ସୁକିନ୍ଦା,୨୩ା୫(ଡି.ଏନ.ଏ.)-ଦିନେ କିମ୍ବା ମାସେ ନୁହେଁ ଦୀର୍ଘ ୬ମାସ ହେବ ଅନ୍ଧାରରେ କାଳାତିପାତ କରୁଛନ୍ତି ଯାଜପୁର ଜିଲା ସୁକିନ୍ଦା ବ୍ଲକ ଅଧୀନ ମୁଳଖମ୍ବ ଗ୍ରାମରେ ଥିବା ବିରଳ ଜନଜାତି ମଲ୍ଲାର ବସ୍ତିବାସିନ୍ଦା। ବିଦ୍ୟୁତ୍ ବିଭାଗର ଅବହେଳା ଯୋଗୁ ସେମାନେ ଏପରି ଅସୁବିଧା ଭୋଗ କରୁଛନ୍ତି। ତେଣୁ ଯଦି ଆଗାମୀ ଦିନରେ ବିଦ୍ୟୁତ୍ ସଂଯୋଗ ଦିଆ ନ ଯାଏ ବସ୍ତିବାସିନ୍ଦା ସ୍ଥାନୀୟ ବିଧାୟକଙ୍କୁ ଅବଗତ କରିବା ସହିତ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।
ସୂଚନା ଅନୁସାରେ, ରାଜ୍ୟ ସରକାରଙ୍କ ପକ୍ଷରୁ ଏହି ବସ୍ତିବାସିନ୍ଦାଙ୍କୁ ବିନାମୂଲ୍ୟରେ ବିଦ୍ୟୁତ୍ ସଂଯୋଗ ମିଳିଥିଲା। ସଂଯୋଗୀକରଣର କିଛି ଦିନ ପର୍ଯ୍ୟନ୍ତ ବିନାମୂଲ୍ୟରେ ଉପଭୋକ୍ତା ବିଦ୍ୟୁତ୍ ବ୍ୟବହାର କରିଥିଲେ। କିନ୍ତୁ ପରେ ମାସକୁ ୩୦, ୬୦ ଓ ୨୦୦ ଟଙ୍କା ପର୍ଯ୍ୟନ୍ତ ଦେବାକୁ ବିଭାଗ ପକ୍ଷରୁ କୁହାଯାଇଥିଲା। ବସ୍ତିବାସିନ୍ଦା ମଧ୍ୟ ବିଲ ପୈଠ କରିଆସୁଥିଲେ। ପରବର୍ତ୍ତୀ ସମୟରେ ବିଭାଗ ପକ୍ଷରୁ ମିଟର ବସାଯାଇ ବିଲ ସଂଗ୍ରହ ବ୍ୟବସ୍ଥା କରାଯାଇଥିଲା। ମାତ୍ର ଯେଉଁମାନେ ମିଟର ରିଡିଂ ଅନୁସାରେ ଲୋକଙ୍କଠାରୁ ଚାରି ପାଞ୍ଚ ମାସର ବିଲ୍ ଆଦାୟ କଲେ ସେମାନେ ରଶିଦ ଦେଲେନାହିଁ। ଏହାରି ମଧ୍ୟରେ ଅଚାନକ ବର୍ଷା ପବନ ହେବାରୁ ବସ୍ତିବାସିନ୍ଦାଙ୍କ ପାଇଁ ବସିଥିବା ଟ୍ରାନ୍ସଫର୍ମରର ଦୁଇଟି ଶଙ୍ଖ ଜଳି ଯିବା ସହ ଫ୍ୟୁଜ୍ ଉଡିଯାଇଥିଲା। ସେ ସମୟରେ ବିଭାଗୀୟ କର୍ମଚାରୀ ଆସି ମରାମତି କରିଦେବାକୁ ପ୍ରତିଶ୍ରୁତି ଦେଇଥିଲେ। ହେଲେ ବସ୍ତିବାସିନ୍ଦା ବିଦ୍ୟୁତ୍ କାର୍ଯ୍ୟାଳୟକୁ ଦୌଡ଼ିଦୌଡ଼ି ନୟାନ୍ତ ହେଉଥିଲେ ହେଁ ମରାମତି ସମ୍ଭବ ହୋଇ ପାରୁନାହିଁ। ବିଭାଗ ପକ୍ଷରୁ ବକେୟା ବିଲ ପୈଠ କଲେ ବିଦ୍ୟୁତ୍ ସଂଯୋଗ ବ୍ୟବସ୍ଥା କରାଯିବ ବୋଲି କୁହାଯାଉଥିବା ବସ୍ତିବାସିନ୍ଦା ଅଭିଯୋଗ କରିଛନ୍ତି। ବସ୍ତିବାସିନ୍ଦା ଶ୍ରମିକ ଶ୍ରେଣୀର ହୋଇଥିବାରୁ ଲକ୍ଡାଉନ ସମୟରେ ବକେୟା ପୈଠ କରିବାକୁ ଅସମର୍ଥ ପ୍ରକାଶ କରିଛନ୍ତି। ତେଣୁ ଏ ଦିଗରେ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେବାକୁ ସେମାନେ ନିବେଦନ କରିଛନ୍ତି। ଏ ସମ୍ପର୍କରେ ସୁକିନ୍ଦା ବିଦ୍ୟୁତ୍ ବିଭାଗ କନିଷ୍ଠ ଯନ୍ତ୍ରୀ ଅହମ୍ମଦ ଆଜାନ୍ କହିଛନ୍ତି, ବସ୍ତିବାସିନ୍ଦା ବକେୟା ରାଶି ପୈଠ କରିବା ପରେ ବିଦ୍ୟୁତ୍ ସଂଯୋଗ ବ୍ୟବସ୍ଥା କରାଯିବ।
