ବଲାଙ୍ଗୀର ଅଫିସ, ୨୦ା୫: ବଲାଙ୍ଗୀର ରେଲୱେ ଷ୍ଟେସନ୍ରେ ବୁଧବାର ଦୁଇଟି ଶ୍ରମିକ ସ୍ପେଶାଲ ଟ୍ରେନ୍ ଆସି ପହଞ୍ଚିଛି। ମହାରାଷ୍ଟ୍ରର ମୁମ୍ବାଇ ଉପନଗର ଲୋକମାନ୍ୟ ତିଲକ ଟର୍ମିନସଠାରୁ ଆସିଥିବା ଏହି ଟ୍ରେନ୍ ପୂର୍ବାହ୍ନ ପ୍ରାୟ ସାଢ଼େ ୧୦ଟାରେ ପହଞ୍ଚିଥିଲା। ଏହି ଟ୍ରେନ୍ରେ ବଲାଙ୍ଗୀର ଜିଲାର ୧୫୪ ପ୍ରବାସୀ ସମେତ ଅନ୍ୟ ୨୩ ଜିଲାର ସମୁଦାୟ ୫୫୨ ଜଣ ଏଠାରେ ଓହ୍ଳାଇଥିଲେ। ସମସ୍ତଙ୍କ ପଞ୍ଜୀକରଣ, ସ୍ବାସ୍ଥ୍ୟ ପରୀକ୍ଷା କରାଯିବା ପରେ ଖାଦ୍ୟ ଓ ପାନୀୟ ଯୋଗାଇ ଦିଆଯାଇ ସମସ୍ତ ପ୍ରବାସୀଙ୍କ ବିଭିନ୍ନ ଜିଲାର କ୍ୱାରାଣ୍ଟାଇନ୍ ସେଣ୍ଟରମାନଙ୍କୁ ନିଆଯାଇଥିଲା। ସନ୍ଧ୍ୟା ପ୍ରାୟ ୮ଟାରେ ଆଉ ଏକ ଶ୍ରମିକ ସ୍ପେଶାଲ ଟ୍ରେନ୍ ତେଲେଙ୍ଗାନାର ବୋଲାରମ୍ଠାରୁ ଆସି ବଲାଙ୍ଗୀର ରେଳ ଷ୍ଟେଶନ୍ରେ ପହଞ୍ଚିଥିଲା। ଏହି ଟ୍ରେନ୍ରେ ଆସିଥିବା ସମସ୍ତ ପ୍ରବାସୀଙ୍କୁ ପଞ୍ଜୀକରଣ ଓ ସ୍ବାସ୍ଥ୍ୟ ପରୀକ୍ଷା ପରେ ବିଭିନ୍ନ ଜିଲାକୁ ପଠାଯିବ ବୋଲି ଜଣାପଡିଛି। ନିୟମିତ ଟ୍ରେନ୍ ଆସିବା ଓ ଏହି କାରଣରୁ ବଲାଙ୍ଗୀର ସହରର ବିଭିନ୍ନ ରାସ୍ତାଘାଟରେ କର୍ଫ୍ୟୁ ଲଗାଯିବାକୁ ନେଇ ବଲାଙ୍ଗୀରରେ ତୀବ୍ର ପ୍ରତିକ୍ରିୟା ପ୍ରକାଶ ପାଇବା ପରେ ପ୍ରଶାସନ ପକ୍ଷରୁ ବୁଧବାର କେବଳ ରେଳଷ୍ଟେଶନ୍ ଅଞ୍ଚଳରେ ୧୪୪ ଧାରା ଓ କର୍ଫ୍ୟୁ ଲଗାଯାଇଥିଲା। ଗୁରୁବାର ଆଉ ଏକ ଶ୍ରମିକ ସ୍ପେଶାଲ ଟ୍ରେନ୍ ତାମିଲନାଡୁର ଥିରୁଭଲ୍ଲାର ଷ୍ଟେଶନ୍ରୁ ଆସି ପୂର୍ବାହ୍ନ ୧୦ଟା ୧୦ରେ ବଲାଙ୍ଗୀର ପହଞ୍ଚିବ। ଏଣୁ ଗୁରୁବାର ମଧ୍ୟ ରେଳ ଷ୍ଟେସନ ଅଞ୍ଚଳରେ ଉପଜିଲାପାଳ ସଞ୍ଜୟ କୁମାର ମିଶ୍ର କର୍ଫ୍ୟୁ ଜାରି କରିଥିବା ଜଣାପଡିଛି।
