ଚଣ୍ଡିଗଡ଼,୨୨।୭: ସରକାର ଦେଶର ବିଭିନ୍ନ ସହରକୁ ସ୍ମାର୍ଟ ରୂପ ଦେବା ପାଇଁ ଯୋଜନା କରିଛନ୍ତି। ତେବେ ପଞ୍ଜାବର ମୋଗା ଜିଲାର ରଣସିଂ କଲା ଗାଁକୁ ଏଭଳି ରୂପ ଦେବାକୁ ଗ୍ରାମବାସୀ ଅଣ୍ଟା ଭିଡ଼ିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମନ୍ କି ବାତ୍ କାର୍ଯ୍ୟକ୍ରମ ଦ୍ୱାରା ସେମାନଙ୍କ ମଧ୍ୟରେ ଉତ୍ସାହ ସୃଷ୍ଟି ହୋଇଛି। ଏହିକାର୍ଯ୍ୟକ୍ରମ ଯୋଗୁ ସେମାନଙ୍କୁ ପ୍ରେରଣା ମିଳିଛି। ଗ୍ରାମବାସୀ ୮୦ ପ୍ରତିଶତ ପାଣ୍ଠି ଯୋଗାଡ଼ କରି ଅବଶିଷ୍ଟ ୨୦ପ୍ରତିଶତ ସରକାରୀ ଅନୁଦାନ ଦ୍ୱାରା ଗାଁକୁ ସ୍ମାର୍ଟ କରିପାରିଛନ୍ତି। ଫଳରେ ଗାଁରେ ଏବେ ଆଉ ନାଳ ନର୍ଦ୍ଦମା ପାଣି ରାସ୍ତାରେ ଜମା ହୋଇ ରହୁନାହିଁ। ସେହିପରି ଗାଁର ଆରମ୍ଭରୁ ଶେଷ ପର୍ଯ୍ୟନ୍ତ ବିଦ୍ୟୁତ୍ ଆଲୋକ ସୁବିଧା ରହିଛି। ଏହା ସହିତ ସମସ୍ତ ରାସ୍ତାଗୁଡ଼ିକ ପକ୍କା କରାଯାଇଛି। ଏଠାରେ ୫ କୋଟି ଟଙ୍କା ଖର୍ଚ୍ଚ କରି ଏକ ସ୍ବିରେଜ୍ ଟ୍ରିଟ୍ମେଣ୍ଟ୍ ପ୍ଲାଣ୍ଟ ସ୍ଥାପନ କରାଯାଇଛି। ଏଠାରେ ଦୈନିକ ୪ ଲକ୍ଷ ଲିଟର ଦୂଷିତ ଜଳକୁ ବ୍ୟବହାର ଉପଯୋଗୀ କରାଯାଇ ପାରୁଛି। ସେହିପରି ଗାଁରେ ୪ ଏକର ପରିମିତ ଅଞ୍ଚଳରେ ଥିବା ଏକ ପୋଖରୀକୁ ଗ୍ରାମବାସୀଙ୍କ ଉଦ୍ୟମରେ ସଫା କରାଯାଇଛି। ପରିବେଶ ସୁରକ୍ଷା ପାଇଁ ଇତିମଧ୍ୟରେ ଗାଁ ସାରା ୩ ହଜାରରୁ ଅଧିକ ବୃକ୍ଷଚାରା ମଧ୍ୟ ରୋପଣ କରାଯାଇଥିବା ସରପଞ୍ଚ ପ୍ରୀତ୍ ଇନ୍ଦର ପାଲ୍ ମିଣ୍ଟୁ କହିଛନ୍ତି।
