ହରିଦ୍ୱାରରେ ଏପରି ଏକ ଆଶ୍ରମ ରହିଛି। ଏହାର ଯଜ୍ଞଶାଳାରେ ଦୀର୍ଘ ୬୬ ବର୍ଷ ଧରି ଅଖଣ୍ଡ ଅଗ୍ନି ପ୍ରଜ୍ୱଳିତ ହୋଇରହିଛି । ୧୯୫୩ରେ ଏହାର ସ୍ଥାପନା କରାଯାଇଥିଲା। ଏଠାରେ ପ୍ରତିଦିନ ସକାଳେ ଦୁଇ ଘଣ୍ଟା ଧରି ଯଜ୍ଞ ହୋଇଥାଏ । ଯଜ୍ଞ ପରେ ଲୁହା ପ୍ଲେଟ୍ରେ ଏହାକୁ ଢାଙ୍କି ଦିଆଯାଏ । ଆଗାମୀ ଦିନ ସକାଳେ ପୁଣି ଲୁହା ପ୍ଲେଟ୍କୁ ହଟାଇ ଦିଆଯାଇ ସେଥିରେ ଶୁଖିଲା କାଠ ରଖି ଦିଆଯାଏ । କାଠ ରଖାଯିବା ପରେ ସ୍ବତଃ ଅଗ୍ନି ପ୍ରଜ୍ୱଳିତ ହୋଇଥାଏ । ଏଠାରେ ଅଗ୍ନି ପ୍ରଜ୍ୱଳିତ କରିବା ପାଇଁ ଆଜି ପର୍ଯ୍ୟନ୍ତ ଦିଆସିଲିର ଉପଯୋଗ କରାଯାଇ ନାହିଁ ବୋଲି ସ୍ଥାନୀୟ ଲୋକେ କୁହନ୍ତି। ଗାୟତ୍ରୀ ତୀର୍ଥ ଶାନ୍ତିକୁଞ୍ଜରେ ରହିଛି ଏହି କୁଣ୍ଡ। ଏହି ଅଖଣ୍ଡ ଅଗ୍ନିକୁଣ୍ଡ ଦର୍ଶନ ପାଇଁ ଅନେକ ଶ୍ରଦ୍ଧାଳୁ ଆସିଥାନ୍ତି। ଦୀର୍ଘ ଦିନ ଧରି ଅଗ୍ନି ପ୍ରଜ୍ୱଳିତ ହେଲେ ତାହା ସିଦ୍ଧ ହୋଇଯାଇଥାଏ ବୋଲି ଶାସ୍ତ୍ରରେ ଉଲ୍ଲେଖ ରହିଛି । ଏହି ସିଦ୍ଧ ଅଗ୍ନି ସମ୍ମୁଖରେ ବସି ପବିତ୍ର ହୃଦୟରେ ଯାହା ବି କାମନା କରାଯାଏ ତାହା ସହଜରେ ପ୍ରାପ୍ତି ହେଉଥିବା ଲୋକେ ବିଶ୍ୱାସ କରନ୍ତି । ଲୋକେ କୁହନ୍ତି ସିଦ୍ଧ ମହାପୁରୁଷ ପଣ୍ଡିତ ଶ୍ରୀରାମ ଶର୍ମା ଆଚାର୍ଯ୍ୟ ହିମାଳୟକୁ ତପସ୍ୟା କରିବାକୁ ଯାଇଥିଲେ । ସେହି ସମୟରେ ଏହି ଅଗ୍ନି ହିମାଳୟର କୌଣସି ଏକ ଗୁପ୍ତ ଗୁମ୍ପାର ସିଦ୍ଧ କୁଣ୍ଡରୁ ତାଙ୍କ ଗୁରୁଦେବ ସର୍ବେଶ୍ୱରାନନ୍ଦଙ୍କ କୃପାରୁ ସେ ପାଇଥିଲେ ବୋଲି ଲୋକେ କୁହନ୍ତି।
