ବରଗଡ଼ ଅଫିସ୍,୨।୬
ବାଟବଣା ହୋଇ ଫସି ରହିଥିବା ଝାଡ଼ଖଣ୍ଡର ପ୍ରବାସୀ ମା, ପୁଅଙ୍କୁ ସହଯୋଗ କରି ସୋମବାର ବରଗଡ଼ ଜିଲା ପାଇକମାଲ ବ୍ଲକ ଅନ୍ତର୍ଗତ କାଂସଡ଼ା ପଞ୍ଚାୟତର ସରପଞ୍ଚ ସୁଷମା ସାହୁଙ୍କ ସ୍ବାମୀ ଯୁଧିଷ୍ଠିର ଅନ୍ୟମାନଙ୍କ ପାଇଁ ଦୃଷ୍ଟାନ୍ତ ସାଜିଛନ୍ତି । ଝାଡ଼ଖଣ୍ଡ ରାଜ୍ୟ ସିମଡ଼େଗା ଜିଲାର ଜଣେ ମହିଳା ନିଜ ଶିଶୁପୁତ୍ରକୁ ଧରି ଗତ ପ୍ରାୟ ୨ମାସ ତଳେ କାଂସଡ଼ା ଅଞ୍ଚଳରେ ଅସହାୟ ଅବସ୍ଥାରେ ବୁଲାବୁଲି କରୁଥିଲେ । ସେ ନେଇ ଖବର ପାଇବା ପରେ ଯୁଧିଷ୍ଠିର ସେଠାରୁ ମା, ପୁଅଙ୍କୁ ଉଦ୍ଧାର କରି ସ୍ଥାନୀୟ କ୍ବାରାଣ୍ଟାଇନ ସେଣ୍ଟରରେ ରଖିଥିଲେ। କ୍ବାରାଣ୍ଟାଇନ ଅବଧି ସରିବା ପରେ ସେମାନଙ୍କ ରହଣୀ ପାଇଁ ସେ ପୁଣି ଏକ ସ୍ବତନ୍ତ୍ର ବ୍ୟବସ୍ଥା କରିଥିଲେ । ଏକ କୋଠରୀରେ ମା, ପୁଅଙ୍କୁ ଆଶ୍ରୟ ଦେବା ସହିତ ସେମାନଙ୍କ ଖାଦ୍ୟପେୟ, ବସ୍ତ୍ର ଆଦି ଯୋଗାଇ ଦେଇଥିଲେ । ଏହା ସହିତ ଜଣେ ଲେଖାଏ ମହିଳା, ପୁରୁଷଙ୍କୁ ସେମାନଙ୍କ ସୁରକ୍ଷା ଦାୟିତ୍ୱରେ ରଖିଥିଲେ । ଘଟଣା ସମ୍ପର୍କରେ ଝାଡ଼ଖଣ୍ଡ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରାଯାଇଥିଲା । ମାତ୍ର କିଛି ସୁଫଳ ମିଳି ନ ଥିଲା । ଫଳରେ ଯୁଧିଷ୍ଠିର ନିଜ ଖର୍ଚ୍ଚରେ ଏକ ଗାଡି ଭଡ଼ା କରି ସେହି ମା, ପୁଅଙ୍କୁ ଏଠାରୁ ୪୦୦ କି.ମି ଦୂର ଝାଡ଼ଖଣ୍ଡ ରାଜ୍ୟ ସିମଡ଼େଗା ଜିଲା ସ୍ଥିତ ସେମାନଙ୍କ ଘରେ ଛାଡ଼ି ଆସିଥିଲେ ।
