା ଦେଇସାରିଛୁ। ପ୍ରଶାସନ ଆସି ଏହାର ତଦାରଖ କରିବା ପରେ ମନ୍ଦିର କମିଟି ପକ୍ଷରୁ ବୈଠକ ଡକାଯିବ ଏବଂ ମନ୍ଦିରରେ ବିଜୁଳି ପ୍ରତିରୋଧକ ଲଗାଇବା ପାଇଁ ବ୍ୟବସ୍ଥା କରାଯିବ ।
