କୋଲକାତା,୨୧ ।୧୨: ଆସନ୍ତା ବର୍ଷ ହେବାକୁ ଯାଉଛି ପଶ୍ଚିମବଙ୍ଗ ବିଧାନସଭା ନିର୍ବାଚନ । ହେଲେ ଏହି ସମୟରେ ଶାସନ ତ୍ରୁଣମୂଳ କଂଗ୍ରେସ(ଟିଏମ୍ସି) ନେତା ଦଳ ଛାଡି ଭାରତୀୟ ଜନତା ପାର୍ଟି(ଭାଜପା)ରେ ଯୋଗ ଦେଉଥିବା ଦେଖାଯାଇଛି । ଦଳ ମଧ୍ୟ ନିଜର ଅସନ୍ତୁଷ୍ଟ ନେତାଙ୍କୁ ଅଟକାଇ ପାରୁ ନାହିଁ । ଏହାକୁ ନେଇ ଏବେ ଦଳ ମଧ୍ୟରେ କନ୍ଦଳ ସୃଷ୍ଟି ହେଲାଣି । ଏବେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଦଳର ନିର୍ବାଚନୀ ରଣନୀତିଜ୍ଞ ପ୍ରଶାନ୍ତ କିଶୋର ଓରଫ୍ ପିକେଙ୍କ ଉପରେ ନାରାଜ ହେଲେଣି । ମିଳିଥିବା ସୂଚନାରୁ ଜଣାପଡିଛି କି ମମତା ସ୍ଥିତି ସମ୍ଭାଳିବାକୁ ନେଇ ପ୍ରଶାନ୍ତଙ୍କୁ ଚେତାବନୀ ଦେଇଛନ୍ତି । ସେ କହିଛନ୍ତି ଯଦି ଏପରି ନ ହୁଏ ତେବେ ତାଙ୍କୁ ଶେଷ ନିଷ୍ପତ୍ତି ନେବାକୁ ପଡିବ । ଅନ୍ୟପଟେ ସୋମବାର ପ୍ରଶାନ୍ତ କିଶୋର ଭାରତୀୟ ଜନତା ପାର୍ଟି(ଭାଜପା)କୁ ଚେତାବନୀ ଦେଇ କହିଛନ୍ତି ଏଥର ବିଧାନସଭା ନିର୍ବାଚନରେ ଭାଜପା ୨ ଅଙ୍କ ଛୁଇଁ ପାରିବ ନାହିଁ । ଗୁରୁତର ସହ ଦେଖିବାକୁ ଗଲେ ମମତା ପ୍ରଶାନ୍ତଙ୍କୁ ଅଲଟିମେଟମ ଦେଇ ଦେଇଛନ୍ତି । ଯଦି ସେ ସ୍ଥିତିକୁ ନିୟନ୍ତ୍ରଣ କରିବାକୁ ଅସଫଳ ହୁଅନ୍ତି ତେବେ ସେ ନିଜେ ଶେଷ ନିଷ୍ପତ୍ତି ନେବେ । ସୂଚନାଯୋଗ୍ୟ, ଟିଏମ୍ସି ଛାଡି ଭାଜପାରେ ଯୋଗ ଦେଇଥିବା କେତେଜଣ ନେତା ଏବେ ଟିଏମ୍ସିରେ ଫାଟ ସୃଷ୍ଟି କରିବାକୁ ଚେଷ୍ଟା କରୁଥିବା ବେଳେ ମମତାଙ୍କୁ ମଇଦାନକୁ ଓହ୍ଲାଇବାକୁ ପଡୁଛି ।
