ବଞ୍ଜା ଲୁକା, ୧୫।୯(ପି.ଟି)- ବୋସନିଆ ଓ ହର୍ଜଗୋଭିନାର ବଞ୍ଜା ଲୁକାଠାରେ ଚାଲିଥିବା ଚ୍ୟାଲେଞ୍ଜର ଟେନିସ ଟୁର୍ନାମେଣ୍ଟରେ ଭାରତୀୟ ଯୁବ ଖେଳାଳି ସୁମିତ ନାଗାଲ ପୁରୁଷ ସିଙ୍ଗଲ୍ସ ଫାଇନାଲରେ ପ୍ରବେଶ କରିଛନ୍ତି। ଶନିବାର ଅନୁଷ୍ଠିତ ସେମିଫାଇନାଲ ମ୍ୟାଚ୍ରେ ସେ ସ୍ଲୋଭାକିଆର ଫିଲିପ୍ ହୋରାନ୍ସ୍କିଙ୍କୁ ହରାଇ ଅଗ୍ରଗତି କରିଛନ୍ତି। ବିଶ୍ୱ ର଼୍ୟାଙ୍କିଙ୍ଗ୍ରେ କ୍ୟାରିୟର ଶ୍ରେଷ୍ଠ ୧୭୪ତମ ସ୍ଥାନରେ ଥିବା ନାଗାଲ ପଞ୍ଚମ ସିଡ୍ ହୋରାନ୍ସ୍କିଙ୍କୁ ୭-୬, ୬-୨ ସେଟରେ ହରାଇ ଫାଇନାଲକୁ ଉଠିଛନ୍ତି। ବିଜୟୀ ହେବାପାଇଁ ନାଗାଲଙ୍କୁ ଏକ ଘଣ୍ଟା ୪୪ ମିନିଟ ସମୟ ଆବଶ୍ୟକ ହୋଇଥିଲା। ଟାଇଟଲ ପାଇଁ ସେ ଫାଇନାଲରେ ନେରଦଲାଣ୍ଡର ଟାଲୋନ ଗ୍ରିକ୍ସପୁଅରଙ୍କୁ ଭେଟିବେ।
ଗତମାସ ନାଗାଲ ୟୁଏସ୍ ଓପନ୍ରେ କ୍ୟାରିୟରରେ ପ୍ରଥମଥର ପାଇଁ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଖେଳିବାର ସୁଯୋଗ ପାଇଥିଲେ। ହରିୟାଣାର ୨୨ ବର୍ଷୀୟ ନାଗାଲ କ୍ୱାଲିଫାଇଙ୍ଗ ରାଉଣ୍ଡରେ ଦମ୍ଦାର ପ୍ରଦର୍ଶନ କରି ମୁଖ୍ୟ ଡ୍ରରେ ସାମିଲ ହୋଇଥିଲେ। ସେ ପ୍ରଥମ ରାଉଣ୍ଡରେ ସୁଇଜରଲାଣ୍ଡର ଅଭିଜ୍ଞ ଖେଳାଳି ରୋଜର ଫେଡରରଙ୍କୁ ପ୍ରଥମ ସେଟ୍ରେ ହରାଇ ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ତେବେ ପରେ ଫେଡରର ପ୍ରତ୍ୟାବର୍ତ୍ତନ କରିଥିଲେ ଓ ନାଗାଲ ୬-୪, ୧-୬, ୨-୬, ୪-୬ ସେଟରେ ପରାସ୍ତ ହୋଇଥିଲେ। ଅନ୍ୟପଟେ ସାଙ୍ଘାଇରେ ଚାଲିଥିବା ଚ୍ୟାଲେଞ୍ଜର ଟୁର୍ନାମେଣ୍ଟରେ ଭାରତର ଅନ୍ୟତମ ଖେଳାଳି ପ୍ରଜନେଶ ଗୁଣେଶ୍ୱରନ ସେମିଫାଇନାଲରେ ପରାସ୍ତ ହୋଇ ବିଦାୟ ନେଇଛନ୍ତି। ସେ ଜାପାନର ୟାସୁଟାକା ଉଚିୟାମାଙ୍କଠାରୁ ୬-୭, ୪-୬ ସେଟରେ ପରାସ୍ତ ହୋଇ ବିଦାୟ ନେଇଛନ୍ତି।
