ନୂଆଦିଲ୍ଳୀ,୩୦।୫(ପି.ଟି.): ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଏକ ବିଶ୍ୱସ୍ତରୀୟ ଟୁର୍ନାମେଣ୍ଟ ହୋଇଥିବାରୁ ବିଦେଶୀ ଖେଳାଳିଙ୍କ ବିନା ଏହା ଆୟୋଜନ ହୋଇପାରିବ ନାହିଁ ବୋଲି କିଙ୍ଗ୍ସ ଏକାଦଶ ପଞ୍ଜାବର ଅନ୍ୟତମ ମାଲିକ ନେସ୍ ଓ୍ବାଡିଆ କହିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆଇପିଏଲ୍ ନେଇ ଅନ୍ତିମ ନିଷ୍ପତ୍ତି ନେବାର ସମୟ ଆସିନାହିଁ। ବିଦେଶୀ ଖେଳାଳିଙ୍କ ବିନା ଆଇପିଏଲ୍ର ମାନେ କିଛି ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ସେପ୍ଟେମ୍ବର-ଅକ୍ଟୋବରରେ ଆଇପିଏଲ୍ ଆୟୋଜନ କରିବାକୁ ବିସିସିଆଇ ଚାହୁଁଛି। କୋଭିଡ୍-୧୯ ମହାମାରୀ କାରଣରୁ ଆଇପିଏଲ୍ ଏବେ ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରହିଛି। ଯଦି ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅକ୍ଟୋବର-ନଭେମ୍ବରରେ ଅଷ୍ଟ୍ରେଲିଆରେ ଟି୨୦ ବିଶ୍ୱକପ୍ ଆୟୋଜନ ନ ହୁଏ ତେବେ ଆଇପିଏଲ୍ ଆୟୋଜନର ସମ୍ଭାବନା ବଢିବ। ପୂର୍ବରୁ ଯାତ୍ରାଜନିତ କଟକଣାକୁ ଦୃଷ୍ଟିରେ ରଖି କେବଳ ଭାରତୀୟ ଖେଳାଳିଙ୍କୁ ନେଇ ଆଇପିଏଲ ଆୟୋଜନ କରିବାକୁ ରାଜସ୍ଥାନ ରୟାଲ ପ୍ରସ୍ତାବ ଦେଇଥିଲା। ଏହାକୁ ଚେନ୍ନାଇ ସୁପର କିଙ୍ଗ୍ସ ପ୍ରସ୍ତାବ ପ୍ରତ୍ୟାଖ୍ୟାନ କରିଥିଲା।
ବିଶ୍ୱସ୍ତରୀୟ ଖେଳାଳିଙ୍କୁ ନେଇ ଖେଳାଯାଉଥିବାରୁ ଆଇପିଏଲ୍ ବିଶ୍ୱସ୍ତରୀୟ ଟୁର୍ନାମେଣ୍ଟର ମାନ୍ୟତା ପାଇଛି। ବିଶ୍ୱର ଏହା ସର୍ବଶ୍ରେଷ୍ଠ ଟି୨୦ ଲିଗ୍ ହିସାବରେ ପରିଗଣିତ ହେଉଛି। ତେଣୁ ଏହି ଲିଗ୍ ପାଇଁ ଅନ୍ତର୍ଜାତୀୟ ପ୍ଲାଟ୍ଫର୍ମ ଓ ଖେଳାଳି ଆବଶ୍ୟକ ବୋଲି ଓ୍ବାଡିଆ କହିଛନ୍ତି। କୋଭିଡ୍-୧୯ ମହାମାରୀ କାରଣରୁ ଏବେଠାରୁ ଆଇପିଏଲ୍ ନେଇ କିଛି କହିବା ଅସମ୍ଭବ। ଜର୍ମାନୀରେ ଫୁଟବଲ ଆରମ୍ଭ ହେଲାଣି। ସେହିପରି ଇପିଏଲ୍ ମଧ୍ୟ ଆରମ୍ଭ ହେବ। କିନ୍ତୁ ମହାମାରୀ ନେଇ ଭାରତରେ ଏବେ ବହୁ ଚ୍ୟାଲେଞ୍ଜ ରହିଛି। ଆଇପିଏଲ୍ ଦେଖିବାକୁ ଭାରତୀୟ ପ୍ରଶଂସକ ଅପେକ୍ଷା କରିଛନ୍ତି। ଲିଗ୍ ଆୟୋଜନ ହେଲେ ସେମାନେ ବହୁତ ଖୁସି ହେବେ ବୋଲି ଓ୍ବାଡିଆ କହିଛନ୍ତି।
