ପଟ୍ଟାମୁଣ୍ଡାଇ,୨।୧୨ (ସ୍ବ.ପ୍ର.): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ ସଂସାରଫଳ ପଞ୍ଚାୟତ ମଦନପୁର କଟ୍ ନିକଟରେ ଥିବା ଏକ ଲାଇସେନ୍ସ ପ୍ରାପ୍ତ ବିଦେଶୀ ମଦ ଦୋକାନ ଉଚ୍ଛେଦ ପାଇଁ ଦାବି ହୋଇଛି। ଏ ନେଇ ପଞ୍ଚାୟତ ରାଜୀବ ଗାନ୍ଧୀ ସେବା କେନ୍ଦ୍ରଠାରେ ସ୍ଥାନୀୟ ଅଞ୍ଚଳର ୫୦ରୁ ଊର୍ଦ୍ଧ୍ୱ ସ୍ବୟଂ ସହାୟକ ଗୋଷ୍ଠୀ ସଦସ୍ୟା ରବିବାର ଏକାଠି ହୋଇଥିଲେ। ସେମାନଙ୍କ କହିବା ଅନୁସାରେ, ଉକ୍ତ ମଦ ଦୋକାନ ଖୋଲାଯିବା ପରେ ସ୍ଥାନୀୟ ଅଞ୍ଚଳରେ ଅସାମାଜିକ ବ୍ୟକ୍ତିଙ୍କ ଆଡ୍ଡା ଜମିବା ସହ ଅସାମାଜିକ କାର୍ଯ୍ୟ ବୃଦ୍ଧି ପାଉଛି। ପଟ୍ଟାମୁଣ୍ଡାଇ-ରାଜନଗର ପୂର୍ତ୍ତ ବିଭାଗ ରାସ୍ତାକଡ଼ରେ ମଦ ଦୋକାନ ରହିଥିବାରୁ ଏହି ରାସ୍ତାଦେଇ ଯାତାୟାତ କରିବାକୁ ଲୋକମାନେ ନିରାପଦ ମଣୁନାହାନ୍ତି। ଏହାଛଡ଼ା ମଦ ଦୋକାନଠାରୁ ୧୦୦ଫୁଟ ଦୂରରେ ମଦନପୁର କଲେଜ ଓ ମଦନପୁର ହାଇସ୍କୁଲ ରହିଛି। ଦୈନିକ ହଜାରରୁ ଊର୍ଦ୍ଧ୍ୱ ଛାତ୍ରୀଛାତ୍ର କଲେଜ, ହାଇସ୍କୁଲକୁ ଯାଉଥିବାବେଳେ ମଦ୍ୟପମାନେ ସେମାନଙ୍କୁ ଅଶ୍ଳୀଳ ଇଙ୍ଗିତ କରିବା ସହ କମେଣ୍ଟ ପାସ୍ କରୁଛନ୍ତି। ଏ ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି। ତେଣୁ ମଦନପୁର କଟ୍ ନିକଟରୁ ଉକ୍ତ ଲାଇସେନ୍ସପ୍ରାପ୍ତ ମଦ ଦୋକାନ ଅତ୍ୟତ୍ର ଉଠାଇ ନେବା ପାଇଁ ସ୍ଥାନୀୟ ବିଧାୟକ ଦୃଷ୍ଟି ଦେବାକୁ ମହିଳାମାନେ ଦାବି କରିଛନ୍ତି।
