ନୂଆଦିଲ୍ଲୀ,୯।୫: ଭାରତରେ କରୋନା ସଂକ୍ରମଣ ବଢ଼ିବାରେ ଲାଗିଛି। ଦେଶରେ ସଂକ୍ରମିତ ଏବଂ ମୃତକଙ୍କ ସଂଖ୍ୟା ପ୍ରତିଦିନ ବୃଦ୍ଧି ପାଉଛି। ମୃତକଙ୍କ ସଂଖ୍ୟା ବଢୁଥିବାରୁ ଅଭାବନୀୟ ସ୍ଥିତି ସୃଷ୍ଟି ହେଉଛି। କରୋନା ସହିତ ଲଢ଼ିବାକୁ ଏକଜୁଟ ହେବାକୁ ସରକାର ଲୋକଙ୍କୁ ପରାମର୍ଶ ଦେଇଛନ୍ତି। ଏପରିସ୍ଥଳେ ଏମ୍ସ୍ ପକ୍ଷରୁ କୁହାଯାଇଛି ଯେ, କରୋନା ଏବେ ଭାରତ ମୁହାଁ ହୋଇଛି। ଏଥିରୁ ଦୂରେଇ ରହିବାର ଶ୍ରେଷ୍ଠ ପ୍ରତିଷେଧକ ବ୍ୟବସ୍ଥା ହେଉଛି ସାମାଜିକ ଦୂରତା ବଜାୟ ରଖିବା। ଏହା ସହିତ ନିୟମିତ ଅନ୍ତରରେ ହାତ ଧୋଇବା ମଧ୍ୟ ଗୁରୁତ୍ୱପୂର୍ଣ୍ଣ। ଲୋକେ ସଚେତନ ହେଲେ କରୋନା ସହିତ ଲଢ଼ିବା ସହଜ ହେବ ବୋଲି ଏମ୍ସ୍ର ନିର୍ଦ୍ଦେଶକ ଡ.ରଣଦୀପ୍ ଗୁଲେରିଆ କହିଛନ୍ତି। ଆମେରିକା, ଇଟାଲି, ସ୍ପେନ୍, ବେଲଜିୟମ୍ ଏବଂ ନେଦରଲାଣ୍ଡରେ କରୋନା ସଂକ୍ରମଣ ଗ୍ରାଫ୍ ପ୍ରଥମେ ବଢ଼ିଥିବାବେଳେ ଏବେ ଏହା କମିବାରେ ଲାଗିଛି। ଭାରତରେ ମଧ୍ୟ ସେଭଳି ସ୍ଥିତି ଦେଖାଦେଇ ସଂକ୍ରମଣ ଧୀରେଧୀରେ କମିବ ବୋଲି ସେ ସୂଚନା ଦେଇଛନ୍ତି। ଏବେ ଦେଶରେ ପ୍ରତିଦିନ ୮୦ ହଜାର ଲୋକଙ୍କ ନମୁନା ପରୀକ୍ଷା ହେଉଛି। ଆଗାମୀ ଦିନରେ ଏହା ଲକ୍ଷେକୁ ବୃଦ୍ଧି କରାଯିବା ଯୋଜନା ରହିଛି। ଅଧିକ ନମୁନା ପରୀକ୍ଷା କରାଗଲେ କରୋନା ପଜିଟିଭ୍ ରିପୋର୍ଟ ମଧ୍ୟ ସେହି ଅନୁପାତରେ ବଢ଼ିବାର ଆଶଙ୍କା ଥିବା ସେ କହିଛନ୍ତି। ଏନେଇ ଆଇସିଏମ୍ଆର୍ ପକ୍ଷରୁ କୁହାଯାଇଛି ଯେ, କରୋନା ମହାମାରୀ ଗ୍ରାଫ୍ ଶୀର୍ଷକୁ ବଢ଼ିବାପରେ କମିବାକୁ ଆରମ୍ଭ କରିଥାଏ। ଭାରତରେ ବର୍ତ୍ତମାନ ଏହା ବଢ଼ିବାସ୍ତରରେ ରହିଛି। ତେଣୁ ଶୀର୍ଷରେ ପହଞ୍ଚି ପୁଣି କମିବା ଲାଗି ୨ରୁ ୪ ସପ୍ତାହ ସମୟ ଲାଗିବ ବୋଲି ଆକଳନ କରାଯାଉଛି। ପ୍ରବାସୀ ଶ୍ରମିକଙ୍କ ଘରବାହୁଡ଼ା ଯୋଗୁ ଧୀରେଧୀରେ ଅଧିକ କରୋନ ପଜିଟିଭ୍ ରିପୋର୍ଟ ମିଳୁଥିବା ଆଇସିଏମ୍ଆର୍ କହିଛି।
