ବଡୋଦରା, ୨।୮: ଗୁଜରାଟର ବଡୋଦରାରେ ବନ୍ୟା ପରିସ୍ଥିତି ସଙ୍ଗୀନ ହୋଇପଡିଛି। ବନ୍ୟା ପାଣି ଘରେ ପଶିଯିବାରୁ ଲୋକେ ନାହିଁ ନ ଥିବା ଅସୁବିଧାର ସାମ୍ନା କରୁଛନ୍ତି। ଗୁରୁବାର ବନ୍ୟାଜଳରେ ଭାସିଯାଉଥିବା ଜଣେ ଏକ ମାସର ଶିଶକୁ ‘ବସୁଦେବ’ଙ୍କ ଭଳି ଉଦ୍ଧାର କରିଛନ୍ତି ପୋଲିସ ସବ-ଇନ୍ସପେକ୍ଟର ଗୋବିନ୍ଦ ଚାଭଡ଼ା। ଶିଶୁଟିକୁ ଏକ ପ୍ଲାଷ୍ଟିକ୍ କୁଣ୍ଡରେ ପୁରାଇ ମୁଣ୍ଡରେ ଥୋଇ ଛାତିଏ ପାଣିରେ ପଶି ସୁରକ୍ଷିତ ଯାଗାକୁ ଆସୁଥିବାର ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି। ଏହି ଫଟୋଟି ଭଗବାନ କୃଷ୍ଣଙ୍କ କଥ ମନେପକେଇ ଦେଇଛି। ଯେମିତି ବସୁଦେବ କୃଷ୍ଣଙ୍କୁ ଟୋକେଇରେ ପୁରାଇ ଯମୁନା ନଦୀ ପାର ହୋଇଆସିଥିଲେ, ସେମିତିି ଗୋବିନ୍ଦ ବସୁଦେବଙ୍କ ଭଳି ଉଦ୍ଧାର କରିଥିଲେ। ଗୋବିନ୍ଦ ବନ୍ୟାରୁ ୭୦ଜଣଙ୍କୁ ଉଦ୍ଧାର କରିଥିବା ସୂଚନା ମିଳିଛି।
