ଅନୁଗୋଳ ଅଫିସ, ୬।୧୧-ବଅଁରପାଳ ବ୍ଲକ କୁଇଓ ଠାରେ ୫ଟି ଟିପ୍ପର ସହ ଗୋଟିଏ ଜେସିବି ମେଶିନ୍ ଦ୍ୱାରା ମାଟି ଚୋରା ଚାଲାଣ ହେଉଥିବା ବେଳେ ମଙ୍ଗଳବାର ଅତିରିକ୍ତ ତହସିଲଦାର ଶ୍ୟାମସୁନ୍ଦର ସାହୁ ଚଢ଼ାଉ କରିଥିଲେ। ହେଲେ ଗାଡ଼ିଗୁଡ଼ିକୁ ଥାନା କି ତହସିଲକୁ ନିଆଯିବା କିମ୍ବା ଜରିମାନା ଆଦାୟ ପରିବର୍ତ୍ତେ ଘଟଣାସ୍ଥଳରେ ଛାଡ଼ି ଅତିରିକ୍ତ ତହସିଲଦାର ପଳାଇ ଯାଇଥିଲେ। ଅତିରିକ୍ତ ତହସିଲଦାରଙ୍କ ଏପରି କାର୍ଯ୍ୟକୁ ନେଇ ସ୍ଥାନୀୟ ଲୋକଙ୍କ ମନରେ ସନ୍ଦେହ ସୃଷ୍ଟି ହୋଇଛି। ଗାଡ଼ିଗୁଡ଼ିକ ଦୀର୍ଘ ସମୟ ଧରି ସେଠାରେ ଠିଆ ହୋଇ ରହିଥିବାରୁ ଏ ନେଇ ଅସନ୍ତୋଷ ପ୍ରକାଶ ପାଇଛି। ତେବେ ଅତିରିକ୍ତ ତହସିଲଦାରଙ୍କ ସହ ଯୋଗାଯୋଗ ହୋଇପାରି ନ ଥିବାରୁ ଘଟଣା ସମ୍ପର୍କରେ ଅଧିକ ତଥ୍ୟ ଓ ମତାମତ ମିଳିପାରି ନାହିଁ।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, କୁଇଓ ଠାରେ ମାଟି ଚୋରା ଚାଲାଣ ହେଉଥିବା ସୂଚନା ପାଇ ବଅଁରପାଳ ତହସିଲ କାର୍ଯ୍ୟାଳୟ ପକ୍ଷରୁ ପୂର୍ବାହ୍ନ ସାଢ଼େ ୧୦ଟାରେ ଅତିରିକ୍ତ ତହସିଲଦାର ସାହୁ ଓ କାର୍ଯ୍ୟାଳୟର ଅନ୍ୟ କର୍ମଚାରୀମାନେ ଚଢ଼ାଉ କରିଥିଲେ। ଏପରି କି ଗାଡ଼ି ଗୁଡ଼ିକ ଅଟକ ରଖିଥିଲେ ବି କୌଣସି ଜରିମାନା ଆଦାୟ କରି ନ ଥିଲେ। କେବଳ ଚାଳକମାନଙ୍କ ସହ ଆଲୋଚନା କରି ମାଟି ଚୋରା ଚାଲାଣ ବନ୍ଦ କରିବାକୁ ତାଗିଦ୍ କରିଥିଲେ। ଏହାପରେ ଚାଳକମାନଙ୍କୁ କାର୍ଯ୍ୟାଳୟକୁ ଯାଇ ଦେଖା କରିବାକୁ କହିଥିଲେ। କିନ୍ତୁ ଗାଡ଼ିଗୁଡ଼ିକ ରାସ୍ତା ଉପରେ ଛାଡ଼ି ଅତିରିକ୍ତ ତହସିଲଦାର ଚାଲିଯାଇଥିଲେ। ଏପରି କି ଗାଡ଼ି ଗୁଡ଼ିକ ଜବତ କରାଯାଇଛି କି ନାହିଁ ସେ ନେଇ କୌଣସି ସୂଚନା ଦେଇ ନ ଥିଲେ। ଏହି ଘଟଣାରେ ବଅଁରପାଳ ତହସିଲଦାର ଜିତେନ୍ଦ୍ର କୁମାର ସାହୁ କହିଛନ୍ତି, ଅତିରିକ୍ତ ତହସିଲଦାର ଚଢ଼ାଉ କରିଥିଲେ। କିନ୍ତୁ ଏହାପରେ କ’ଣ ହୋଇଛି ସେ ଜାଣିନାହାନ୍ତି।
