କାମାକ୍ଷାନଗର, ୨୩।୬(ଡି.ଏନ୍.ଏ.) – କାମାକ୍ଷାନଗର ସଦରରୁ ପରଜଙ୍ଗକୁ ସଂଯୋଗ କରୁଥିବା ୫୩ନଂ. ଜାତୀୟ ରାଜପଥର ଆଳତୁମାଠାରେ ରାମିଆଳ ନଦୀ ଉପରେ ନିର୍ମାଣ ସେତୁ ବିପଦସଙ୍କୁଳ ହୋଇପଡ଼ିଛି। ଖାଲଖମାରେ ଭର୍ତ୍ତି ହୋଇ ପଡ଼ିଥିବା ବ୍ରିଜ୍ ମରଣଯନ୍ତା ପାଲଟିଛି। ସାମାନ୍ୟ ବର୍ଷାରେ ସେତୁ ଉପରେ ଜମିରହୁଛି ପାଣି। ଯାତ୍ରୀମାନେ ନାହିଁ ନ ଥିବା ସମସ୍ୟା ଭୋଗୁଥିବାବେଳେ ଏହାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି।
ରକ୍ଷଣାବେକ୍ଷଣ ଅଭାବରୁ ରାମିଆଳ ବ୍ରିଜ୍ ଅବସ୍ଥା ଶୋଚନୀୟ ହୋଇପଡ଼ିଛି। ସେତୁରେ ସୃଷ୍ଟି ହୋଇଥିବା ଗର୍ତ୍ତରେ ବର୍ଷାପାଣି ଭର୍ତ୍ତି ହୋଇରହୁଛି। ବାଇକ୍ ଏବଂ ସାଇକେଲ ଆରୋହୀ ଜାଣି ନ ପାରି ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଗାଡ଼ି ଯାତାୟାତ ବେଳେ ପଥଚାରୀଙ୍କ ଉପରେ ପାଣି ଛିଟିକି ପଡୁଛି। କାମାକ୍ଷାନଗରରୁ ଯାଜପୁର ଏବଂ ଅନୁଗୋଳ ଯିବାକୁ ଏହି ରାସ୍ତା ପ୍ରମୁଖ ମାଧ୍ୟମ। ଏହି ବାଟ ଦେଇ ଦୈନିକ ଶତାଧିକ ବସ, ଭାରିଯାନ ଚଳାଚଳ କରିଥାଏ। ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ (ଏନ୍ଏଚ୍ଏଆଇ) ଏହାର ମରାମତି ଦିଗରେ ଧ୍ୟାନ ଦେଉ ନ ଥିବାରୁ ଏପରି ସମସ୍ୟା ସୃଷ୍ଟି ହୋଇଛି।
ଏ ନେଇ କାମାକ୍ଷାନଗର ଉପଜିଲାପାଳ ବିଷ୍ଣୁପ୍ରସାଦ ଆଚର୍ଯ୍ୟ କୁହନ୍ତି, ଏନ୍ଏଚ୍ଏଆଇ ସେତୁର ରକ୍ଷଣାବେକ୍ଷଣ ଦାୟିତ୍ୱ ନେଇଛି। ବିଭାଗ ସହିତ କଥାବାର୍ତ୍ତା କରାଯାଇ ଜମୁଥିବା ଜଳ ନିଷ୍କାସନ ବ୍ୟବସ୍ଥା କରାଯିବ। ଆବଶ୍ୟକ ମରାମତି ଲାଗି ପ୍ରଶାସନ ପକ୍ଷରୁ ନିର୍ଦ୍ଦେଶ ଦିଆଯିବ। ଖୁବ୍ଶୀଘ୍ର ସମସ୍ୟା ସମାଧାନ ହୋଇଯିବ ବୋଲି ସେ ଆଶାବ୍ୟକ୍ତ କରିଛନ୍ତି।
