କୁନ୍ଦୁରା,୧୨ା୧୦(ଡି.ଏନ୍.ଏ.)କୋରାପୁଟ ଜିଲା କୁନ୍ଦୁରା ଅଧୀନସ୍ଥ ନବଗଠିତ ପଖନାଗୁଡ଼ା ପଞ୍ଚାୟତର ତ୍ରିନାଥ ମନ୍ଦିରରେ ୫ ଶହରୁ ଊର୍ଦ୍ଧ୍ୱ ମହିଳା ଦେଶୀ ମଦ ତିଆରି ଏବଂ ବିକ୍ରି ବନ୍ଦ କରିବା ପାଇଁ ଶନିବାର ଶପଥ ନେଇଛନ୍ତି। ଦୀର୍ଘ ୩୦/୪୦ ବର୍ଷ ହେଲାଣି ଏଠାରେ ଅବାଧ ମଦ କାରବାର ହେଉଥିବା ବେଳେ ଏହାକୁ ବନ୍ଦ କରିବା ପାଇଁ ବିଭିନ୍ନ ସମୟରେ ବୁଝାଶୁଝା କରାଯାଇଥିଲେ ମଧ୍ୟ ମଦ ବେପାରୀ ଗ୍ରାମବାସୀଙ୍କୁ ଖାତିର କରୁନାହାନ୍ତି। ତେଣୁ ମହିଳାମାନେ ଏକତ୍ରିତ ହୋଇ ମଦ ବନ୍ଦ କରିବାକୁ ଅଣ୍ଟା ଭିଡ଼ିଛନ୍ତି।
ପଖନାଗୁଡ଼ା ସରପଞ୍ଚଙ୍କ କହିବାନୁଯାୟୀ ମଦ ବନ୍ଦ ପାଇଁ ଶନିବାର ବୈଠକ କରିବାକୁ କୁନ୍ଦୁରା ଥାନାଧିକାରୀଙ୍କୁ ଅବଗତ କରାଯାଇଥିଲେ ମଧ୍ୟ ସେ ଏକ ଜରୁରୀ ବୈଠକରେ ଯୋଗ ଦେଉଥିବା ଯୋଗୁ ଅନୁପସ୍ଥିତ ରହିଥିଲେ। ମଦ ବନ୍ଦ କରିବା ପାଇଁ ଗ୍ରାମବାସୀଙ୍କ ନିଷ୍ପତ୍ତିକୁ ଯେଉଁ ବ୍ୟକ୍ତିମାନେ ବେଖାତିର କରିବେ, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ପାଇଁ ବାଧ୍ୟହେବୁ ବୋଲି ମହିଳାମାନେ ବୈଠକରେ ଚରମବାଣୀ ଶୁଣାଇଛନ୍ତି ା ମହିଳାଙ୍କ କହିବା ମୁତାବକ ୩୦/୪୦ ବର୍ଷ ହେଲା ଦେଶୀ ମଦ ତିଆରି ଏବଂ ବିକ୍ରି ଯୋଗୁ ଘରେ ଘରେ ପ୍ରତିଦିନ ସ୍ବାମୀ ସ୍ତ୍ରୀଙ୍କ ମଧ୍ୟରେ କଳହ ଲାଗି ରହୁଛି ା ବିଭିନ୍ନ ସମୟରେ ସ୍ବାମୀ ମଦ ପିଇ ଗଣ୍ଡଗୋଳ କରୁଥିବା ସହ ଘର ଜିନିଷ ବିକି ମଦ ପିଉଛନ୍ତି। ପଖନାଗୁଡ଼ା ନିକଟବର୍ତ୍ତୀ ଟଭାପଦର, ଘାଡଙ୍ଗାଗୁଡ଼ା, ମାଙ୍କିଡିଗୁଡ଼ା ଅଞ୍ଚଳ ଦେଶୀମଦର ଭୂସ୍ବର୍ଗ ପାଲଟି ଥିବାବେଳେ ଅବକାରୀ ବିଭାଗ ଏହାକୁ ଦେଖି ଚୁପ୍ ରହିଥିବା ମହିଳାମାନେ କହିଛନ୍ତି ା ଅବକାରୀ ସଚିବ, ଜିଲାପାଳ, ଉପଜିଲାପାଳ, ଅବକାରୀ ଅଧୀକ୍ଷକଙ୍କୁ ମଧ୍ୟ ଲିଖିତ ଅଭିଯୋଗ କରାଯିବ ବୋଲି ସେମାନେ କହିଛନ୍ତି। ଏସବୁ ସତ୍ତ୍ୱେ ମଦ ବିକ୍ରି ହେଲେ, କୁନ୍ଦୁରା ଥାନା ଓ ଅବକାରୀ କାର୍ଯ୍ୟାଳୟ ଘେରାଉ ପାଇଁ ସେମାନେ ଚେତାବନୀ ଦେଇଛନ୍ତି ା
