ଜଗତ୍ସିଂହପୁର ଅଫିସ, ୭ା୧୦- ଜଗତ୍ସିଂହପୁର ଜିଲା ବାଲିକୁଦା ଥାନା ଅଢଙ୍ଗ ପଞ୍ଚାୟତ ଦାଗାଁ ବିଦ୍ୟାଳୟ (ବାତ୍ୟା ଆଶ୍ରୟସ୍ଥଳ) ବିଲ୍ଡିଂରୁ ଗତ ୫ ତାରିଖ ରାତିରେ ଜଣେ ଅଜଣା ବ୍ୟକ୍ତିଙ୍କ ମୃତଦେହ ଉଦ୍ଧାର କରାଯାଇଥିଲା। ସୋମବାର ସମ୍ପୃକ୍ତ ବ୍ୟକ୍ତିଙ୍କ ପରିଚୟ ମିଳିଛି । ତାଙ୍କ ନାଁ କୃଷ୍ଣଚନ୍ଦ୍ର ଚମ୍ପତିରାୟ (୨୮) ଓ ଘର ନୟାଗଡ଼ ଜିଲା ଚାନ୍ଦପୁର ଥାନା କାଞ୍ଚନପୁର ବୋଲି ଜଣାଯାଇଛି । ଚମ୍ପତିରାୟଙ୍କ ସ୍ତ୍ରୀ ରଶ୍ମିତା ବାଲିକୁଦା ଥାନାରେ ପହଞ୍ଚତ୍ ତାଙ୍କ ସ୍ବାମୀଙ୍କୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି। କୃଷ୍ଣଚନ୍ଦ୍ର ଅହମ୍ମଦାବାଦରେ ଶ୍ରମିକ ଭାବେ କାମ କରୁଥିଲେ। କିଛିଦିନ ପୂର୍ବରୁ ଗାଁକୁ ଆସିଥିଲେ। ଗତ ୫ ତାରିଖରେ ଅହମ୍ମଦାବାଦ ଯାଉଥିବା କହି ଘର ଛାଡ଼ିଥିଲେ। ହେଲେ ଅହମ୍ମଦାବାଦ ବଦଳରେ ସେ ଜଗତ୍ସିଂହପୁରରେ ପହଞ୍ଚତ୍ଥିଲେ। ତେବେ କୃଷ୍ଣଚନ୍ଦ୍ର ପୂର୍ବରୁ ଜଣଙ୍କୁ ପ୍ରେମ କରୁଥିଲେ। ଏହି କାରଣରୁ ତାଙ୍କୁ ହତ୍ୟା କରାଯାଇଥିବା ସେ ସନ୍ଦେହ କରୁଥିବା ଅଭିଯୋଗରେ ଦର୍ଶାଇଛନ୍ତି। ଏ ସମ୍ପର୍କରେ ବାଲିକୁଦା ଥାନା ଆଇଆଇସି ସର୍ବେଶ୍ୱର ବେହେରା କହିଛନ୍ତି, ରଶ୍ମିତାଙ୍କ ଅଭିଯୋଗ ଉପରେ ହତ୍ୟା ମାମଲା ରୁଜୁ କରାଯିବ ଓ ତଦନ୍ତ କରାଯାଇ ପ୍ରକୃତ ଚିତ୍ର ପଦାକୁ ଅଣାଯିବ।
ସୂଚନା ଅନୁଯାୟୀ, ଗତ ୫ ତାରିଖ ରାତି ପ୍ରାୟ ୧୧ଟାରେ ଦାଗାଁ ବିଦ୍ୟାଳୟ ବିଲ୍ଡିଂରେ ଜଣେ ବ୍ୟକ୍ତି ଜୀବନ ସହ ସଂଗ୍ରାମ କରୁଥିବା ଖବର ପୋଲିସକୁ ମିଳିଥିଲା। ପୋଲିସ ସେଠାରେ ପହଞ୍ଚତ୍ବା ବେଳକୁ ବ୍ୟକ୍ତିଜଣକ ଜୀବିତ ଥିଲେ। ପୋଲିସ ତାଙ୍କୁ ଜଗତ୍ସିଂହପୁର ଜିଲା ମୁଖ୍ୟ ଚିକିତ୍ସାଳୟ ପଠାଇବାର ବ୍ୟବସ୍ଥା କରିଥିଲା। ମାତ୍ର ବିଳମ୍ବିତ ରାତିରେ କୃଷ୍ଣଚନ୍ଦ୍ରଙ୍କ ମୃତ୍ୟୁ ଘଟିଥିଲା। ସେ ଜୀବତ ଥିବାବେଳେ ତାଙ୍କ ଘର ଖୋର୍ଦ୍ଧା ବୋଲି କହିଥିଲେ। ତାଙ୍କ ବାମ ହାତରେ ସାମାନ୍ୟ କ୍ଷତ ଥିଲା। ପୋଷାକ ପୋଡ଼ିଯାଇଥିଲା। ନିକଟରେ ଏକ ଛୋଟ ଛୁରୀ, ଦିଆସିଲ କାଠି ଓ ଚପଲ ପଡିଥିଲା। ସବୁଠାରୁ ବଡ କଥା ତାଙ୍କ ଶରୀରର ଅଧିକାଂଶ ଅଂଶ ପୋଡ଼ିଯାଇଥିଲେ ହେଁ ତାଙ୍କ ମୁଣ୍ଡ କିମ୍ବା ଚୁଟି ପୋଡ଼ି ନ ଥିବା ଦେଖିବାକୁ ମିଳିଥିଲା। ଯଦି ସେ ଆତ୍ମହତ୍ୟା କରିଥାନ୍ତେ ତେବେ ପାଖରେ କିରୋସିନ କିମ୍ବା ପେଟ୍ରୋଲ ପାତ୍ର ପଡିଥିବା କଥା। କିନ୍ତୁ ତାହା ଦେଖିବାକୁ ମିଳି ନ ଥିଲା। ତଦନ୍ତ ପରେ ସତ୍ୟାସତ୍ୟ ପଦାକୁ ଆସିବ ବୋଲି ପୋଲିସ କହିଛି।
