ବ୍ରହ୍ମପୁର ଅଫିସ,୧୪।୯-ବ୍ରହ୍ମପୁରରେ ଟ୍ରାଫିକ ସମସ୍ୟା ସୁଧାରିବାକୁ ଆଉ ଏକ ପଦକ୍ଷେପ ହାତକୁ ନେଇଛି ବ୍ରହ୍ମପୁର ମହାନଗର ନିଗମ (ବିଏମ୍ସି) । ଟ୍ରାଫିକ ସମସ୍ୟା ସୃଷ୍ଟି କରୁଥିବା ବୁଲା ଗୋରୁ, ମଇଁଷିଙ୍କୁ ରାସ୍ତାରୁ ହଟାଇବା ଦିଗରେ ବିଏମସି ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି। ପ୍ରଥମ ପର୍ଯ୍ୟାୟରେ ମାଲିକ ନ ଥିବା ଗାଈଙ୍କୁ ରାସ୍ତାରୁ ଉଠାଯାଇ ନିକଟବର୍ତ୍ତୀ ଅଞ୍ଚଳର କୃଷକଙ୍କୁ ଦାନ କରାଯାଇଥିବା ବିଏମସି ପକ୍ଷରୁ ସୂଚନା ମିଳିଛି ।
ଶେଷ ସୁଦ୍ଧା ବିଏମସି ପକ୍ଷରୁ ୪୫୩୪ ଗାଈ, ମଇଁଷିଙ୍କୁ ଟ୍ୟାଗିଂ କରାଯାଇଛି ା ପ୍ରଥମ ପର୍ଯ୍ୟାୟରେ ରାସ୍ତାରୁ ଉଠାଯାଇଥିବା ମାଲିକ ନ ଥିବା ୫ ଗାଈଙ୍କୁ ରଙ୍ଗେଇଲୁଣ୍ଡା ବ୍ଲକ ଅଞ୍ଚଳର କୃଷକଙ୍କୁ ଦାନ କରାଯାଇଥିବା କମିଶନର ଚକ୍ରବର୍ତୀ ସିଂ ରାଠୋର ସୂଚନା ଦେଇଛନ୍ତି। ବିଏମସି ପକ୍ଷରୁ ଗଠିତ ୧୦ ଜଣିଆ ସ୍କ୍ବାର୍ଡ ଟିମ ଗାଈଗୋରୁଙ୍କୁ ରାସ୍ତାରୁ ଉଠାଇବା କାର୍ଯ୍ୟରେ ନିୟୋଜିତ କରାଯାଇଛି ା ପରବର୍ତ୍ତି ପର୍ଯ୍ୟାୟରେ ମାଲିକ ଥିବା ଗୋରୁ ଗାଈଙ୍କ ଅବାଧ ବିଚରଣକୁ ରୋକିବା ଦିଗରେ ପଦକ୍ଷେପ ନିଆଯିବ। ମାଲିକଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜଣାପଡିଛି।
ସୂଚନାଯୋଗ୍ୟ, ବୁଲା ଗୋରୁଙ୍କ ଯୋଗୁ ବ୍ରହ୍ମପୁରରେ ବହୁ ସମୟରେ ଟ୍ରାଫିକ ସମସ୍ୟା ସୃଷ୍ଟି ହେବା ସହ ଛୋଟ ବଡ ଦୁର୍ଘଟଣା ମଧ୍ୟ ଘଟୁଛି। ଏହାକୁ ଦୃୃଷ୍ଟିରେ ରଖି ବୁଲା ଗୋରୁଗାଇ, ମଇଁଷିଙ୍କ ଅବାଧ ବିଚରଣ ଉପରେ ରୋକ ଲଗାଇବାକୁ ବିଏମସି ପକ୍ଷରୁ ଜୁଲାଇ ୧ରୁ ଟ୍ୟାଗିଂ ପ୍ରକ୍ରିିୟା ଆରମ୍ଭ ହୋଇଥିଲା ା ପ୍ରାଣୀଧନ ଚିକିସତ୍ା ବିଭାଗର ସହଯୋଗରେ ଏହି ଟ୍ୟାଗିଂ ପ୍ରକ୍ରିୟା ହୋଇଥିଲା। ପ୍ରତ୍ୟେକ ୱାର୍ଡର ବୁଲା ଗୋରୁ ଓ ମଇଁଷିଙ୍କୁ ଚିହ୍ନଟ କରି ୧୧ ସଂଖ୍ୟା ବିଶିଷ୍ଟ ସ୍ବତନ୍ତ୍ର ପରିଚୟ ନମ୍ବର ଥିବା ଟ୍ୟାଗକୁ ସେମାନଙ୍କ କାନରେ ଖଞ୍ଜା ଯାଇଥିଲା ା
ଟ୍ୟାଗିଂ ନମ୍ବର ସହ ଗୋରୁ, ମଇଁଷିଙ୍କ ମାଲିକଙ୍କ ନାମ ଠିକଣାକୁ ସଂଯୋଗ କରାଯାଇଥିଲା ା ଉକ୍ତ ଗୋରୁ ଓ ମଇଁଷି ରାସ୍ତାରେ ଅବାଧରେ ବୁଲୁଥିବା ଦେଖିବାକୁ ମିଳିଲେ ସେମାନଙ୍କୁ ବିଏମସି ପକ୍ଷରୁ ଧରାଯିବ ା ସମ୍ପୃକ୍ତ ମାଲିକଙ୍କ ନିକଟରୁ ଜରିମାନା ଆଦାୟ କରାଯିବ। ଏହା ପରେ ବି ପୁଣି ରାସ୍ତାକୁ ଆସିଲେ ଗୋରୁ ଓ ମଇଁଷିଙ୍କୁ ଧରି ଚାଷୀ ତଥା ଗୋପାଳକଙ୍କୁ ଦାନ କରାଯିବ ବୋଲି ବିଏମସି ପକ୍ଷରୁ ସୂଚନା ଦିଆଯାଇଥିଲା ା
