ଢେଙ୍କାନାଳ ଅଫିସ, ୯।୬ – ଢେଙ୍କାନାଳ ବସ୍ଷ୍ଟାଣ୍ଡ ପରିସରରେ ନିର୍ମିତ ଶୌଚାଳୟ ଏବଂ ପରିସ୍ରାଗାର ରକ୍ଷଣାବେକ୍ଷଣ ଅଭାବରୁ ଅବହେଳିତ ହୋଇପଡ଼ିଛି। ବାରମ୍ବାର ଦୃଷ୍ଟି ଆକର୍ଷଣ କରାଯିବା ସତ୍ତ୍ୱେ ପୌରସଂସ୍ଥା ଏହାର ସଫେଇ ଦିଗରେ ପଦକ୍ଷେପ ଗ୍ରହଣ କରୁନାହିଁ। ଆବର୍ଜନାରେ ପରିପୂର୍ଣ୍ଣ ହୋଇରହିଥିବାବେଳେ ପରିସ୍ରାଗାର ପରିସରରେ ପୂତ୍ତିଗନ୍ଧମୟ ପରିବେଶ ସୃଷ୍ଟି ହୋଇଥିବାରୁ ଦୁର୍ଗନ୍ଧରେ ନାକ ଫାଟୁଛି।
ଜିଲାବାସୀଙ୍କ ଗମନାଗମନର ପ୍ରମୁଖ କେନ୍ଦ୍ରସ୍ଥଳ ହେଉଛି ଢେଙ୍କାନାଳ ବସ୍ଷ୍ଟାଣ୍ଡ। ପ୍ରତିଦିନ ହଜାର ହଜାର ଯାତ୍ରୀ ଏହା ଉପରେ ନିର୍ଭର କରନ୍ତି। ଜିଲା ତଥା ଜିଲା ବାହାରୁ ଆସୁଥିବା ବସ୍ଗୁଡ଼ିକ ଏଠାରେ ସାମୟିକ ରହଣି କରିଥାନ୍ତି। ଉକ୍ତ ସମୟରେ ଯାତ୍ରୀମାନେ ପରିସ୍ରା ଏବଂ ଶୌଚ କରିବାକୁ ଉକ୍ତ ପରିସ୍ରାଗାର ଉପରେ ନିର୍ଭର କରିଥାନ୍ତି। ହେଲେ ଶୌଚାଳୟ ଭିତରେ କୁଢ଼କୁଢ଼ ପ୍ଲାଷ୍ଟିକ ବୋତଲ, ମଦ ବୋତଲ ଭଳି ବର୍ଜ୍ୟବସ୍ତୁ ଭର୍ତ୍ତି ହୋଇଛି। ପରିସ୍ରା କରିବା ଲାଗି ବସାଯାଇଥିବା ବେସିନ ବ୍ୟବହାର ଅନୁପଯୋଗୀ ହୋଇପଡ଼ିଛି। ପାଣି ଆସୁ ନ ଥିବାରୁ ସେସବୁ କାମରେ ଆସୁନାହିଁ। ଦୁର୍ଗନ୍ଧରେ ନାକ ଫାଟୁଛି ା ଅସ୍ବାସ୍ଥ୍ୟକର ପରିବେଶ ସୃଷ୍ଟି ହୋଇଛି, ଯାହା ଯାତ୍ରୀଙ୍କ ମଧ୍ୟରେ ଅସନ୍ତୋଷ ବଢ଼ାଉଛି। ଢେଙ୍କାନାଳ ବସଷ୍ଟାଣ୍ଡରୁ ଦୈନିକ ୧୦୦ରୁ ଊର୍ଦ୍ଧ୍ୱ ବସ୍ ବିଭିନ୍ନ ଅଞ୍ଚଳକୁ ଯାତାୟାତ କରୁଥିବାବେଳେ ଯାତ୍ରୀଙ୍କ ଉଦ୍ଦେଶ୍ୟରେ ନିର୍ମିତ ଶୌଚାଳୟ କାର୍ଯ୍ୟରେ ନ ଆସିବା ପୌରସଂସ୍ଥାର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ଏ ନେଇ ନିର୍ବାହୀ ଅଧିକାରୀ ଅତନୁ ସାମନ୍ତ କୁହନ୍ତି, ପରିସ୍ରାଗାରରେ ସୃଷ୍ଟି ହୋଇଥିବା ସମସ୍ୟା ସମ୍ପର୍କରେ ଅଭିଯୋଗ ଆସିନାହିଁ। ସୋମବାର ଘଟଣାସ୍ଥଳ ପରିଦର୍ଶନ କରିବା ପରେ ଆବଶ୍ୟକ ପଦେକ୍ଷପ ଗ୍ରହଣ କରାଯିବ।
