ଭୋପାଳ/ଉମରିଆ,୩।୫: ଅଭୟାରଣ୍ୟରେ ଅସୁରକ୍ଷିତ ଜାତୀୟ ପଶୁ। ଲକ୍ଡାଉନ୍ ସମୟରେ ଦେଶର ସଂରକ୍ଷିତ ଜଙ୍ଗଲ ଏବଂ ଅଭୟାରଣ୍ୟରେ ବିଭିନ୍ନ କାରଣରୁ ମରୁଛନ୍ତି ବାଘ। ଶନିବାର ବାନ୍ଧବଗଡ଼ ବ୍ୟାଘ୍ର ପ୍ରକଳ୍ପ ଅଧୀନ ମେଡରା ବୀଡ ଅଞ୍ଚଳରୁ ଏକ ବାଘ ଶାବକର ମୃତଦେହ ଉଦ୍ଧାର କରାଯାଇଛି। ଏହାର ଆନୁମାନିକ ବୟସ ପାଖାପାଖି ୮ମାସ ହେବ। ଏହି ଶାବକକୁ ମିଶାଇ ଗୋଟିଏ ମାସରେ ଦେଶରେ ୯ ବାଘଙ୍କ ମୃତ୍ୟୁ ଘଟିଲାଣି। କିଛିଦିନ ତଳେ ସୀମା ପରିଧିକୁ ନେଇ ଦୁଇ ବାଘଙ୍କ ମଧ୍ୟରେ ହୋଇଥିବା ଲଢେଇରେ ଗୋଟିଏର ମୃତ୍ୟୁ ହୋଇଥିଲା। ଅନ୍ୟ ଦୁଇଟି ରୋଗଗ୍ରସ୍ତ ହୋଇ ପ୍ରାଣ ହରାଇଥିବାବେଳେ ବାକି ବାଘଙ୍କ ଗଳିତ ମୃତଦେହ ଠାବ କରାଯାଇଛି। ବାନ୍ଧବଗଡ଼ ଟାଇଗର ରିଜର୍ଭ କର୍ତ୍ତୃପକ୍ଷଙ୍କ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଶନିବାର ଆର୍ଏଏଫ୍ ୪୯୪ ଅଞ୍ଚଳରୁ ବାଘର ମୃତଦେହ ଠାବ କରାଯାଇଥିଲା। ବ୍ୟବଚ୍ଛେଦ ରିପୋର୍ଟରୁ ଏହାର ମୃତ୍ୟୁ କେଉଁ କାରଣରୁ ହୋଇଛି ତାହା ଜଣାପଡ଼ିବ।
ଏକ ତଥ୍ୟ ଅନୁଯାୟୀ, ମାସକରେ ମରିଥିବା ସମସ୍ତ ବାଘଙ୍କ ବୟସ ୧୦ ବର୍ଷ ମଧ୍ୟରେ। ତେବେ ଲଗାତର ଏପରି ବାଘମୃତ୍ୟୁକୁ ନେଇ ବନ କର୍ମଚାରୀ ଚିନ୍ତାରେ ପଡ଼ିଛନ୍ତି। ଚଳିତବର୍ଷ ଜାନୁୟାରୀରୁ ମାର୍ଚ୍ଚ ଯାଏ ଗୋଟିଏ ବି ବାଘଙ୍କ ମୃତ୍ୟୁ ହୋଇ ନ ଥିଲା। ଗତ ବୁଧବାର ଏକାସଙ୍ଗରେ ୨ ବାଘଙ୍କ ମୃତ୍ୟୁ ହୋଇଥିଲା। ସେଥିରୁ ଗୋଟିଏ ବାନ୍ଧବଗଡ଼ ଟାଇଗର ରିଜର୍ଭରେ ଏବଂ ଅନ୍ୟ ଗୋଟିଏ ମୁକୁନ୍ଦପୁର ଚିଡ଼ିଆଖାନାରେ ହୋଇଛି। ହେଲେ ଚଳିତ ମାସରେ ଏତେସଂଖ୍ୟକ ବାଘମୃତ୍ୟୁର କାରଣ ଜଣାପଡୁନାହିଁ। ସବୁଠୁ ଅଧିକ ବାଘଙ୍କ ମୃତ୍ୟୁ ବାନ୍ଧବଗଡ଼ ନ୍ୟାଶନାଲ ପାର୍କରେ ହୋଇଥିବାବେଳେ ଦ୍ୱିତୀୟ ସ୍ଥାନରେ ରହିଛି କାହ୍ନା ନ୍ୟାଶନାଲ ପାର୍କ।
