ମୁମ୍ବାଇ,୩୧।୮: ଏବେ ଭୀମା-କୋରେଗାଓ୍ବଁ ହିଂସାକୁ ନେଇ ସୋସିଆଲ୍ ମିଡ଼ିଆରେ ଚର୍ଚ୍ଚା ଜାରି ରହିଛି। ବିଚାରପତି ସରଙ୍ଗ କୋତଓ୍ବାଲ ବୁଧବାର ଅଭିଯୁକ୍ତ ବର୍ନନ ଗୋଞ୍ଜାଲଭେସ୍ଙ୍କୁ ପଚାରିଥିଲେ ଯେ, ସେ କାହିଁକି ନିଜ ଘରେ ଓ୍ବାର ଆଣ୍ଡ୍ ପିସ୍ ଭଳି ଆପତ୍ତି ଜନକ ସାମଗ୍ରୀ ରଖିଥିଲେ। ବର୍ନନଙ୍କ ଆଇନଜୀବୀ ମିହିର ଦେଶାଇଙ୍କ ଏକ ଉତ୍ତରରେ ବିଚାରପତି ଏଭଳି ପ୍ରଶ୍ନ କରିଥିଲେ। ଯେହେତୁ ‘ଓ୍ବାର ଆଣ୍ଡ୍ ପିସ’ ଲିଓ ଟଲଷ୍ଟୟଙ୍କ ମହାନ ସାହିତି୍ୟକ କୃତି ତେଣୁ ଏହାକୁ ନେଇ ବିଚାରପତିଙ୍କ ମନ୍ତବ୍ୟକୁ କେତେକ ଲୋକେ ନାପସନ୍ଦ କରି ସୋସିଆଲ୍ ମିଡ଼ିଆରେ ଭିନ୍ନ ଭିନ୍ନ କମେଣ୍ଟ ଦେଇଥିଲେ। ଏହାକୁ ନେଇ ବିଚାରପତି ସ୍ପଟୀକରଣ ଦେଇଥିଲେ ଯେ, କୋର୍ଟରେ ଟଲଷ୍ଟୟଙ୍କ ଦ୍ୱାରା ରଚିତ ହୋଇଥିବା ପୁସ୍ତକ ସମ୍ପର୍କରେ ପଚରାଯାଇ ନ ଥିଲା। ବିଶ୍ୱଜିତ୍ ରାୟଙ୍କ ଦ୍ୱାରା ରଚିତ ପୁସ୍ତକ ‘ଓ୍ବାର ଆଣ୍ଡ୍ ପିସ୍ ଇନ୍ ଜଙ୍ଗଲମହଲ: ପିପୁଲ୍, ଷ୍ଟେଟ୍ ଆଣ୍ଡ ମାଓଇଷ୍ଟ’ ନାମକ ଆପତ୍ତିଜନକ ପୁସ୍ତକ ଉପରେ କୋର୍ଟରେ ପଚରା ଯାଇଥିଲା। ଏଭଳି ପୁସ୍ତକ କାହିଁକି ବହୁଳ ପରିମାଣରେ ବର୍ନନଙ୍କ ଘରେ ଥିଲା ସେ ନେଇ ମିହିରଙ୍କୁ ପ୍ରଶ୍ନ କରାଯାଇଥିଲା। ସୂଚନାଯୋଗ୍ୟ, ଭୀମା-କୋରେଗାଓ୍ବଁ ମାମଲାରେ ୫ ଜଣ ଅଭିଯୁକ୍ତଙ୍କ ଘରୁ ଏହି ପୁସ୍ତକ ସମେତ ଆପତ୍ତିଜନକ ସାମଗ୍ରୀ ପୋଲିସ ଜବତ କରିଥିଲା।
