ମୁମ୍ବାଇ: ବଲିଉଡ୍ରେ ଦକ୍ଷିଣ ଭାରତୀୟ ସିନେମାର ରିମେକ୍ ହେବା ନୂଆ କଥା ନୁହେଁ। ସୁପରଷ୍ଟାର ସଲମାନ ଖାନ୍ ଏବଂ ନିର୍ଦ୍ଦେଶକ ରୋହିତ ସେଟ୍ଟୀଙ୍କ ଅନେକ ଫିଲ୍ମ ତେଲୁଗୁ ନଚେତ ତାମିଲ ସିନେମାର ହିନ୍ଦି ରିମେକ୍। ତେବେ କେବଳ ଯେ ଦକ୍ଷିଣ ଭାରତୀୟ ସିନେମାରୁ ହିନ୍ଦି ସିନେମା ପ୍ରସ୍ତୁତ ହେଉଛି ତାହା ନୁହେଁ, ଅନେକ ବଲିଉଡ୍ ସୁପରହିଟ୍ ଚଳଚ୍ଚିତ୍ରକୁ ମଧ୍ୟ ତାମିଲ, ତେଲୁଗୁ, କନ୍ନଡ଼ ଭାଷାରେ ରିମେକ୍ କରାଯାଉଛି।
ସଞ୍ଜୟ ଦତ୍ତ ଅଭିନୀତ ଚଳଚ୍ଚିତ୍ର ‘ମୁନ୍ନା ଭାଇ ଏମ୍ବିବିଏସ୍’ ସେତେବେଳେ ବକ୍ସ ଅଫିସରେ ସୁପରହିଟ୍ ସାବ୍ୟସ୍ତ ହୋଇଥିଲା। ଏହାର ଲୋକପ୍ରିୟତାକୁ ଦେଖି କନ୍ନଡ଼, ତାମିଲ, ତେଲୁଗୁ ଆଦି ଭାଷାରେ ଏହାକୁ ନିର୍ମାଣ କରାଯାଇଥିଲା। ତେଲୁଗୁ ରିମେକ୍ରେ ସୁପରଷ୍ଟାର ଚିରଞ୍ଜୀବୀ ମୁଖ୍ୟ ଭୂମିକାରେ ଅଭିନୟ କରିଥିଲେ। ଏପରିକି ପରବର୍ତ୍ତୀ ସମୟରେ ରିଲିଜ ହୋଇଥିବା ଏହାର ସିକୁଏଲ ଲଗେ ରହୋ ମୁନ୍ନାଭାଇକୁ ମଧ୍ୟ ଦକ୍ଷିଣ ଭାରତୀୟ ସିନେମାରେ ରିମେକ୍ କରାଯାଇଥିଲା।
ସେହିଭଳି ‘ଜବ୍ ଉଇ୍ ମେଟ୍’, ‘୩ ଇଡିଅଟ୍ସ’, ‘ଦବଙ୍ଗ’, ‘କାହାନୀ’, ‘ପିଙ୍କ’, ‘ପ୍ୟାର୍ କା ପଞ୍ଚନାମା’, ‘ଡେଲି ବେଲି’, ‘ଅମର ଆକବର ଆନ୍ଥୋନୀ’ ଭଳି ସୁପରହିଟ୍ ବଲିଉଡ୍ ସିନେମାକୁ ତେଲୁଗୁ ଭାଷାରେ ରିମେକ୍ କରାଯାଇଛି।
