ଢେଙ୍କାନାଳ ଅଫିସ, ୨୧।୩
ବିଶ୍ୱପ୍ରସିଦ୍ଧ ମହିମା ଧର୍ମପୀଠ ଯୋରନ୍ଦା ଏବଂ ପର୍ଯ୍ୟଟନସ୍ଥଳୀ ସପ୍ତଶଯ୍ୟାର ଉନ୍ନତୀକରଣ ଲାଗି ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯାଇଛି। ଏହି ଦୁଇ ପର୍ଯ୍ୟଟନ କ୍ଷେତ୍ରର ବିକାଶ ଲାଗି ତ୍ୱରିତ ପଦକ୍ଷେପ ନେବାକୁ ଢେଙ୍କାନାଳ ବିଧାୟକ ସୁଧୀର କୁମାର ସାମଲ ରାଜ୍ୟ ସରକାରଙ୍କୁ ପ୍ରସ୍ତାବ ଦେଇଛନ୍ତି। ଏ ନେଇ ଜିଲାପାଳଙ୍କ ସହ ଆଲୋଚନା କରାଯାଇଛି। ବିଭିନ୍ନ କାର୍ଯ୍ୟ ସମ୍ପର୍କିତ ଫିଜିବିଲିଟି ରିପୋର୍ଟ ସରକାରଙ୍କୁ ଦିଆଯାଇଥିବା ବିଧାୟକ ସୂଚନା ଦେଇଛନ୍ତି।
ଜିଲାର ପ୍ରଶାସନିକ କେନ୍ଦ୍ରସ୍ଥଳ ଢେଙ୍କାନାଳ ସଦର ଏବଂ ଗଁଦିଆ ବ୍ଲକରେ ବିକାଶକୁ ବିଶେଷ ଗୁରୁତ୍ୱ ଦିଆଯିବ। ଗଁଦିଆରେ କ୍ରୀଡ଼ା ପ୍ରତିଭାଙ୍କ ବିକାଶ ଲାଗି ଏକ ମିନି ଷ୍ଟାଡିୟମ ନିର୍ମାଣ କରାଯିବ। ଢେଙ୍କାନାଳସ୍ଥିତ ଗଣେଶ ବଜାରରେ ଥିବା ଗୋପବନ୍ଧୁ ଟାଉନ ହଲ୍ରେ ବର୍ଷତମାମ ବିଭିନ୍ନ ସାମାଜିକ, ସାଂସ୍କୃତିକ କାର୍ଯକ୍ରମ ହେଉଛି। ଏହାକୁ ସାଉଣ୍ଡପ୍ରୁଫ୍ କରାଯିବା ସହ ଅତ୍ୟାଧୁନିକ ଅଡିଟୋରିୟମରେ ରୂପାନ୍ତରିତ କରାଯିବ। ସେହିପରି ସଦର ବ୍ଲକର ୩୦ ପଞ୍ଚାୟତରୁ ୯ଟି କାମାକ୍ଷାନଗର ନିର୍ବାଚନମଣ୍ଡଳୀରେ ରହିଛି। ଉକ୍ତ ୯ ପଞ୍ଚାୟତକୁ କାମାକ୍ଷାନଗର ବ୍ଲକ ପ୍ରଶାସନ ପକ୍ଷରୁ ପାନୀୟ ଜଳ ଯୋଗାଣ ହେଉଛି। ଅବଶିଷ୍ଟ ୨୧ ପଞ୍ଚାୟତକୁ ପାନୀୟଜଳ ଯୋଗାଣ ଲାଗି ପ୍ରକଳ୍ପ ନିର୍ମାଣ କରିବାକୁ ବିଧାୟକ ପ୍ରସ୍ତାବ ଦେଇଛନ୍ତି। ପୌରାଞ୍ଚଳରେ ମଧ୍ୟ ପାନୀୟଜଳ ପ୍ରକଳ୍ପ ପାଇଁ ପ୍ରସ୍ତାବ ଯାଇଛି। ଏଥିପୂର୍ବରୁ କପିଳାସ ପୀଠର ଉନ୍ନତୀକରଣ ଲାଗି ରାଜ୍ୟ ସରକାର ୧ କୋଟି ଟଙ୍କାର ଅନୁଦାନ ଘୋଷଣା କରିଥିଲେ। ଏ ସଂକ୍ରାନ୍ତରେ ଜିଲାପାଳ ଭୂମେଶ ଚନ୍ଦ୍ର ବେହେରା କୁହନ୍ତି, ପ୍ରସ୍ତାବ ଅନୁମୋଦନ ହେବା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ।
