ମୁମ୍ବାଇ,୧୪।୬: ମୁମ୍ବାଇର ଏକ ହସ୍ପିଟାଲରେ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ହସ୍ପିଟାଲରେ ଜଣେ ମା’ଙ୍କୁ ନିଦ ଲାଗିଯାଇଥିବା ବେଳେ ଏହାର ସୁଯୋଗ ନେଇ ଜଣେ ଦୁର୍ବୃତ୍ତ ନବଜାତ ଶିଶୁକୁ ଅପହରଣ କରିନେଇଥିବା ଅଭିଯୋଗ ହୋଇଛି। ସୂଚନାଯୋଗ୍ୟ, ଗୁରୁବାର ସନ୍ଧ୍ୟାରେ ଶୀତଲ ସାଲଓ୍ବୀ(୩୪)କିଛି ସମୟ ପାଇଁ ଶୋଇପଡ଼ିଥିବା ବେଳେ ବେଡ୍ରୁ କେହି ଦୁର୍ବୃତ୍ତ ତାଙ୍କ ୫ ଦିନର ଶିଶୁକୁ ଉଠାଇ ନେଇଥିଲେ। ଏହାପରେ ଶୀତଲ ହସ୍ପିଟାଲର କର୍ମଚାରୀଙ୍କୁ ଏନେଇ ପଚରାଉଚରା କରିଥିଲେ। ତେବେ କର୍ମଚାରୀମାନେ ହସ୍ପିଟାଲର ସିସିଟିଭି ଯାଞ୍ଚ କରିବା ସମୟରେ ଜଣେ ୪୦ ବର୍ଷୀୟା ମହିଳା ଶିଶୁଟିକୁ ନିଜ ବ୍ୟାଗରେ ପୂରାଇ ବାହାରକୁ ନେଇଯାଉଥିବା ଦେଖିବାକୁ ମିଳିଥିଲା। ଏନେଇ ପରିବାର ପକ୍ଷରୁ ଅଗ୍ରୀପଡା ପୋଲିସ ଥାନାରେ ଅଭିଯୋଗ କରାଯାଇଥିଲା। ପୋଲିସ ସିସିଟିଭିକୁ ଆଧାର କରିବା ସହ ଧାରା ୩୬୩ ତଥା ଅପହରଣ ଆଧାରରେ ମାମଲା ରୁଜୁ କରି ତଦନ୍ତ ଚଳାଇଛି।
