କେନ୍ଦୁଝର,୧୧।୭( ସ୍ବ.ପ୍ର.): କେନ୍ଦୁଝର ଜିଲା ସଦର ଥାନା କେନ୍ଦୁଆ ଗ୍ରାମରେ ଗୁରୁବାର ଏକ ଅଭାବନୀୟ ଘଟଣା ଘଟିଛି। ସନ୍ଧ୍ୟାରେ ବରବେଶ ହେବାକୁ ଥିବା ଜଣେ ଯୁବକ ବିଦ୍ୟୁତ ସଂସ୍ପର୍ଶରେ ଆସିଯିବାରୁ ତାଙ୍କର ମୃତ୍ୟୁଘଟିଛି। ମୃତକ ହେଲେ ଲୋକନାଥ ମହାନ୍ତ। ସନ୍ଧ୍ୟାରେ ବାହା ହେବାକୁ ଯାଇଥାନ୍ତେ ଲୋକନାଥ। ମାତ୍ର ଦୁର୍ଭାଗ୍ୟର ବିଷୟ ବେଦିରେ ବସିବା ପୂର୍ବରୁ ତାଙ୍କ କୋକେଇ ବନ୍ଧା ହୋଇଛି।
ପ୍ରକାଶ ଯେ, ଲୋକନାଥଙ୍କ ବିବାହକୁ ନେଇ ଘରେ ପ୍ରସ୍ତୁତି ଜୋରଦାର ଚାଲିଥିଲା। ତେବେ ସକାଳୁ ଲୋକନାଥ ଲାଇଟ ସୁଇଚ ବନ୍ଦ କରିବା ସମୟରେ ବିଦ୍ୟୁତ ସଂସ୍ପର୍ଶରେ ଆସି ଗୁରୁତର ହୋଇପଡିଥିଲେ। ପରେ ତାଙ୍କୁ ଜିଲା ମୁ୍ଖ୍ୟ ଚିକିତ୍ସାଳୟକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଏ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।
