ଭୁବନେଶ୍ୱର, ୯।୨(କ୍ରୀଡ଼ା ପ୍ରତିନିଧି)-
ଚଳିତ ଏଫଆଇଏଚ୍ ହକି ପ୍ରୋ ଲିଗ୍ରେ ଶନିବାର ଭାରତ ଓ ବେଲଜିୟମ ମଧ୍ୟରେ ମ୍ୟାଚ ଅନୁଷ୍ଠିତ ହୋଇଛି। ଥଣ୍ଡା କୋହଲା ପାଗ ଏବଂ ଝିପିଝିପି ବର୍ଷା ସତ୍ତ୍ୱେ ହକି ପ୍ରତି ସମର୍ଥନ ଜଣାଇଛନ୍ତି ଓଡ଼ିଶା ଦର୍ଶକ। ପ୍ରତିକୂଳ ପାଗ ଯୋଗୁ ଷ୍ଟାଡିୟମ ଭରି ନ ଥିଲେ ହେଁ ଛତା ଧରି ନିଜ ପ୍ରିୟ ଦର୍ଶକୁ ସମର୍ଥନ ଜଣାଇବା ପାଇଁ ବେଶ୍ କିଛି ଦର୍ଶକ ଷ୍ଟାଡିୟମରେ ଉପସ୍ଥିତ ଥିଲେ। ଦର୍ଶକଙ୍କ ଉପସ୍ଥିତିରେ ଉତ୍ସାହୀ ପ୍ରଦର୍ଶନ ମଧ୍ୟ କରିଥିଲା ଭାରତ। ସମ୍ମୁଖରେ ବିଶ୍ୱ ଚାମ୍ପିୟନ ଏବଂ ବିଶ୍ୱର ନମ୍ବରଓ୍ବାନ ଦଳ ଥିଲେ ହେଁ ଚାପରେ ନ ରହି କଡ଼ା ଟକ୍କର ଦେବା ସହ ୨-୧ ଗୋଲରେ ବିଜୟ ହାସଲ କରିଥିଲା ଘରୋଇ ଦଳ। ଭାରତ ପକ୍ଷରୁ ୨ୟ ମିନିଟରେ ମନଦୀପ ସିଂ ଓ ୪୬ତମ ମିନିଟରେ ରମଣଦୀପ ସିଂ ଗୋଲ ଦେଇଥିବାବେଳେ ବେଲଜିୟମ ପକ୍ଷରୁ ଗାଥିର ବୋକାର୍ଡ ଗୋଟିଏ ଗୋଲ ପରିଶୋଧ କରିଥିଲେ। ପୁରା ମ୍ୟାଚରେ ବେଲଜିୟମ ଦକ୍ଷତା ଅନୁସାରେ ପ୍ରଭାବୀ ପ୍ରଦର୍ଶନ କରିଥିଲେ ହେଁ ଘରୋଇ ଗ୍ରାଉଣ୍ଡରେ ବିଶ୍ୱ ଚାମ୍ପିୟନକୁ ରୋକିବାରେ ସକ୍ଷମ ହୋଇଥିଲା ମନପ୍ରୀତ ସିଂ ବାହିନୀ।
ରାଜ୍ଙ୍କ କ୍ୟାରିୟର ଆରମ୍ଭ
ଭାରତୀୟ ହକି ଦଳର ଯୁବ ପ୍ରତିଭା ମିଡ୍ଫିଲ୍ଡର ରାଜ କୁମାର ପାଲଙ୍କ ଅନ୍ତର୍ଜାତୀୟ କ୍ୟାରିୟର ଶନିବାର ଆରମ୍ଭ ହୋଇଛି। ବେଲଜିୟମ ପରି ଶକ୍ତିଶାଳୀ ଦଳ ବିପକ୍ଷରେ କ୍ୟାରିୟର ଆରମ୍ଭ କରିଥିଲେ ହେଁ ନିଜର ପ୍ରଥମ ମ୍ୟାଚ ସ୍ମୃତି ମଧୁର ହୋଇଛି। କାରଣ ଏହି ମ୍ୟାଚରେ ବେଲଜିୟମକୁ ପରାସ୍ତ କରିଛି ଭାରତ। ଭାରତୀୟ ଯୁବ ଦଳର ସଦସ୍ୟଭାବେ ସୁଲତାନ ଜୋହର କପ୍ରେ ନିଜ ପ୍ରତିଭା ଦେଖାଇ ସିନିୟର ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିଲେ ରାଜ। ଟୋକିଓ ଅଲିମ୍ପିକ୍ସ ପାଇଁ ଦଳ ଗଠନ ଲକ୍ଷ୍ୟରେ ଥିବା କୋଚ୍ ଗ୍ରାହାମ ରିଡ୍ ମଧ୍ୟ ରାଜଙ୍କୁ ବେଲଜିୟମ ବିପକ୍ଷରେ ଷ୍ଟାର୍ଟିଂ-୧୧ରେ ଖେଳାଇଥିଲେ। ଏଥିରେ ଉତ୍ସାହିତ ରାଜ ମଧ୍ୟ ଭଲ ଖେଳିଥିଲେ। ମାଲେସିଆରେ ଅନୁଷ୍ଠିତ ସୁଲତାନ ଜୋହର କପ୍ରେ ରୌପ୍ୟ ପଦକ ବିଜୟୀ ଭାରତୀୟ ଦଳର ସଦସ୍ୟ ଥିଲେ ରାଜ। ତାଙ୍କ ସ୍ପିଡ୍ ଓ ଦକ୍ଷତାରେ ପ୍ରଭାବିତ ହୋଇ ପୁରସ୍କାର ସ୍ବରୂପ ରିଡ୍ ରାଜଙ୍କୁ ସିନିୟରରେ ଖେଳାଇବାକୁ ନିଷ୍ପତ୍ତି ନେଇଥିଲେ।
