ଭୁବନ, ୧୨।୩(ଡି.ଏନ.ଏ.) ବିବାହ ଆଗରୁ ନିଆଁ ସାଜିଲା ବଇରି। ନିଆଁରେ ଛାରଖାର ହୋଇଗଲା ସବୁକିଛି। ଏହାକୁ ନେଇ ବେଶ୍ ଚିନ୍ତିତ ହୋଇପଡ଼ିଥିଲେ ପରିବାର। ହେଲେ ବଦାନ୍ୟ ବ୍ୟକ୍ତି ଏବଂ ସାମାଜିକ ସଙ୍ଗଠନ ସହଯୋଗର ହାତ ବଢ଼ାଇବା ପରେ ସବୁକିଛି ସୁରୁଖୁରୁରେ ସରିଛି। ନୂଆ ଜୀବନ ଆରମ୍ଭ କରିଛନ୍ତି ଭୁବନ ବ୍ଲକ ବାଉଁଶକଣ ଗ୍ରାମର ଭାରତୀ ପଧାନ। ଅନ୍ୟପଟେ ଝିଅକୁ ବିବାହ ଦେଇ ବେଶ୍ ଖୁସି ଅଛନ୍ତି ବାପା ବିଶ୍ୱନାଥ ପଧାନ ଏବଂ ପରିବାର ଲୋକେ।
ଫେବୃୟାରୀ ୨୮। ଏହି ଦିନ ବିଶ୍ୱନାଥଙ୍କ ପରିବାର ଉପରେ ଛିଣ୍ଡି ପଡ଼ିଥିଲା ଦୁଃଖର ପାହାଡ଼। ମଧ୍ୟରାତ୍ରରେ ଘଟିଥିବା ଭୟଙ୍କର ଅଗ୍ନିକାଣ୍ଡ ଗ୍ରାମର ୫ ପରିବାର ମୁହଁରୁ ଛଡ଼ାଇନେଲା ଖୁସି। ସବୁଠୁ ବେଶି ଦୁଃଖ ଅଜାଡ଼ି ହୋଇପଡ଼ିଥିଲା ବିଶ୍ୱନାଥଙ୍କ ପରିବାର ଉପରେ। କାରଣ ଝିଅ ଭାରତୀଙ୍କ ବିବାହ ଠିକ୍ ହୋଇ ସାରିଥିବାବେଳେ ମୂଲ୍ୟବାନ ଆସବାବପତ୍ର ପୋଡ଼ି ପାଉଁଶ ହୋଇଯାଇଥିଲା। ଖଟିଲେ ଖାଉଥିବା ବିଶ୍ୱନାଥଙ୍କ ପାଇଁ ଏହା କୌଣସି ଅଭିଶାପଠାରୁ କମ୍ ନ ଥିଲା। ଝିଅ ବିବାହ କିପରି ହେବ ତାହାକୁ ନେଇ ସେ ଚିନ୍ତାରେ ପଡ଼ିଥିଲେ। ଅନ୍ୟପଟେ ଏହି ଘଟଣା ଗଣମାଧ୍ୟମରେ ପ୍ରକାଶିତ ହେବାପରେ ବିଭିନ୍ନ ବଦାନ୍ୟ ବ୍ୟକ୍ତି, ସାମାଜିକ ସଙ୍ଗଠନ ସହାୟତାର ହାତ ବଢ଼ାଇଥିଲେ। ଭାରତୀଙ୍କୁ ଭାବି ଶାଶୁଘରୁ ମିଳିଲା ଆଶ୍ୱାସନା। ଭାବି ବର ତଥା ଅନୁଗୋଳ ଜିଲା ଛେଣ୍ଡିପଦା ବ୍ଲକର ଦଶରଥ ପ୍ରଧାନଙ୍କ ପୁଅ ଅକ୍ଷୟ ମଧ୍ୟ ନିରାଡ଼ମ୍ବର ଭାବେ ବିବାହ କରିବାକୁ ରାଜି ହୋଇଯାଇଥିଲେ। ବୁଧବାର ଭାରତୀ ଏବଂ ଅକ୍ଷୟଙ୍କ ବିବାହ ଶେଷ ହୋଇଛି। ଖୋର୍ଦ୍ଧା ଜିଲାର ନଖରା ଗ୍ରାମର ଲକ୍ଷେଶ୍ୱର ମହାଦେବ ସେବା ସଙ୍ଗଠନ ପକ୍ଷରୁ ଭାରତୀଙ୍କ ପାଇଁ ସମସ୍ତ ଆସବାବପତ୍ର ବ୍ୟବସ୍ଥା କରାଯାଇଥିଲା। ଏଥିସହ ୨୦୦ ଜଣଙ୍କ ପାଇଁ ଭୋଜିର ଆୟୋଜନ କରାଯାଇଥିଲା। ଏମ୍ପି ମହେଶ ସାହୁ, ପୁରୀ ଗୋବର୍ଦ୍ଧନ ପୀଠ ଆଦିତ୍ୟ ବାହିନୀର ମହାସଚିବ ମାତୃପ୍ରସାଦ ମିଶ୍ର, ଭୁବନ ବ୍ଲକ ଅଧ୍ୟକ୍ଷ ଧର୍ମାନନ୍ଦ ବରାଳ, ପୂର୍ବତନ ଏନ୍ଏସି ଅଧ୍ୟକ୍ଷ ନନ୍ଦକିଶୋର ସାହୁ, ହିନ୍ଦୋଳ ବ୍ଲକ ଅଧ୍ୟକ୍ଷ ପ୍ରିୟରଞ୍ଜନ ମାହୁନ୍ତ, ସୁଧାକର ସାହୁ, ମଳୟ ତ୍ରିପାଠୀ ପ୍ରମୁଖ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗଦେଇ ନବଦମ୍ପତିଙ୍କୁ ଆଶୀର୍ବାଦ ଦେଇଥିଲେ। ଭୁବନ ତୃପ୍ତି ପାଠାଗାରର ସମସ୍ତ କର୍ମକର୍ତ୍ତା ସହଯୋଗ କରିଥିଲେ।
