ଭୁବନେଶ୍ୱର,୨୬।୪ (ବ୍ୟୁରୋ): ଶୁକ୍ରବାର ଜଣେ ନକଲି ମହିଳା ଆଇପିଏସ୍ଙ୍କ କାରନାମା ପଦାକୁ ଆସିଥିବା ବେଳେ ଶନିବାର ଅନୁରୂପ ଘଟଣା ଘଟିଛିି। ନକଲି ଇନ୍ସପେକ୍ଟରଙ୍କ ମିଶନ୍ ଲଭ୍ ମହଙ୍ଗା ପଡ଼ିଛି। ଜଣେ ଯୁବକ ନିଜକୁ ଖଣ୍ଡଗିରି ଥାନାର ଇନ୍ସପେକ୍ଟର ପରିଚୟ ଦେଇ ଫୋନ୍ରେ ଜଣେ ବଳାତ୍କାର ପୀଡ଼ିତା ନାବାଳିକାଙ୍କୁ ପ୍ରେମ ନିବେଦନ କରୁଥିଲେ। ଯୁବକଙ୍କ କଥାବାର୍ତ୍ତାରୁ ପୋଲିସ ହୋଇନଥିବା ଜାଣି ସେ ଖଣ୍ଡଗିରି ଥାନାରେ ଅଭିଯୋଗ କରିଥିଲେ। କେସ୍ ନଂ-୨୫୧/୨୦ରେ ମାମଲା ରୁଜୁ କରି ପୋଲିସ ୨ ଯୁବକଙ୍କୁ ଗିରଫ କରିଛି। ସେମାନେ ହେଲେ ବଡ଼ଗଡ଼ କେନାଲରୋଡ଼ରେ ରହୁଥିବା ମନୋଜ ମହାନ୍ତି ଓ ଲକ୍ଷ୍ମୀସାଗରର ରବୀନ୍ଦ୍ର କୁମାର ସାହୁ। ପୋଲିସ ସେମାନଙ୍କଠାରୁ କାର୍,ଏକ ଗଣମାଧ୍ୟମର ଆଇକାର୍ଡ ଓ ମୋବାଇଲ୍ ଫୋନ୍ ଜବତ କରିଛି। ମନୋଜ ନିଜକୁ ଖବରଦାତାର ପରିଚୟ ଦେଇ ପୋଲିସକୁ ନାଲି ଆଖି ଦେଖାଉଥିଲେ। ଉଭୟଙ୍କୁ କୋର୍ଟ ଚାଲାଣ କରାଯାଇଛି। ଜାମିନ ନାମଞ୍ଜୁର ହେବାରୁ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇଦିଆଯାଇଛି।
ସୂଚନା ଅନୁଯାୟୀ, ୨ମାସ ତଳେ ନାବାଳିକାଙ୍କୁ ବଳାକତ୍ାର କରାଯାଇଥିବା ନେଇ ଅଭିଯୋଗ ହେବାପରେ ପୋଲିସ ଜଣେ ଯୁବକଙ୍କୁ ଗିରଫ କରିଥିଲା। ନାବାଳିକାଙ୍କ ଜଣେ ସାଙ୍ଗର ମାମୁ ହେଉଛନ୍ତି ରବୀନ୍ଦ୍ର। ସେ ଏହି ମଉକାର ଫାଇଦା ଉଠାଇବାକୁ ଚେଷ୍ଟା କରିଥିଲେ। ନାବାଳିକାଙ୍କ ବାପା ନ ଥିବାରୁ ତାଙ୍କୁ ସବୁ ପ୍ରକାର ସହଯୋଗ କରିବେ ବୋଲି କହି ଏକୁଟିଆ ଡାକୁଥିଲେ। ହେଲେ ସେ ତାଙ୍କ ଚକ୍କରରେ ପଡ଼ିନଥିଲେ। ଏହାପରେ ରବୀନ୍ଦ୍ର ତାଙ୍କର ସାଙ୍ଗ ମନୋଜଙ୍କୁ ନାବାଳିକାଙ୍କ ବିଷୟରେ କହିଥିଲେ। ଖଣ୍ଡଗିରି ଥାନା ଅଧିକାରୀ ନାବାଳିକାଙ୍କ ସମସ୍ୟା ସମାଧାନ କରିଥିବାରୁ ତାଙ୍କ ପରିଚୟରେ କଥା ହେଲେ ସେ ବିଶ୍ୱାସ କରିବେ ବୋଲି ମନୋଜଙ୍କୁ ପ୍ରବର୍ତ୍ତାଇଥିଲେ। ଫୋନରେ ମନୋଜ ପ୍ରେମ ନିବେଦନ ସହ ଅଶ୍ଳୀଳ କଥାବାର୍ତ୍ତା କରିଥିଲେ, ଯାହାକୁ ନେଇ ନାବାଳିକାଙ୍କ ସନ୍ଦେହ ହୋଇଥିଲା। ଫୋନ୍ ଆସିଥିବା ୩ଟି ନମ୍ବରକୁ ପୋଲିସ ଯାଞ୍ଚ କରିବା ପରେ ତାହା ମନୋଜଙ୍କର ବୋଲି ଜଣାପଡ଼ିଥିଲା। ଫୋନ୍ ନମ୍ବର ଟ୍ରେସ୍ ପରେ ଧରାପଡ଼ିଥିଲେ ଅଭିଯୁକ୍ତ। ସୂଚନାଯୋଗ୍ୟ,ଗତ ସପ୍ତାହରେ ମନୋଜ କଳ୍ପନା ଛକରେ ଏକ ପରିବା ଦୋକାନୀଙ୍କୁ ମାଡ଼ ମାରିଥିଲେ। ପୋଲିସ ତାଙ୍କୁ ଅଟକାଇଥିଲେ ମଧ୍ୟ ନିଜକୁ ସାମ୍ବାଦିକ କହି ସେ ପୋଲିସକୁ ଗାଳିଗୁଲଜ କରିଥିଲେ। ଲକ୍ଷ୍ମୀସାଗର ଥାନାରେ ତାଙ୍କୁ ଅଟକ ରଖାଯାଇଥିଲା। ପରେ ତାଙ୍କୁ ଛାଡ଼ି ଦିଆଯାଇଥିଲା।
