![](https://www.dharitri.com/wp-content/uploads/2019/10/5-59-1568x1176.jpg)
ଗଞ୍ଜାମ,୩୧ା୧୦(ଡି.ଏନ.ଏ.)-ଛତ୍ରପୁର ଓ ଗଞ୍ଜାମ ଅଗସ୍ତିନୂଆଗାଁ ୧୬ନଂ. ଜାତୀୟ ରାଜପଥ ସନ୍ତୋଷୀ ମା’ ମନ୍ଦିର ସମ୍ମୁଖରେ ବୁଧବାର ବ୍ରହ୍ମପୁରରୁ ଭୁବନେଶ୍ୱର ଯାଉଥିବା ସିଲକ୍ ସିଟି ବସ୍ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୨୦ରୁ ଊର୍ଦ୍ଧ୍ୱ ଯାତ୍ରୀ ଆହତ ହୋଇଥିବା ବେଳେ ୫ ଗୁରୁତର ହୋଇଛନ୍ତି। ଗୁରୁତରମାନେ ହେଲେ ସଞ୍ଜୀବ କୁମାର ପଣ୍ଡା, ସୋନାଲି ପ୍ରିୟଦର୍ଶିନୀ, ମଧୁସ୍ମିତା ସାହୁ, ସୁସ୍ମିତା ସାହୁ ଓ ରମେଶ ସେଠୀ। ଜଣେ ଯାତ୍ରୀଙ୍କ କହିବାନୁଯାୟୀ, ଅପରାହ୍ନ ସାଢ଼େ ୪ଟାରେ ୧୬ନଂ. ଜାତୀୟ ରାଜପଥ ପାର୍ଶ୍ୱରୁ ଏକ ଗାଈ ହଠାତ୍ ଭୁବନେଶ୍ୱର ପଟେ ଯାଉଥିବା କଣ୍ଟେନର ଭ୍ୟାନ ଆଗକୁ ଚାଲିଆସିବାରୁ ଉକ୍ତ ଗାଡ଼ି ବ୍ରେକ୍ ମାରି ଦେଇଥିଲା। ଏହି ସମୟରେ ପଛରେ ଆସୁଥିବା ଯାତ୍ରୀବାହୀ ସିଲକ୍ ସିଟି ବସ୍ଟି ଭ୍ୟାନରେ ପିଟି ହୋଇଯାଇଥିଲା। ଦୁର୍ଘଟଣା ପରେ ବସ୍ଟି କିଛି ଦୂର ଘୋଷାରି ହୋଇ ରାଜପଥ ପାର୍ଶ୍ୱ ଡିଭାଇଡରକୁ ଲାଗି ଅଟକି ରହିଯାଇଥିଲା। ଫଳରେ ଅଧିକାଂଶ ଯାତ୍ରୀ ଏଥିରୁ ରକ୍ଷା ପାଇଛନ୍ତି। କିନ୍ତୁ ଗାଡ଼ି ଚାଳକଙ୍କ ଗୋଡ଼ ଏକ୍ସିଲେଟର ଫସିଯାଇଥିଲା। ସ୍ଥାନୀୟ ଲୋକ ତାଙ୍କୁ ଉଦ୍ଧାର କରିଥିଲେ। ପରେ ଶହ ଶହ ଗାଡ଼ି ରାସ୍ତା ପାର୍ଶ୍ୱରେ ଅଟକି ରହିଥିଲା। ଖବର ପାଇ ଛତ୍ରପୁର ଏସ୍ଡିପିଓ ଉକତ୍ଳ କେଶରୀ ଦାସ, ଗଞ୍ଜାମ ଥାନାଧିକାରୀ ଦିଲୀପ କୁମାର ସାହୁ, ଛତ୍ରପୁର ଆଇଆଇସି ପ୍ରିୟସ ରଞ୍ଜନ ଛୋଟରାଏ ଓ ପୂର୍ବତନ ଏମ୍ପି ପ୍ରତିନିଧି ସୁଧୀର କୁମାର ପାଢ଼ୀ ଘଟଣାସ୍ଥଳରେ ପହଞ୍ଚତ୍ ଅଟକିଥିବା ଗାଡ଼ିଗୁଡ଼ିକୁ ଛାଡ଼ିବା ସହ ଆହତଙ୍କୁ ଉଦ୍ଧାର କରି ଗଞ୍ଜାମ ଓ ଛତ୍ରପୁର ମେଡିକାଲକୁ ପଠାଇଥିଲେ। ଚିକିତ୍ସା ପରେ ସମସ୍ତେ ଘରକୁ ଫେରିଛନ୍ତି। ଦିର୍ଘଟଣାଗ୍ରସ୍ତ ଦୁଇ ଗାଡ଼ିକୁ ପୋଲିସ ଜବତ କରିଛି।