ନୂଆଦିଲ୍ଲୀ, ୧୧ା୫ (ପି.ଟି.)- ବର୍ତ୍ତମାନର ଭାରତୀୟ କ୍ରିକେଟ ଦଳରେ ବହୁ ଭଲ ଫିଲ୍ଡର ରହିଛନ୍ତି, ହେଲେ ଜଣେ ହେଲେ ଯୁବରାଜ ସିଂଙ୍କ ଭଳି ପୂର୍ଣ୍ଣାଙ୍ଗ ଫିଲ୍ଡର ନାହାନ୍ତି। ଏକଥା କହିଛନ୍ତି ଏକଦା ଜଣେ ଶ୍ରେଷ୍ଠ ଫିଲ୍ଡର ଭାବେ ପରିଚିତି ଲାଭକରିଥିବା ଭାରତର ପୂର୍ବତନ କ୍ରିକେଟର ମହମ୍ମଦ କୈଫ। ଦେଶ ତରଫରୁ ୧୦୦ରୁ ଅଧିକ ଅନ୍ତର୍ଜାତୀୟ ଦିନିକିଆ ଖେଳିଥିବା ଏହି ଖେଳାଳି ଭାରତର ନାଟଓ୍ବେଷ୍ଟ ବିଜୟରେ ମୁଖ୍ୟ କର୍ଣ୍ଣଧାର ଥିଲେ। ତାଙ୍କର ବ୍ୟାଟିଂ ଫର୍ମ କ୍ରମେ ହ୍ରାସ ପାଇବାରେ ଲାଗିଥିଲେ ମଧ୍ୟରେ ଚମତ୍କାର ଫିଲ୍ଡିଂ ଯୋଗୁ ବହୁଦିନ ଧରି ଦଳରେ ସ୍ଥାନ ବଜାୟ ରଖିପାରିଥିଲେ। ସେ ଖେଳୁଥିବା ସମୟରେ ଯୁବରାଜ ସିଂ ପଏଣ୍ଟ ଅଞ୍ଚଳରେ କୈଫ ନିଜେ ଏକ୍ସଟ୍ରା କଭରରେ ଫିଲ୍ଡିଂ କରୁଥିଲେ। ଜଣେ ପୂର୍ଣ୍ଣାଙ୍ଗ ଫିଲ୍ଡର ହେବାକୁ ହେଲେ ତୁମକୁ ଜଣେ ଭଲ କ୍ୟାଚର ହେବାକୁ ପଡ଼ିବ। ଅଧିକାଂଶ ସମୟ ଷ୍ଟମ୍ପ୍କୁ ହିଟ୍ କରିବାର ସାମର୍ଥ୍ୟ ଥିବା ଦରକାର, କ୍ଷିପ୍ର ବେଗରେ ଦୌଡ଼ିବା ସହ ମୁଭିଂ ବଲ୍କୁ ଧରିିବା ଲାଗି ଉପଯୁକ୍ତ ଟେକ୍ନିକ୍ ଜାଣିଥିବା ଆବଶ୍ୟକ। ମୁଁ ଓ ଯୁବରାଜ ଏକାଠି ଖେଳୁଥିବାବେଳେ ଭଲ ଫିଲ୍ଡର ଭାବେ ଜଣାଶୁଣା ଥିଲୁ। ଜଣେ ସର୍ବଗୁଣ ସମ୍ପନ୍ନ ଫିଲ୍ଡର ହେବାକୁ ହେଲେ ସ୍ଲିପ ହେଉ ଅବା ଶର୍ଟ-ଲେଗ୍ରେ କ୍ୟାଚ ଧରିପାରିବା ଏବଂ ଲଙ୍ଗ୍ଅନ୍ ବ୍ରାଉଣ୍ଡାରିିରେ କ୍ଷିପ୍ର ବେଗରେ ଧାବମାନ ହୋଇ ବଲ୍କୁ ଫିଲ୍ଡିଂ କରିପାରୁଥିବା ସାମର୍ଥ୍ୟ ଥିବା ଦରକାର। କୈଫ କହିଛନ୍ତି, ରବୀନ୍ଦ୍ର ଜାଡେଜାଙ୍କର ବୟସ ବଢ଼ିବା ସଙ୍ଗେ ସଙ୍ଗେ ତାଙ୍କ ଫିଲ୍ଡିଂରେ ଉନ୍ନତି ପରିଲକ୍ଷିତ ହେଉଛି। କିନ୍ତୁ ସ୍ଲିପ୍ରେ ଭାରତର ଫିଲ୍ଠିଂ ଦୁର୍ବଳ ଥିବା ସେ ଲକ୍ଷ୍ୟ କରିପାରୁଛନ୍ତି। ହ୍ବାଇଟ୍ ବଲ୍ କ୍ରିକେଟରେ ଭାରତର ଦୁଇ ଷ୍ଟାର ବ୍ୟାଟ୍ସମ୍ୟାନ ବିରାଟ କୋହଲି ଏବଂ ରୋହିତ ଶର୍ମାଙ୍କ ମଧ୍ୟରେ ଶ୍ରେଷ୍ଠ କିଏ ସେ ନେଇ ବିତର୍କ ହେଉଛି। ତାଙ୍କ ମତରେ ଏହି ଦୁଇ ଜଣଙ୍କ ମଧ୍ୟରେ ମୁମ୍ବାଇର ଷ୍ଟାଇଲିଶ ବ୍ୟାଟ୍ସମ୍ୟାନଙ୍କ ଖେଳ ଦେଖିବାକୁ ସେ ପସନ୍ଦ କରବେ। କୈଫ୍ କହିଛନ୍ତି ଉଭୟ ଟେଷ୍ଟ ଓ ହ୍ବାଇଟ୍ ବଲ୍ କ୍ରିକେଟରେ କୋହଲିଙ୍କ ରେକର୍ଡ ଜବରଦସ୍ତ ରହିଛି ଏଥିରେ କୌଣସି ସନ୍ଦେହ ନାହିଁ। କିନ୍ତୁ ରୋହିତ ଏଭଳି ଜଣେ ବ୍ୟାଟ୍ସମ୍ୟାନ ଯିଏକି ଆକ୍ରମଣାତ୍ମକ ବେଳେ ସାମ୍ନାରେ ଯେ କୌଣସି ବୋଲର ଥାଆନ୍ତୁ ନା କାହିଁକି ସେଥିପ୍ରତି ପରବାୟ ନ ଥାଏ।
