ନୂଆଦିଲ୍ଲୀ,୧୩।୪ (ପି.ଟି.): ଚଳିତବର୍ଷ ନଭେମ୍ବର- ଡିସେମ୍ବରରେ ଭାରତ ଉଭୟ ପୁରୁଷ ଓ ମହିଳା ଏସିଆନ ବକ୍ସିଂ ଚାମ୍ପିୟନଶିପ୍ ଆୟୋଜନ କରିବ। ବକ୍ସିଂ ଜାତୀୟ ଫେଡେରେଶନ ସୋମବାର ଏ ନେଇ ସୂଚନା ଦେଇଛି। ସେତେବେଳକୁ କୋଭିଡ୍-୧୯ ସଂକ୍ରମଣ ନିୟନ୍ତ୍ରଣକୁ ଆସିଯାଇଥିବ ବୋଲି ଫେଡେରେଶନ ବିଶ୍ୱାସର ସହ କହିଛି।
୧୯୮୦ରେ ମୁମ୍ବାଇରେ ଭାରତ ଶେଷଥର ପାଇଁ ଏସିଆନ୍ ବକ୍ସିଂ ଚାମ୍ପିୟନଶିପ୍ ଆୟୋଜନ କରିଥିଲା। ସେହିପରି ମହିଳା ଇଭେଣ୍ଟକୁ ୨୦୦୩ରେ ହିସାରରେ ଆୟୋଜନ କରିଥିଲା। ଏବେ ଏହି ଦୁଇଟି ମେଗା ଇଭେଣ୍ଟ ଗତବର୍ଷଠାରୁ ମିଳିତ ଭାବେ ଆୟୋଜନ ହୋଇ ଆସୁଛି। ଏସିଆନ ବକ୍ସିଂ କନ୍ଫେଡେରେଶନ ବୈଠକରେ ଭାରତକୁ ଆୟୋଜନ ଅଧିକାର ପ୍ରଦାନ କରାଯାଇଥିଲା। ନଭେମ୍ବର- ଡିସେମ୍ବରରେ ଟୁର୍ନାମେଣ୍ଟ ଆୟୋଜନ କରାଯିବ। ତେବେ ସ୍ଥିତି ସ୍ବାଭାବିକ ହେଲା ପରେ ହଷ୍ଟ ସିଟି ବା ଆୟୋଜକ ସହର ସମ୍ପର୍କରେ ସୂଚନା ଦିଆଯିବ ବୋଲି ବକ୍ସିଂ ଫେଡେରେଶନ ଅଫ୍ ଇଣ୍ଡିଆ (ବିଏଫ୍ଆଇ) କାର୍ଯ୍ୟକାରୀ ନିର୍ଦ୍ଦେଶକ ଆର.କେ. ସାଚେତି କହିଛନ୍ତି।
ଏବେ କୋଭିଡ୍-୧୯ ମହାମାରୀର ରୂପ ନେଇଛି। ତେବେ ଜୁନ୍ ସୁଦ୍ଧା ଏହା ସମ୍ପୂର୍ଣ୍ଣ ନିୟନ୍ତ୍ରଣକୁ ଆସିଯାଇଥିବ। ଏହାପରେ ଆଉ ୩-୪ ମାସରେ ସବୁ କିଛି ସ୍ବାଭାବିକ ହୋଇଯାଇଥିବ ବୋଲି ସାଚେତି କହିଛନ୍ତି। ପ୍ରତି ଦୁଇବର୍ଷରେ ଥରେ ଏହି ଇଭେଣ୍ଟ ଆୟୋଜିତ ହୋଇଥାଏ। କିନ୍ତୁ ଗତ କିଛିବର୍ଷ ହେବ ଏହା ନିୟମିତ ପ୍ରତିବର୍ଷ ଖେଳାଯାଉଛି। ଗତ ଜାନୁୟାରୀରେ ଇଭେଣ୍ଟର ବିଡ୍ ଆହ୍ବାନ କରାଯାଇଥିଲା। କୋଭିଡ୍-୧୯ ସ୍ଥିତିରେ ଉନ୍ନତି ହେଲେ ଆନୁଷ୍ଠାନିକ ଭାବେ ଏସିଆନ ବକ୍ସିଂ କନ୍ଫେଡେରେଶନ ଏ ନେଇ ଘୋଷଣା କରିବ। ଉଲ୍ଲେଖଥାଉ କି, କୋଭିଡ୍-୧୯ ସଂକ୍ରମଣ କାରଣରୁ ସାରା ବିଶ୍ୱରେ କ୍ରୀଡ଼ା ଇଭେଣ୍ଟଗୁଡିକ ବାତିଲ ହୋଇଛି କିମ୍ବା ସ୍ଥଗିତ ରଖାଯାଇଛି। ଏପର୍ଯ୍ୟନ୍ତ ୯ଜଣ ଭାରତୀୟ ବକ୍ସର ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ କରିଛନ୍ତି। ସେମାନଙ୍କ ମଧ୍ୟରେ ୫ଜଣ ପୁରୁଷ ଓ ୪ ଜଣ ମହିଳା ବକ୍ସର ସାମିଲ ଅଛନ୍ତି।
